Saatlı Rayon Məhkəməsi Qətnamə — İş №2(055)-262/2025

Azərbaycan Respublikası adından QƏTNAMƏ Saatlı rayonu İş № 2(055)-262/2025 06.03.2025 SAATLI RAYON MƏHKƏMƏSİ Hakim Qasımov Vüqar İnqilab oğlunun sədrliyi, Məhkəmə iclasının katibi X2, İddiaçı iştirakı ilə, İddiaçı cavabdeh “Azəriqaz” İstehsalat Birliyinə qarşı akt əsasında hesablanmış borcun silinməsi tələbinə dair mülki işə açıq məhkəmə iclasında baxaraq MÜƏYYƏNETDİ: İddiaçı iddia ərizəsi ilə məhkəməyə müraciət edərək “Azəriqaz” İstehsalat Birliyi tərəfindən tərtib edilmiş 21 may 2020-ci il tarixli, ******* saylı aktın ləğv edilməsi və həmin akt əsasında hesablanmış 72 manat ziyanın silinməsi barədə qətnamə çıxarılmasınıə xahiş etmişdir. Məhkəmə iclasında İddiaçı iddia ərizəsinə düzəliş edərək cavabdeh “Azəriqaz” İstehsalat Birliyi tərəfindən tərtib edilmiş 21 may 2020-ci il tarixli, ******* saylı akt əsasında hesablanmış 72 manat cərimə borcunun silinməsini xahiş etmişdir. Məhkəmə baxışı zamanı İddiaçı iddianı müdafiə edərək izahatında göstərdi ki, 26 avqust 2019-cu ildə “Azəriqaz” X1 xidmət sahəsinin əməkdaşları yaşadığı evə nəql edilən qaz xəttinə quraşdırılmış qaz sayğacına növbəti dövlət yoxlaması adı ilə baxış keçirmişlər və qaz sayğacını yeni qaz sayğacı ilə əvəz etmişlər. Bundan 7 ay sonra, yəni 21 may 2020-ci ildə isə “Azəriqaz” İstehsalat Birliyinin əməkdaşları ******* saylı akt tərtib edərək həmin aktda göstərmişlər ki, xətalar normadan artıqdır, sayğac minimal sərfiyyatda 100% nisbi xǝtayla işləyir. Kamera vasitəsilə sayğacın daxilinə baxış keçirildi kənar təsir izləri aşkar edilmədi. Hesablama mexanizimi minimal sərfiyyatda keçən qazın həcmini qeyd etmir. Bu xətaya görə isə “Azəriqaz” İstehsalat Birliyi ona 72 manat cərimə yazmışdır. Saatlı xidmət sahəsinin əməkdaşları qaz sayğacını yeni qaz sayğacı ilə əvəz edərkən köhnə sayğacı lazımi qaydada qablaşdırıb möhürləməyərək özləri ilə aparmışlar, 26 avqust 2019-cu ildə açılmış qaz sayğacına yoxlanılması üçün laboratoriyada 7 ay sonra, yəni 12 may 2020-ci il tarixdə baxılmış və qaz sayğacım yoxlanılması üçün laboratoriyaya təqdim edilərkən mənim iştirakı da təmin edilməmişdir. Sayğacın işlək vəziyyətdə olub, çünki demək olar ki, tez-tez sayğaca o, ailə üzvləri və ayda iki dəfə isə qaz sayğaclarına nəzarət edən məsul şəxsi baxmışdır. Nəzarətçi hər ay onlara sərfiyyat barədə bildiriş vermiş, onlar də həmin bildiriş əsasında pulunu ödəmişlər. Saatlı xidmət sahəsinin əməkdaşları tərəfindən sayğacı yenisi ilə əvəz edilərkən sayğacının qurğuşum və həmçinin jilka plombları üzərində olmuşdur. Əgər qaz sayğacının plomları üzərindədirsə və həmçinin sayğac açılarkən onun üzərində hər hansı nöqsan aşakar olunmayıbsa və sayğacın daxilində də heç bir kənar təsir aşakar edilməyibsə bu halda onun necə təqsiri ola bilər. Ona görə də hesab edirə ki, abonent olaraq ona cərimə yazılması qərəzlidir. Sonda iddianın təmin edilməsini, hesablanmış borcun silinməsini xahiş etdi. Əvvəlki məhkəmə iclasında iştirak edən cavabdehin nümayəndəsi X3 izahat verərək göstərdi ki, iddianı qəbul etmirlər. Belə ki, iddiaçının qaz sayğaçı yeni ilə əvəz edilmiş və köhnə sayğac laboratoriya göndərilmişdir və sayğacın nisbi xǝtayla işləydiyi barədə rəyi verilmişdir. Ona görədə iddiaçı 72 manat cərimə edilmişdir. Cərimə məbləği də iddiaçı tərəfindən artıq cərimə ödənilmişdir. Ona görə iddianın rədd olunmasını xahiş edir. Məhkəmə iclasının vaxtı və yeri haqqında lazımi qaydada xəbərdar edilmiş cavabdehin nümayəndəsi heç bir üzrlü səbəb olmadan məhkəmənin iclasında iştirak etmir və məhkəmə Azərbaycan Respublikası Mülki-Prosessual Məcəlləsinin 185.5-ci maddəsinə əsaslanaraq cavabdehin nümayəndəsinin iştirakı olmadan işə baxılmasını mümkün hesab etmişdir. Məhkəmə iddiaçının izahatını dinləyərək, iddianın dəlillərini və iş materiallarını araşdıraraq hesab edir ki, iddia əsaslıdır. Məhkəmə hesab edir ki, mübahisənin düzgün həll edilməsi üçün sayğacın işlək vəziyyətdə saxlanılmasına və sayğacın üzərində olan plombların qorunmasına görə istehlakçının, yaxud qazpaylayıcının cavabdehlik daşımasının müəyyən edilməsinin iş üçün əhəmiyyəti vardır. Belə ki, Azərbaycan Respublikası Nazirlər Kabinetinin 80 saylı xx.xx.2011-ci il tarixli qərarı ilə təsdiq edilmiş “Qazdan istifadə Qaydaları”nın 4.6-cı bəndinə əsasən, qaz sayğaclarının üzərində AİBNDA-nın və qaz paylayıcısının sayğacın işlək vəziyyətdə olduğunu təsdiq edən plombu olmalıdır. Qeyd edilən Qaydaların 4.7-ci bəndinə əsasən, sayğacların üzərində olan plomblar kənar müdaxilələrdən qorunmaq üçün müvafiq örtüklə örtülməli (fiziki şəxs olan istehlakçıların sayğacları qaz paylayıcısı tərəfindən) və sayğac göstəricisinə sərbəst şəkildə baxılmasına imkan olmalıdır. Göstərilən Qaydaların 4.8-ci bəndinə əsasən, fiziki şəxs olan istehlakçıların qaz sayğaclarının işlək vəziyyətdə saxlanılmasına görə cavabdehliyi qaz paylayıcısı, hüquqi şəxslərin qaz sayğaclarının işlək vəziyyətdə saxlanılmasına görə cavabdehliyi isə özləri daşıyırlar. Məhkəmə iclasında müəyyən edilmişdir ki, iddiaçının yaşadığı ünvana quraşdırılan qaz sayğacı evdən kənarda yerləşir. “Qazdan istifadə Qaydaları”na əsasən qaz paylayıcısı ilə istehlakçı arasında qazpaylayıcı şəbəkənin balans mənsubiyyəti sərhədini müəyyən edən akt (1 nömrəli əlavə) əlavə edilir (Qaydaların 1.3-cü bəndi). “Qazdan istifadə Qaydaları”nın yuxarıda qeyd edilən normalarından da göründüyü kimi, iddiaçının yaşadığı ünvana quraşdırılan qaz sayğacının işlək vəziyyətdə saxlanılması üçün cavabdehlik qaz paylayıcının, yəni “Azəriqaz” İB-nin üzərinə düşür. Eyni zamanda, fiziki şəxs olan istehlakçıların sayğaclarının üzərində olan plomblar kənar müdaxilələrdən qorunmaq üçün “Azəriqaz” İB tərəfindən müvafiq örtüklə örtülməlidir. Bundan başqa, təbii qazdan istifadə qaydalarının pozulması barədə aktda qeyd edilən pozuntunun iddiaçının təqsirindən baş verməsini təsdiq edən sübutları cavabdeh məhkəməyə təqdim edə bilməmişdir. Azərbaycan Respublikası Mülki Məcəlləsinin 77.1-ci maddəsinə əsasən, hər bir tərəf öz tələblərinin və etirazlarının əsası kimi istinad etdiyi halları sübut etməlidir. Qeyd olunanlara əsasən məhkəmə hesab edir ki, aktda qeyd edilən pozuntunun törədilməsində iddiaçının təqsiri sübut olunmadığından, fiziki şəxs olan istehlakçıların sayğacları üzərində olan plombların kənar müdaxilələrdən qorunmaq üçün qaz paylayıcısı tərəfindən müvafiq örtüklə örtülməli olduğundan və fiziki şəxs olan istehlakçıların qaz sayğaclarının işlək vəziyyətdə saxlanılmasına görə cavabdehliyi qaz paylayıcısı özü daşığından cavabdehin hesabladığı borc məbləğini iddiaçıdan tələb etməsi əsassızdır. Azərbaycan Respublikası Mülki Məcəlləsinin 448.2-ci maddəsinə əsasən, borclu öz öhdəliklərinin hər bir təqsirli pozuntusu üçün məsuliyyət daşıyır. Şərh olunanları nəzərə alaraq məhkəmə belə nəticəyə gəlir ki, iddia təmin edilməklə “Azəriqaz” İstehsalat Birliyinin 21 may 2020-ci il tarixli, ******* saylı aktına əsasən İddiaçı abonent hesabına əlavə edilmiş borc silinməlidir. Məhkəmə, həmçinin hesab edir ki, məhkəmə xərcinə daxil olan dövlət rüsumu cavabdehdən tutularaq dövlət büdcəsinə ödənilməlidir. “Dövlət rüsumu haqqında” Azərbaycan Respublikası Qanununun 8.1.1-ci maddəsinə əsasən iddia qiyməti 1.000 manatadək olduqda 30 manat dövlət rüsumu tutulur. Həmin Qanunun 9.1.5-ci maddəsinə əsasən, istehlakçıların hüquqlarının pozulması ilə əlaqədar verdikləri iddialar üzrə - iddiaçılar dövlət rüsumu ödəməkdən azad olunurlar. Azərbaycan Respublikası MPM-nin 119.2-ci maddəsinə əsasən, iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət gəlirlərinə alınır. Göstərilən qanunvericilik normalarına əsasən məhkəmə hesab edir ki, iddia tələbi istehlakçıların hüquqlarının pozulması ilə bağlı olduğundan, həmçinin iddianın qiyməti 1000 manatadək olduğundan, iddiaçı isə müəyyən olunmuş qaydada dövlət rüsumunu ödəməkdən qanunla azad edildiyindən, 30 manat məbləğində dövlət rüsumu cavabdehdən tutularaq dövlət büdcəsinə ödənilməlidir. Şərh olunanlara əsaslanaraq və Azərbaycan Respublikası MPM-nin 216-220-ci maddələrini rəhbər tutaraq məhkəmə QƏTETDİ: İddia təmin edilsin. “Azəriqaz” İstehsalat Birliyinin 21 may 2020-ci il tarixli, ******* saylı aktına əsasən ünvan 1 ünvanda yerləşən fərdi yaşayış evi üzrə (abonent kodu **********00320) təbii qazın itkisinə görə İddiaçı hesablanmış 72 manat məbləğində borc silinsin. 30 (otuz) manat məbləğində dövlət rüsumu “Azəriqaz” İstehsalat Birliyindən alınaraq dövlət büdcəsinə ödənilsin. Qətnamədən rəsmi qaydada verildiyi vaxtdan bir ay müddətində Saatlı Rayon Məhkəməsi vasitəsi ilə “Elektron məhkəmə” informasiya sistemində yaradılan elektron kabinetdən istifadə etməklə Şirvan Apellyasiya Məhkəməsinə apellyasiya şikayəti verilə bilər.