Saatlı Rayon Məhkəməsi Qətnamə — İş №2(055)-86/2023

Azərbaycan Respublikası adından QƏTNAMƏ Saatlı rayonu İş № 2(055)-86/2023 24.02.2023 SAATLI RAYON MƏHKƏMƏSİ Hakim Sadıqov Mirlətif Süleyman oğlunun sədrliyi, Məhkəmə iclasının katibi X1 iştirakı ilə, İddiaçı cavabdeh "xxxx" Açıq Səhmdar Cəmiyyətinə qarşı aktın və onun nəticələrinin ləğv edilməsi tələbinə dair mülki işə açıq məhkəmə iclasında baxaraq, məhkəmə M ü ə y y ə n e t d i: İddiaçı cavabdeh "xxxx" Açıq Səhmdar Cəmiyyətinə qarşı iddia ərizəsi ilə məhkəməyə müraciət edərək cavabdeh "xxxx" Açıq Səhmdar Cəmiyyətinin 23 avqust 2022-ci il tarixli, 029699 saylı aktının ləğv edilməsi və həmin akta əsasən onun abonent hesabına (abonent kodu: **********0) əlavə edilmiş borcun silinməsi barədə qətnamə çıxarılmasını məhkəmədən xahiş etmişdir. İddiaçı iddia ərizəsini onunla əsaslandırmışdır ki, məlumatları olmadan 23 avqust 2022-ci il tarixli, 029699 saylı akta əsasən yüksək məbləğdə borc hesablanmışdır. Həmin akt əsassızdır. Belə ki, bu qədər böyük sərfiyatın haradan və necə hesablanması göstərilməmişdir Maddi vəziyyətləri çətindir, hər dəfə karta yüklənmiş pulun 50 faizi borca tutulur. Odur ki, cavabdeh "xxxx" Açıq Səhmdar Cəmiyyətinin 23 avqust 2022-ci il tarixli, 029699 saylı aktının ləğv edilməsi və həmin akta əsasən onun abonent hesabına (abonent kodu: **********0) əlavə edilmiş borcun silinməsi barədə qətnamə çıxarılmasını məhkəmədən xahiş etmişdir. Göstərilən mülki iş üzrə İddiaçı məhkəməyə ünvanladığı teleqramda iddianı müdafiə etdiyini göstərərək, cavabdeh "xxxx" Açıq Səhmdar Cəmiyyətinə qarşı aktın və onun nəticələrinin ləğv edilməsi tələbi barədə təyin olunmuş məhkəmə iclasında iştirak edə bilməməsinin nəzərə alınaraq məhkəmə iclasının onun iştirakı olmadan keçirilməsini məhkəmədən xahiş etmişdir. Məhkəmə İddiaçı xahişini nəzərə alaraq işə iddiaçının iştirakı olmadan baxılmasını mümkün hesab etmişdir. Məhkəmə iclasının vaxtı və yeri haqqında lazımi qaydada xəbərdar edilmiş cavabdeh "xxxx" Açıq Səhmdar Cəmiyyətinin nümayəndəsi heç bir üzrlü səbəb olmadan məhkəmənin iclasında iştirak etmir və məhkəmə Azərbaycan Respublikası Mülki Prosessual Məcəlləsinin 185.6-cı maddəsinə əsaslanaraq cavabdehin nümayəndəsinin iştirakı olmadan işə baxılmasını mümkün hesab etmişdir. İşdə olan və məhkəmə iclasında elan edilmiş “Məişət istehlakçılarında sayğacların dəyişdirilməsi yoxlanması və quraşdırılması” haqqında 23 avqust 2022-ci il tarixli, 029699 nömrəli aktdan görünür ki, abonent İddiaçı fərdi yaşayış evinə (ünvan:Saatlı rayonu, Qırağlı kəndi, abonent kodu: **********0) quraşdırılmış elektrik sayğacından kənar elektrik enerjisindən istifadə edildiyi aşkar olunmuşdur. İşdə olan və məhkəmə iclasında elan edilmiş çıxarışdan görünür ki, İddiaçı 707 manat borc hesablanmışdır. Məhkəmə işə əlavə edilmiş sənədləri tədqiq edib belə hesab edir ki, iddia qismən təmin edilməlidir. Belə ki, Azərbaycan Respublikası Nazirlər Kabinetinin 2005-ci ilin 02 fevral tarixli, 18 nömrəli qərarı ilə təsdiq edilmiş «Elektrik enerjisindən istifadə Qaydaları»nın 8.16-cı bəndinə əsasən istehlakçının, o cümlədən məişət abonentinin təqsiri olmadan uçot müvəqqəti pozulduqda, elektrik enerjisi sərfinin hesabatı enerji təchizatı müəssisəsinin və istehlakçının razılığına əsasən uçot pozulana qədər və ya uçot bərpa edildikdən sonrakı dövrün orta gündəlik sərfinə uyğun aparılır. Elektrik enerjisinin orta gündəlik sərfinə görə hesablaşma dövrü bir aydan artıq olmamalıdır, bu müddət ərzində hesablaşma elektrik sayğaclarının normal işi enerji təchizatı müəssisəsi tərəfindən bərpa olunmalıdır. Məhkəmədə tədqiq olunmuş sübutlara əsasən müəyyən olundu ki, İddiaçı yaşadığı Saatlı rayon Qırağlı kəndində yerləşən fərdi yaşayış evinə quraşdırılmış elektrik sayğacında sayğacdan kənar elektrik enerjisindən istifadə edildiyi aşkar edildiyi üçün "xxxx" Açıq Səhmdar Cəmiyyətinin əməkdaşları tərəfindən “Məişət istehlakçılarında sayğacların dəyişdirilməsi yoxlanması və quraşdırılması” haqqında 23 avqust 2022-ci il tarixli, 029699 nömrəli akt tərtib edilmiş, həmin akta əsasən itirilmiş elektrik enerjisinin bərpası üzrə 707 manat sərfiyyat hesablanmış və həmin sərfiyyatın cavabdeh "xxxx" Açıq Səhmdar Cəmiyyəti tərəfindən İddiaçı ödənilməsi tələb edilir. Ona görə də, İddiaçı cavabdeh "xxxx" Açıq Səhmdar Cəmiyyətinə qarşı cavabdeh "xxxx" Açıq Səhmdar Cəmiyyətinin 23 avqust 2022-ci il tarixli, 029699 saylı aktının ləğv edilməsi və həmin akta əsasən İddiaçı abonent hesabına (abonent kodu: **********0) əlavə edilmiş borcun silinməsi barədə məhkəmədə iddia qaldırmışdır. İddiaçı 23 avqust 2022-ci il tarixli, 029699 saylı aktı mübahisələndirərək həmin aktın əsaslı olmadığını tələb etsə də, o tələbinin əsası kimi istinad etdiyi halı məhkəmədə qismən sübut edə bilmişdir. Digər tərəfdən də, məhkəmə tərəflər arasındakı hazırkı münasibətlər üzrə sübutları qiymətləndirən zaman əsaslı şübhələr yaratmayan sübut standartını qəbul edərək hesab edir ki, sübut kifayət qədər inandırıcı, aydın və bir-birinə uyğun gələn məntiqi nəticələrin və ya faktlarla bağlı oxşar, təkzib edilməyən ehtimalların mövcudluğundan irəli gəlməlidir. Belə ki, hər bir tərəf məhkəmədə öz tələb və etirazlarının əsası kimi istinad etdiyi halları sübut etməli və məhkəmə də yalnız tərəflərin təqdim etdiyi sübutları araşdırmalı və onlardan istifadə etməlidir. Məhkəmə yalnız əsaslı şübhə yaratmayan sübutları qəbul edir ki, onun əsaslılığı hər hansı bir hal ilə təkzib edilməsin. İşdə olan çıxarışla müəyyən edildi ki, abonent İddiaçı 23 avqust 2022-ci il tarixli, 029699 saylı akta əsasən 707 manat sərfiyyat hesablanmışdır. Lakin məhkəmə araşdırası zamanı müəyyən edildi ki, elektrik sayğacı İddiaçı təqsiri üzündən zədələndiyi təqdirdə və ya elektrik enerjisindən qanunsuz istifadə hallarında itirilmiş elektrik enerjisinin bərpası üzrə hesablanmış sərfiyyatın neçə gün müddətinə və ya itirilmiş elektrik enerjisinin dəyərinin nə qədər pul məbləği ilə hesablanmasına dair hər hansı müqavilə tərəflər arasında bağlanmamışdır. Göründüyü kimi, cavabdeh "xxxx" Açıq Səhmdar Cəmiyyətinin 23 avqust 2022-ci il tarixli, 029699 saylı aktının əsaslı olması sübut edilsə də, itirilmiş elektrik enerjisinin dəyəri qismən sübut edilmişdir. Azərbaycan Respublikası Mülki Prosessual Məcəlləsinin 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Həmin Məcəllənin 80-cı maddəsinə əsasən məhkəmə işin gedişində təqdim olunmuş ancaq o sübutları qəbul edir və nəzərə alır ki, onlar işdə tərəflərin tələblərini müəyyən edən faktlarla və hallarla əlaqədardır. Həmin Məcəllənin 217.4-cü maddəsinə məhkəmə öz qətnaməsini yalnız məhkəmə iclasında tədqiq olunmuş sübutlarla əsaslandırır. Şərh olunanları nəzərə alaraq məhkəmə belə nəticəyə gəlir ki, iddia qismən təmin edilməli, cavabdeh "xxxx" Açıq Səhmdar Cəmiyyəti tərəfindən tərtib edilmiş 23 avqust 2022-ci il tarixli, 029699 saylı akt əsasında İddiaçı abonent hesabına (abonent kodu: **********0) əlavə edilmiş itirilmiş elektrik enerjisinin bərpası üzrə hesablanmış 681 manat borc 70 manatadək azaldılmalı, iddia qalan hissədə təmin edilməməlidir. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 216-220, 227, 233 və 360-cı maddələrini rəhbər tutaraq, məhkəmə Q ə t e t d i: İddia qismən təmin edilsin. Cavabdeh "xxxx" Açıq Səhmdar Cəmiyyəti tərəfindən tərtib edilmiş 23 avqust 2022-ci il tarixli, 029699 saylı akt əsasında İddiaçı abonent hesabına (abonent kodu: **********0) əlavə edilmiş itirilmiş elektrik enerjisinin bərpası üzrə hesablanmış 707 manat borc 70(yetmiş) manatadək azaldılsın. İddia qalan hissədə təmin edilməsin. Qətnamədən rəsmi qaydada verildiyi gündən 1 (bir) ay müddətində Saatlı Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər. Hakim: Mirlətif Sadıqov