Salyan Rayon Məhkəməsi Qətnamə — İş №2(057)-276/2023

Azərbaycan Respublikası adından QƏTNAMƏ Salyan rayon İş № 2(057)-276/2023 07.02.2023 SALYAN RAYON MƏHKƏMƏSİ Məhkəmənin hakimi Ağarza Hacırza oğlu Səmədovun sədrliyi, Məhkəmə iclas katibi Asif Xanoğlan oğlu Zamanovun katibliyi, İddiaçı iştirakı ilə İddiaçı əsassız hesablanmış borcun silinməsi tələbi barədə mülki işə açıq məhkəmə iclasında baxaraq, MÜƏYYƏNETDİ: İddiaçı rayon məhkəməsinə verdiyi iddia ərizəsində elektrik enerjisindən istifadə qaydalarının pozulması haqqında tərtib edilmiş 029702 saylı, 26 avqust 2022-ci il tarixli aktın ləğv edilməsi və akt əsasında əsassız hesablanmış 704.83 manat borcun silinməsi barədə qənamə çıxarılmasını xahiş etmişdir. İddiaçı qismində məhkəmədə izahat verən İddiaçı bildirmişdir ki, abonent kimi işıq idarəsində atanın adını səhvən İmanqulu kimi qeyd olunmuşdur.Lakin elektrik enerjisindən özü istifadə edir və abonent kimi də elektrik enerjisinin haqqını özü ödəyir. 26 avqust 2022-ci il tarixdə "xxxx" ASC-nin Salyan rayonu üzrə idarəsi tərfindən yaşadığı Salyan rayonu, Arbatan kəndindəki ünvana onun və ailə üzvlərinin xəbəri olmadan 704.36 manat dəyərində borc yazılmışdır. Sayğac "xxxx" ASC-nin işçiləri tərəfindən küçəyə qutu daxilinə qurulmuşdur. Xətt yenilənmiş və xüsusi möhürlə möhürlənmişdir. Tərtib olunmuş aktdan onun və ailə üzvlərinin xəbəri olmamış və heç bir şahid yoxdur. Bu hal aktın tam əsassız olmasına sübutdur. İdarə tərəfindən quraşdırılmış sayğac necə quraşdırılıbsa elədir və istismara tam yararlıdır. Evdə işıq enerjisindən qeyri-qanuni istifadə halı heç vaxt olmamışdır. Nəzarətçi demək olar ki, hər 15-20 gündən bir sayğaca baxış keçirir. Aktda qeyd olunan nöqsanın nə olduğu ona bugünə kimi məlum deyil. İşıq idarəsinin əməkdaşlarından bu barədə soruşanda həmin hal nəticəsində 110-120kv gücündə enerji əldə olunduğunu bildirmişlər. Evində həmin güclə işləyən məişət cihazı yoxdur. Odur ki, verilmiş iddianın təmin olunması barədə qətnamə çıxarılmasını xahiş etdi. Məhkəmə iclasının yeri və vaxtı barədə lazımi qaydada məlumat verilmiş, lakin cavabdehin nümayəndəsi məhkəmə iclasına gəlməmiş, gəlməməsinin səbəbləri barədə məhkəməyə məlumat verməmişdir. Ona görə də məhkəmə sonuncunun iştirakı olmadan işə Azəbaycan Respublikası MPM-nin 185.5-ci maddəsinə əsasən baxmağı mümkün hesab etmişdir. Məhkəmədə elan olunmuş abunə haqqında məlumat vərəqəsindən görünür ki, İddiaçı 26 avqust 2022-ci il tarixli, 029702 saylı akta əsasən 704.83 manat borc hesablanmışdır. Məhkəmədə elan olunmuş xx.xx.2022-ci il tarixli, 029702 saylı aktın surətindən görünür ki, abonent İddiaçı sayğacına baxış keçirən zaman məlum olmuşdur ki, kənar məmbədən sıfır xətti götürməklə sayğacın sxemdən kənarlaşdırıldığı aşkarlanmışdır. Məhkəmə iddiaçını dinləyib, araşdırılmış sübutlara obyektiv qiymət verərək belə hesab edir ki, iddia təmin olunmalıdır. Belə ki, məhkəmə baxışı zamanı aydın olmuşdur ki, cavabdeh təşkilat abonentin elektrik sayğacına kənar xətt daxil etməsini göstərmiş, lakin onun kənar xətdən istifadə etməsini sübut edən hallar barədə məhkəməyə sübut təqdim etməmişdir. Cavabdeh təşkilat abonent barəsində elektrik enerjisindən istifadə qaydalarını pozması barədə akt tərtib edərkən abonentin iştirakı təmin edilməmişdir. Cavabdeh təşkilat iddiaçının hüquq pozuntusu törətməsi barədə məhkəməyə heç bir sübüt təqdim etməmiş, baş vermiş hüquq pozuntusunun nəticəsi ilə abonentin hərəkətləri arasında səbəbli əlaqənin olub olmaması müəyyən olunmamışdır.İddiaçı qeyd olunan pozuntunu etiraf etməmiş, cavabdeh təşkilat da həmin halın abonent tərəfindən yol verilməsini sübuta yetirməmişdir. Ona görə də məhkəmə iddianın təmin olunması barədə qətnamə çıxarılmasını daha əsaslı hesab etmişdir. Azərbaycan Respublikası Mülki Məcəlləsinin 1096.1-ci maddəsində qeyd olunmuşdur ki,mülki hüquq pozuntusu (delikt) hüquqla və ya qanunla müdafiə edilən başqa şəxsə (zərərçəkənə) birbaşa ziyan və ya zərər vurulmasına gətirib çıxaran təqsirli, hüquqa zidd (mülki qanunvericiliyin normalarını pozan) əməldir (hərəkət və ya hərəkətsizlikdir). 1096.2. Delikt törətmiş şəxs mülki hüquq məsuliyyəti daşıyır. Qanunvericiliyin məzmunundan aydın olur ki, mülki hüquq pozuntusu törətmiş şəxsin hərəkətlərində qanunla müdafiə edilən başqa şəxsə (zərərçəkənə) birbaşa ziyan və ya zərər vurulmasına gətirib çıxaran təqsirli, hüquqa zidd (mülki qanunvericiliyin normalarını pozan) əməl olmalıdır. Belə ki, Azərbaycan Respublikası Nazirlər Kabinetinin 2005-ci ilin 02 fevral tarixli, 18 nomrəli qərarı ilə təsdiq edilmiş «Elektrik enerjisindən istifadə Qaydaları»nın 8.33-ci maddəsinə əsasən, məişət abonenti tərəfindən elektrik enerjisindən istifadədə pozuntuya yol verildiyi aşkar edildikdə, enerji təchizat muəssisənin numayəndəsi onun və iki nəfər hal şahidinin iştirakı ilə akt tərtib edib və aktın bir nusxəsinin məişət abonentinə verir. Azərbaycan Respublikasının MPM-nin 14.2-ci maddəsinə əsasən məhkəmə yalnız tərəflərin təqdim etdiyi sübutları araşdırmalı və onlardan istifadə etməlidir. Azərbaycan Respublikasının MPM-nin 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Azərbaycan Respublikasının MPM-nin 217.4-cü maddəsinə əsasən məhkəmə öz qətnaməsini yalnız məhkəmə iclasında tədqiq olunmuş sübutlarla əsaslandırır. Şərh olunanlara əsasən və Azərbaycan Respublikasının MPM-nin 213-214,216- 220,227,233,357-ci maddələrini rəhbər tutaraq məhkəmə QƏTETDİ: İddia təmin edilsin. "xxxx" ASC-nin 26 avqust 2022-ci il tarixli, 029702 saylı aktı ləğv edilsin və əsassız yazılmış 704.83 manat borc silinsin. Qətnamə rəsmi qaydada verildiyi gündən bir ay müddətinə Salyan Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər. Sədrlik edən: Ağarza Səmədov