Cəlilabad Rayon Məhkəməsi Qətnamə — İş №2(073)-1167/2025

Azərbaycan Respublikası adından QƏTNAMƏ Cəlilabad rayonu İş № 2(073)-1167/2025 09.09.2025 CƏLİLABAD RAYON MƏHKƏMƏSİ Hakim Əmirəliyev Elxan Əli oğlunun sədrliyi, Əliyev Elməddin Fizuli oğlunun katibliyi, Ərizəçi nümayəndəsi X4 iştirakı ilə, Ərizəçi şəxsin fəaliyyət qabiliyyəti olmayan hesab edilməsi tələbinə dair mülki işə Cəlilabad Rayon Məhkəməsinin binasında, məhkəmə iclas zalında, açıq məhkəmə iclasında baxaraq, Müəyyən etdi: Ərizəçi ərizə ilə məhkəməyə müraciət edərək, 24 oktyabr 2006-cı il tarixdə İran İslam Respublikasının Qum şəhərində anadan olmuş X1 fəaliyyət qabiliyyətli olmayan şəxs hesab edilməsinə dair qətnamə çıxarılmasını məhkəmədən xahiş etmişdir. Məhkəmə iclasında Ərizəçi nümayəndəsi X6 ərizəni müdafiə edərək verdiyi izahatında bildirdi ki, Ərizəçi onun arvadı və X5 isə oğludur. X5 24 oktyabr 2006-cı ildə İran İslam Respublikasının Qum şəhərində doğulmuşdur. Anadangəlmə qüsurludur, 1-ci qrup əlildir. Ağır dərəcəli əqli geriliyi vardır. Nə qədər müalicət etdirsələr də, sağalmamışdır. Hazırda da arabir xəstəliyi tutur və çox pis vəziyyətə qalır. Bu vəziyyət getdikcə ağırlaşmaqdadır. Onlar bir valideyn kimi Mirməhdinin taleyindən çox nigarandırlar. Mirməhdi Ağayev etdiyi hərəkətlərin mənasını anlamır, ətrafların hərəkət funksiyanının kəskin təzahürü pozulması xəstəliyi müşaiyət olunur. Qeyd olunanların nəzərə alınaraq ərizənin təmin edilməsinə dair qətnamə çıxarılmasını xahiş etdi. İşə baxılmanın vaxtı və yeri haqqında lazımi qaydada məlumat verilməsinə baxmayaraq maraqlı şəxs Cəlilabad rayon İcra Hakimiyyəti yanında Qəyyumluq və Himayəçilik Orqanının nümayəndəsi məhkəmə iclasına gəlməmiş və gəlməməsinin səbəbləri barədə məlumat verməmişdir. Məhkəmə, işə maraqlı şəxsin nümayəndəsinin iştirakı olmadan baxılmasını mümkün hesab etmişdir. Məhkəmə ərizəçinin izahatını dinləyib, işdə olan sənədləri və digər iş materiallarını tam və hərtərəfli araşdırıb hesab edir ki, ərizəçinin tələbi əsaslı olduğundan təmin edilməlidir. Belə ki, işdə olan Maraqlı şəxs tərəfindən verilmiş 05 mart 2025-ci il tarixli, 268/12 saylı arayışdan görünür ki, X7 ilə Ərizəçi nikahlarını 14 avqust 1997-ci il tarixdə bağlamışlar və bu barədə nikahın bağlanması haqqında akt qeydləri kitabında 51 saylı qeydiyyat aparılmışdır. İşdə olan Maraqlı şəxs tərəfindən verilmiş 05 mart 2025-ci il tarixli, 267/12 saylı arayışdan görünür ki, X5 24 oktyabr 2006-cı il tarixdə İran İslam Respublikasının Qum şəhərində anadan olmuşdur. Bu barədə 03 fevral 2016-cı il tarixdə Tehran Səfirlikdə 03 nömrəli doğum haqqında akt qeydi tərtib olunmuşdur. X3, anası Ərizəçidır. İşdə olan Azərbaycan Respublikası Əmək və Əhalinin Sosial Müdafiəsi Nazirliyi Tibbi-Sosial Ekspert Komissiyasında sonuncu müayinəyə dair məlumatın verilməsi barədə 31 yanvar 2025-ci il tarixli çıxarışdan görünür ki, 24 oktyabr 2006-cı il təvəllüdlü X5 “F72.1 ağır dərəcəli əqli gerilik, qulluq və müalicə tələb edən ciddi davranış pozuntusu ilə İQ-41” diaqnozu ilə əmək qabiliyyəti olmayan, müddətsiz birinci dərəcəli əlildir. İşdə olan Azərbaycan Respublikası Səhiyyə Nazirliyi “Məhkəmə Psixiatrik Ekspteriza Mərkəzi” X12 tərəfindən verilmiş 05 iyun 2025-ci il tarixli, 1834 saylı rəyindən görünür ki, X2 ağır dərəcəli əqli gerilik davranış pozuntuları ilə aşkar olunmuş, psixi vəziyyətinə görə öz hərəkətlərinin mənasını dərk etmək və onları idarə etmək iqtidarına malik deyildir, psixi vəziyyətinə görə fəaliyyət qabiliyyəti olmayan şəxs hesab edilməlidir. Beləliklə, məhkəmə iclasında araşdırılmış sübutlarla müəyyən olundu ki, X3, anası Ərizəçi olmaqla X5 24 oktyabr 2006-cı il tarixdə doğulmuşdur. X5 “F72.1 ağır dərəcəli əqli gerilik, qulluq və müalicə tələb edən ciddi davranış pozuntusu ilə İQ-41” diaqnozu ilə əmək qabiliyyəti olmayan, müddətsiz birinci dərəcəli əlildir və kənar şəxsin qulluğuna ehtiyacı vardır. Buna görə də X5 fəaliyyət qabiliyyəti olmayan şəxs hesab edilməlidir. Azərbaycan Respublikası Mülki Prosessual Məcəlləsinin 88-ci maddəsinə görə məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli olan hüquq normalarına müvafiq olaraq qiymət verir. Azərbaycan Respublikası Mülki Məcəlləsinin 28.8-ci maddəsinə əsasən ağıl zəifliyi və ya ruhi xəstəlik nəticəsində öz hərəkətlərinin mənasını başa düşməyən və ya öz hərəkətlərinə rəhbərlik edə bilməyən şəxslər də məhkəmə tərəfindən fəaliyyət qabiliyyəti olmayana sayıla bilər. Onlar üzərində qəyyumluq müəyyənləşdirilir. Azərbaycan Respublikası Mülki Prosessual Məcəlləsinin 317.2-ci maddəsinə görə məhkəmədə psixi qüsurlarına görə şəxsin fəaliyyət qabiliyyəti olmayan hesab edilməsi haqqında iş, ailə üzvlərinin birgə yaşamasından asılı olmayaraq yaxın qoyumların (valideyinlərin, uşaqların, qardaş-bacıların), müvafiq icra hakimiyyəti orqanının, psixatriya (psixonevroloji) müəssisənin ərizəsi üzrə qaldırıla bilər. Həmin Məcəllənin 321.2-ci maddəsinə əsasən şəxsin fəalliyət qabiliyyəti olmayan hesab edilməsinə dair məhkəmə qətnaməsi fəaliyyət qabiliyyəti olmayan hesab edilən şəxs üzərində qəyyum təyin etmək üçün əsasdır. Beləliklə, məhkəmə hesab edir ki, X5 öz psixi vəziyyətinə görə hərəkətlərinin mənasını dərk etmək və onları idarə etmək iqtidarında olmadığından fəaliyyət qabiliyyəti olmayan şəxs hesab edilməlidir. Azərbaycan Respublikası Mülki Prosessual Məcəlləsinin 216-220, 227, 233, 320, 321, 360-cı maddələrini rəhbər tutaraq, məhkəmə… Qət etdi: Ərizə təmin edilsin. 24 oktyabr 2006-cı il tarixdə İran İslam Respublikasının Qum şəhərində anadan olmuş X5 fəaliyyət qabiliyyəti olmayan şəxs hesab edilsin. Qətnamədən rəsmi qaydada verildiyi gündən 1 (bir) ay müddətində Cəlilabad Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər. Məhkəmə qətnaməsindən şikayət verilməmişdirsə, qəbul edildiyi gündən 1 (bir) ay keçdikdən sonra qanuni qüvvəyə minir. Hakim: Elxan Əmirəliyev