Şamaxı Rayon Məhkəməsi Qərardad — İş №2(074)-865/2021

Azərbaycan Respublikası adından QƏRARDAD Şamaxı rayonu İş № 2(074)-865/2021 17.07.2021 ŞAMAXI RAYON MƏHKƏMƏSİ Şamaxı rayon Məhkəməsinin hakimi İsmayılov Natiq Əvəz oğlu, Ərizəçi İddiaçı cavabdeh "xxxx" ASC-nin Nəzarət Departamenti Satışa Nəzarət İdarəsinin Şamaxı rayon şöbəsinə qarşı “aktın etibarsız hesab olunması” tələbinə dair ərizəsini və ona əlavə edilmiş sənədləri nəzərdən keçirib MÜƏYYƏN ETDİ: Ərizəçi İddiaçı cavabdeh "xxxx" ASC-nin Nəzarət Departamenti Satışa Nəzarət İdarəsinin Şamaxı rayon şöbəsinə qarşı “aktın etibarsız hesab olunması” tələbinə dair ərizə ilə məhkəməyə müraciət etmişdir. Məhkəmə ərizəni və ona əlavə edilmiş sənədləri araşdıraraq hesab edir ki, iddia ərizəsinin qanunla müəyyən olunmuş məzmununa riayət edilmədiyindən, ərizə və ona əlavə edilmiş sənədlər geri qaytarılmalıdır Belə ki, “ərizənin” məzmunundan görünür ki, ərizəçi barəsində tərtib edilmiş aktın etibarsız hesab olunmasını xahiş etmişdir. Halbuki Azərbaycan Respublikası Mülki Prosessual Məcəlləsinin 46-cı maddəsinə əsasən tərəflər, üçüncü şəxslər, ərizəçilər, maraqlı şəxslər, pozulmuş və ya barəsində mübahisə edilən hüquqlarının müdafiəsi üçün məhkəməyə müraciət etmək hüququ olan ictimai təşkilatlar, dövlət orqanları və digər orqanlar işdə iştirak edən şəxslərdir. Həmin Məcəllənin 50.1-ci maddəsinə əsasən prosesdə tərəflər iddiaçı və cavabdeh hesab edilirlər. Həmin Məcəllənin 50.2-ci maddəsinə əsasən özünün və ya başqasının mənafeyi naminə iddia qaldırmış fiziki və hüquqi şəxslər, habelə dövlət idarə və təşkilatlarının və ya təsisçisi dövlət və ya dövlət idarəsi, yaxud təşkilatı olan hüquqi şəxslərin müvafiq müraciəti olduğu hallarda dövlət mənafeyinin müdafiəsi üçün iddia qaldırmış prokuror iddiaçılar hesab edilirlər. Qeyd olunan prosessual hüquq normalarına əsasən, iddia icraatı qaydasında baxılan işlərdə “ərizəçi” olmur, həmin işlərdə proses iştirakçıları qismində iddiaçı və cavabdeh iştirak edirlər və iddiaçının tələbi “iddia ərizəsi”ndə göstərilməlidir. Lakin, İddiaçı tərəfindən verilmiş ərizədə aktın etibarsız hesab olunması xahiş olunsa da, ərizə xüsusi icraatda olduğu kimi “ərizə” kimi verilmiş, ərizədə İddiaçı “ərizəçi”, "xxxx" ASC-nin Nəzarət Departamenti Satışa Nəzarət İdarəsinin Şamaxı rayon şöbəsi isə “cavabdeh” qismində göstərilmişdir. İddia ərizəsinin mümkünlüyündən bəhs edən Azərbaycan Respublikası Mülki Prosessual Məcəlləsinin 151.1-ci maddəsinə əsasən, iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. Həmin Məcəllənin 152.1.1-ci maddəsinin tələbinə görə ərizənin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim ərizəsini və ona əlavə edilmiş sənədləri geri qaytarır. Həmin Məcəllənin 152.4-cü maddəsinin tələbinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Məhkəmə hesab edir ki, qanunvericiliyin göstərilən tələblərinə əməl edilmədiyi üçün ərizə və ona əlavə olunmuş sənədlər geri qaytarılmalı və göstərilən nöqsanlar aradan qaldırıldıqdan sonra İddiaçı ikinci dəfə məhkəməyə müraciət etmək hüququ izah olunmalıdır. Qeyd olunanlara əsasən və Azərbaycan Respublikasının Mülki Prosessual Məcəlləsinin 149, 152, 263-264, və 267-268-ci maddələrini rəhbər tutaraq, QƏRARA ALDİ: Ərizəçi İddiaçı cavabdeh "xxxx" ASC-nin Nəzarət Departamenti Satışa Nəzarət İdarəsinin Şamaxı rayon şöbəsinə qarşı “aktın etibarsız hesab olunması” tələbinə dair ərizəsi və ona əlavə edilmiş sənədlər geri qaytarılsın. Qərardaddan rəsmi qaydada verildikdən sonra 10 gün müddətində Şamaxı rayon Məhkəməsinə şikayət verilə bilər. Sədrlik edən: Natiq İsmayılov