Bakı Apellyasiya Məhkəməsi Qərardad — İş №2(103)-8956/2021

Azərbaycan Respublikası adından QƏRARDAD Bakı şəhəri İş № 2(103)-8956/2021 18.08.2021 BAKI APELLYASİYA MƏHKƏMƏSİ hakimlər Elnur Məmmədsaat oğlu Həsənovun sədrliyi və məruzəsi, Mərdanova Xumar Afət qızından və Babayev Fuad Fikrət oğlundan ibarət tərkibdə Dadaşova Ülkər Nazim qızının katibliyi ilə İddiaçı Cavabdeh İB-nə qarşı “borcun silinməsi” tələbinə dair mülki iş üzrə Bakı şəhəri Xətai Rayon Məhkəməsinin 19 mart 2021-ci il tarixli qətnaməsindən cavabdehin nümayəndəsi tərəfindən verilmiş apellyasiya şikayəti üzrə apellyasiyanın mümkünlüyünü açıq məhkəmə iclasında yoxlayaraq MÜƏYYƏN ETDİ: İddiaçı Cavabdeh İB-nə qarşı “borcun silinməsi” tələbi Bakı şəhəri Xətai Rayon Məhkəməsinin 19 mart 2021-ci il tarixli qətnaməsi ilə qismən təmin olunmuş, İddiaçı qaz sərfiyyatına görə hesablanmış 2795,40 manat borcun silinməsi, 30 manat dövlət rüsumunun Cavabdeh İB-dən alınıb Dövlət büdcəsinə ödənilməsi qət edilmişdir. İş materiallarından görünür ki, həmin qətnamə 12 aprel 2021-ci il tarixdə tərəflərə, o cümlədən Cavabdeh İB-nə göndərilmiş, işin 52-ci səhifəsinə yapışdırılmış (nömrələnməmiş) poçt xəbərnaməsinə görə 19.04.2021-ci il tarixdə adı çəkilən Birliyə çatdırılmış, onun 26.05.2021-ci il tarixdə dövlət rüsumu ödəməklə 01.06.2021-ci il tarixdə Bakı şəhəri Xətai Rayon Məhkəməsinə ünvanladığı apellyasiya şikayəti 02.06.2021-ci il tarixdə həmin məhkəməyə daxil olmuşdur. Azərbaycan Respublikası Mülki-Prosessual Məcəlləsinin 360-cı maddəsinə əsasən, apellyasiya şikayəti məhkəmə qətnaməsi rəsmi qaydada verildiyi gündən 1 ay müddətində verilə bilər. Yuxarıda qeyd olunanlardan göründüyü kimi, cavabdehin qətnamədən şikayət vermə müddətinin son günü 20.05.2021-ci il tarixi olmuş, lakin onun şikayəti müddət ötürülməklə birinci instansiya məhkəməsinə ünvanlanmışdır. Belə olan halda kollegiya hesab edir ki, apellyasiya qeyri-mümkün hesab edilməli və mülki iş birinci instansiya məhkəməsinə qaytarılmalıdır. Nəzərə alınmalıdır ki, Mülki Prosessual Məcəllənin 130.3-cü maddəsinə əsasən prosessual müddətin bərpa olunması barədə vəsatət verilməmişsə, prosessual müddətlər keçdikdən sonra verilən şikayətlərə və sənədlərə baxılmır və onları verən şəxsə qaytarılır. Həmin Məcəllənin 363.1.3-cü maddəsinə görə isə apellyasiya şikayəti müəyyən edilmiş müddət keçdikdən sonra verilmişdirsə birinci instansiya məhkəməsi tərəfindən geri qaytarılır. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 366-cı maddəsini rəhbər tutaraq məhkəmə kollegiyası QƏRARA ALDİ: İddiaçı Cavabdeh İB-nə qarşı “borcun silinməsi” tələbinə dair mülki iş üzrə Bakı şəhəri Xətai Rayon Məhkəməsinin 19 mart 2021-ci il tarixli qətnaməsindən cavabdehin nümayəndəsi tərəfindən verilmiş apellyasiya şikayəti üzrə apellyasiya qeyri-mümkün hesab edilsin və mülki iş, apellyasiya şikayətinin vaxtında verilib-verilmədiyi məsələsinə qiymət verilməsi üçün həmin məhkəməyə göndərilsin. Qərardaddan rəsmi qaydada verildiyi gündən 10 (on) gün müddətində Bakı Apellyasiya Məhkəməsi vasitəsilə Azərbaycan Respublikasının Ali Məhkəməsinə kassasiya şikayəti verilə bilər. Sədrlik edən hakim Elnur Həsənov Hakimlər Xumar Mərdanova Fuad Babayev