Bakı Şəhəri Binəqədi Rayon Məhkəməsi Qərardad — İş №e-2(001)-4241/2025

Azərbaycan Respublikası adından QƏRARDAD Bakı şəhəri İş № e-2(001)-4241/2025 23.05.2025 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi X1, İddiaçı “İri Şəhərlərin Birləşdirilmiş Su Təchizatı Xidməti” publik hüquqi şəxsinin Cavabdeh qarşı kiçik iddialara dair işlər üzrə sadələşdirilmiş icraat qaydasında “kommunal xidmətə görə borcun tutulması” tələbinə dair ərizəsini Bakı şəhəri Binəqədi Rayon Məhkəməsinin binasında nəzərdən keçirərək, MÜƏYYƏNETDİ: İddiaçı “İri Şəhərlərin Birləşdirilmiş Su Təchizatı Xidməti” publik hüquqi şəxs Cavabdeh qarşı kiçik iddialara dair işlər üzrə sadələşdirilmiş icraat qaydasında “kommunal xidmətə görə borcun tutulması” tələbinə dair iddia ərizəsi ilə məhkəməyə müraciət etmişdir. Azərbaycan Respublikası MPM-nin 151.1-ci maddəsinə əsasən iddia ərizəsinin həmin Məcəllənin tələblərinə riayət edilməklə verilməsi yoxlanılmalıdır. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsi və ona əlavə edilmiş sənədlər geri qaytarılmalıdır. Belə ki, Azərbaycan Respublikası MPM-nin: - 284-2-ci maddəsinə əsasən, kiçik iddialara dair işlərdə ərizə bu Məcəllənin 4-cü fəslində müəyyən edilmiş ümumi aidiyyət qaydalarına əsasən verilir. - 284-3.5-ci bəndinə əsasən, ərizənin bu Məcəllənin 284-3.1-ci və 284-3.2-ci maddələri ilə müəyyən olunmuş formasına və məzmununa riayət edilmədikdə, yaxud bu Məcəllənin 152.1.2-152.1.9-cu maddələrində müəyyən edilmiş əsaslar olduqda hakim iddia ərizəsini və ona əlavə olunmuş sənədləri geri qaytarır. Ərizənin qaytarılması həmin nöqsanlar aradan qaldırıldıqdan sonra kiçik iddialar üzrə sadələşdirilmiş icraat qaydasında yenidən məhkəməyə müraciət etməyə mane olmur. - 152.1.5-ci maddəsinə əsasən iddia ərizəsinə müəyyən edilmiş qaydada və məbləğdə dövlət rüsumunun ödənilməsini təsdiq edən sənəd əlavə edilməlidir. Göründüyü kimi, iddiaçı məhkəməyə təqdim etdiyi iddia ərizəsinə müəyyən edilmiş qaydada və məbləğdə dövlət rüsumunun ödənilməsini təsdiq edən sənədi əlavə etsə də, həmin sənəddən görünür ki, iş materiallarına köhnə, yəni 2021-ci il tarixli hər biri 20 manat olmaqla 2 ədəd dövlət rüsumu əlavə edilmişdir. Həmçinin iş materiallarından görünür ki, “İri Şəhərlərin Birləşdirilmiş Su Təchizatı Xidməti” publik hüquqi şəxsi tərəfindən iş materiallarına əlavə edilmiş Elektron Məhkəmə Sistemindən əldə edilmiş xx.xx.2021-ci il tarixli rüsumların istifadə olunmaması qeyd olunmuşdur. Bununla əlaqədar məhkəmə bildirir ki, 2021-ci il tarixdə iddia ərizələri məhkəməyə elektron qaydada deyil, adi qaydada təqdim edilirdi. Həmin dövrdə iddia tələblərinə əlavə edilmiş rüsumlar elektron qaydada məhkəmələrdə qeydiyyatdan keçmədiyi üçün onların istifadə edilib-edilməməsini müəyyən etmək mümkün deyil. Bu səbəbdən də məhkəmə hesab edir ki, həmin rüsumlar 2021-ci il tarixdə qaldırılmış hər hansı bir iddia tələbi ilə bağlı ödənildiyindən, hazırkı iş üzrə həmin rüsumlar ödənilməmiş sayılır. Bununla da dövlət rüsumu hazırkı iş üzrə düzgün ödənilmədiyi üçün iddia ərizəsi və ona əlavə edilmiş sənədlər geri qaytarılmalı, iddiaçıya Azərbaycan Respublikası MPM-nin 152.4-cü maddəsinin tələbləri izah olunmalıdır. Şərh olunanlara əsaslanaraq və Azərbaycan Respublikası MPM-nin 263-cü və 264cü maddələrini rəhbər tutaraq, məhkəmə QƏRARAALDİ: İddiaçı “İri Şəhərlərin Birləşdirilmiş Su Təchizatı Xidməti” publik hüquqi şəxsinin Cavabdeh qarşı kiçik iddialara dair işlər üzrə sadələşdirilmiş icraat qaydasında “kommunal xidmətə görə borcun tutulması” tələbinə dair iddia ərizəsi geri qaytarılsın. İddiaçıya izah olunsun ki, Azərbaycan Respublikası MPM-nin 152.4-cü maddəsinə əsasən ərizənin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra 10 (on) gün müddətində “Elektron məhkəmə” informasiya sistemində yaradılan elektron kabinet vasitəsilə Bakı şəhəri Binəqədi Rayon Məhkəməsinə şikayət verilə bilər. Sədrlik edən Lətifə Məmmədova