Bakı Şəhəri Binəqədi Rayon Məhkəməsi Qətnamə — İş №e-2(001)-7082/2024

Azərbaycan Respublikası adından QƏTNAMƏ Bakı şəhəri İş № e-2(001)-7082/2024 16.12.2024 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Məmmədov Pərviz Şahin oğlu, İddiaçı MMC-nin cavabdeh Fərəcova (Əliyeva) Fərzanə Rövşən qızına qarşı “borcun ödənilməsi” tələbinə dair sadələşdirilmiş iddia ərizəsinə yazılı icraat qaydasında baxaraq, məhkəmə müəyyən etdi: İddiaçı MMC cavabdeh Fərəcova (Əliyeva) Fərzanə Rövşən qızına qarşı “borcun ödənilməsi” tələbinə dair iddia ərizəsi ilə məhkəməyə müraciət edərək, iddia ərizəsində göstərmişdir ki, Cavabdeh İddiaçı MMC ilə müddəti 18 ay olmaqla xx.xx.2020-ci il tarixli, MPK5751950-M saylı borc müqaviləsi bağlamışdır. Həmin müqaviləyə əsasən cavabdeh iddiaçıdan dəyəri 1415 manat olan məişət avadanlığı əldə etmişdir. Cavabdehin müqavilə üzrə ödənişlər etdikdən sonra iddiaçıya 810 manat əsas borcu qalmışdır. Qeyd edilən nisyə alqı-satqı müqaviləsinə əsasən borcalan (cavabdeh) müqavilə müddəti bitdikdən sonra qaytarılmayan məbləğ üçün əlavə olaraq hər gün üçün 1% faiz cərimə ödəməyi öhdəsinə götürmüşdür. Belə ki, cavabdehin iddiaçıya əsas borcdan əlavə olaraq 6804 manat cərimə borcu yaranmışdır (810 manat x 840 gün x 1%=6804 manat). İddiaçı cərimə borcunu cavabdehdən cəmi 150 manat məbləğində tələb edir. Bundan başqa, Cavabdeh İddiaçı MMC ilə müddəti 18 ay olmaqla xx.xx.2020-ci il tarixli nisyə alqı-atqı müqaviləsi bağlamışdır. Həmin müqaviləyə əsasən cavabdeh iddiaçıdan dəyəri 380 manat olan məişət avadanlığı əldə etmişdir. Cavabdehin müqavilə üzrə qismən ödənişlər etdikdən sonra iddiaçıya 130 manat borcu qalmışdır. Qeyd edilən nisyə alqı-satqı müqaviləsinə əsasən cavabdeh müqavilə müddəti bitdikdən sonra iddiaçıya qaytarılmayan məbləğ üçün əlavə olaraq hər gün üçün 1% miqdarında cərimə ödəməyi öhdəsinə götürmüşdür. Belə ki, cavabdehin iddiaçıya əsas borcdan əlavə olaraq 1092 manat cərimə borcu yaranmışdır (130 manat x 840 gün x 1%=1092 manat). İddiaçı cərimə borcunu cavabdehdən cəmi 100 manat məbləğində tələb edir. Göstərilənləri nəzərə alaraq, hesab edirlər ki, Cavabdeh xx.xx.2020-ci il tarixli, MPK5751950-M saylı nisyə alqı-satqı müqaviləsinə əsasən 810 manat əsas borc, müqavilə üzrə hesablanmış 150 manat cərimə borcu və xx.xx.2020-ci il tarixli, MPK5751954-M saylı nisyə alqı-satqı müqaviləsinə əsasən 130 manat əsas borc, müqavilə üzrə hesablanmış 100 manat cərimə borcu, 32 manat məbləğində ödənilmiş dövlət rüsumu olmaqla, cəmi 1222 manat məbləğində pul vəsaitinin alınaraq İddiaçı MMC-yə ödənilməsi barədə qətnamə çıxarılması zəruridir. Bundan başqa, müqavilədə tərəflər arasında yaranmış mübahisənin pretenziya qaydasında həll olunması nəzərdə tutulmadığından cavabdeh tərəfə pretenziya məktubu göndərilməmişdir. İddiaçı göstərilənləri nəzərə alaraq, Cavabdeh xx.xx.2020-ci il tarixli, MPK5751950- M saylı borc müqaviləsinə əsasən 810 manat əsas, müqavilə üzrə hesablanmış 150 manat cərimə borcu və xx.xx.2020-ci il tarixli, MPK5751954-M saylı borc müqaviləsinə əsasən 130 manat əsas, müqavilə üzrə hesablanmış 100 manat cərimə borcu, 32 manat məbləğində ödənilmiş dövlət rüsumu olmaqla, cəmi 1222 manat pul vəsaitinin alınaraq, İddiaçı MMC-yə ödənilməsi barədə qətnamə qəbul edilməsini məhkəmədən xahiş etmişdir. Cavabdehin iddiaçının tələbinə dair etirazı məhkəməyə daxil olmamışdır. Məhkəmə iş materiallarını araşdıraraq hesab edir ki, iddia tələbi qismən əsaslı olduğu üçün qismən təmin edilməlidir. Belə ki, iş materiallarında olan İddiaçı MMC ilə Fərəcova (Əliyeva) Fərzanə Rövşən qızı arasında bağlanmış xx.xx.2020-ci il tarixli MPK5751954 saylı borc müqaviləsindən görünür ki, İddiaçı MMC tərəfindən Fərəcova (Əliyeva) Fərzanə Rövşən qızına ilkin olaraq 20 manat ödəməklə, 18 ay müddətinə, hər ay 20 manat ödəmək şərti ilə, dəyəri 380 manat olan məişət avadanlığı satılmışdır. İş materiallarında olan İddiaçı MMC ilə Fərəcova (Əliyeva) Fərzanə Rövşən qızı arasında bağlanılmış xx.xx.2020-ci il tarixli MPK5751950-M saylı borc müqaviləsindən görünür ki, İddiaçı MMC tərəfindən Fərəcova (Əliyeva) Fərzanə Rövşən qızına ilkin 83 manat ödəməklə, 18 ay müddətinə, hər ay 74 manat ödəmək şərti ilə, dəyəri 1415 manat olan məişət avadanlığı satılmışdır. İş materiallarında olan İddiaçı MMC tərəfindən verilmiş maliyyə arayışından görünür ki, Fərəcova (Əliyeva) Fərzanə Rövşən qızının İddiaçı MMC ilə bağlanmış xx.xx.2020-ci il tarixli MPK5751950-M saylı müqaviləyə əsasən ödənilməmiş 810 manat əsas və xx.xx.2020-ci il tarixli MPK5751954-M saylı müqaviləyə əsasən ödənilməmiş 130 manat əsas borcu olmaqla, ümumilikdə hər iki müqavilə üzrə 940 manat məbləğində əsas borcu vardır. Azərbaycan Respublikasının Mülki Məcəlləsinin 385.1-ci maddəsinə əsasən öhdəliyə əsasən bir şəxs başqa şəxsin xeyrinə müəyyən hərəkəti etməlidir və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Öhdəliyin əmələ gəlməsi üçün onun iştirakçıları arasında müqavilə olmalıdır. (maddə 386.1) Azərbaycan Respublikasının Mülki Məcəlləsinin 404.1-ci maddəsinə əsasən müqavilə şərtlərini təfsir edərkən məhkəmə təkcə müqavilədəki söz və ifadələrin hərfi mənasını deyil, həm də tərəflərin iradə ifadəsinin həqiqi mənasını, bütövlükdə müqavilənin hərfi mənasının onun digər şərtləri və mənası ilə müqayisəsini nəzərə alır. Məhkəmə qeyd etməyi zəruri hesab edir ki, tərəflər arasında olan müqavilə borc müqaviləsi adlandırılsa da, müqavilənin şərtlərindən müəyyən olunur ki, faktiki olaraq tərəflər arasında nisyə alqı-satqı müqaviləsi bağlanmışdır. Ona görə də, məhkəmə belə qənaətə gəlir ki, mövcud mübahisənin həlli zamanı hissə-hissə ödəmə şərtilə əşyanın nisyə alqı-satqı müqaviləsinin qaydaları tətbiq edilməlidir. Azərbaycan Respublikasının Mülki Məcəlləsinin 601.1-ci maddəsinə əsasən əşyanın nisyə satılması haqqında müqavilədə onun hissə-hissə ödənilməsi nəzərdə tutula bilər. Hissə-hissə ödəmə şərti ilə əşyanın nisyə satılması haqqında müqavilə o halda bağlanmış sayılır ki, alqı-satqı müqaviləsinin digər mühüm şərtləri ilə yanaşı əşyanın qiyməti, ödənişlərin qaydası, müddətləri və məbləğləri nəzərdə tutulmuş olsun. Həmin Məcəllənin 601.2-ci maddəsinə əsasən hissə-hissə ödəmə şərti ilə malın nisyə satılması haqqında müqaviləyə bu Məcəllənin 600.2-600.5-ci maddələrində nəzərdə tutulan qaydalar tətbiq edilir. Həmin Məcəllənin 600.4-cü maddəsinə əsasən əşyanı təhvil almış alıcı onu alqısatqı müqaviləsində nəzərdə tutulan müddətdə ödəmək vəzifəsini icra etmədikdə satıcı verilmiş əşyanın ödənilməsini və ya ödənilməmiş malın qaytarılmasını tələb edə bilər. Həmin Məcəllənin 442-ci maddəsinə əsasən öhdəliyin icra edilməməsi dedikdə onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. Həmin Məcəllənin 448.1-ci maddəsinə əsasən əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir. Həmin Məcəllənin 448.2-ci maddəsinə əsasən borclu öz öhdəliklərinin hər bir təqsirli pozuntusu (hərəkət və ya hərəkətsizlik) üçün məsuliyyət daşıyır. Borclunu təqsirə görə, yəni qərəzə və ya kobud ehtiyatsızlığa görə məsuliyyətdən qabaqcadan azad etmək olmaz. Beləliklə, məhkəmə hesab edir ki, cavabdeh Fərəcova (Əliyeva) Fərzanə Rövşən qızı iddiaçı ilə bağladığı xx.xx.2020-ci il tarixli MPK5751954 və xx.xx.2020-ci il tarixli MPK5751950 saylı müqavilələr üzrə üzərinə götürdüyü öhdəlikləri yerinə yetirmədiyindən və bu fakt iş materialları ilə sübut olunduğundan, cavabdehdən xx.xx.2020-ci il tarixli MPK5751950 saylı müqavilə üzrə 810 manat və xx.xx.2020-ci il tarixli MPK5751954 saylı üzrə 130 manat məbləğində əsas borc, ümumilikdə hər iki müqavilə üzrə 940 manat əsas borc tutularaq, iddiaçıya ödənilməlidir. Bununla yanaşı məhkəmə hesab edir ki, iddiaçı tərəfindən xx.xx.2020-ci il tarixli müqavilələr üzrə hesablanmış dəbbə pulu (cərimə) cavabdehin hazırda ödənilməmiş əsas borcuna münasibətdə tənasübsüz surətdə yüksək olduğundan cərimə borcunun məbləği azaldılaraq, cavabdehdən xx.xx.2020-ci il tarixli müqavilələr üzrə əsas borcun 10% miqdarında, yəni MPK5751950 saylı müqavilə üzrə 81 manat və MPK5751954 saylı müqavilə üzrə 13 manat məbləğində dəbbə (cərimə) tutulmalıdır. Beləliklə, məhkəmə belə qənaətə gəlir ki, cavabdeh Fərəcova (Əliyeva) Fərzanə Rövşən qızı İddiaçı MMC ilə bağladığı müqavilələr üzrə üzərinə götürdüyü öhdəlikləri yerinə yetirmədiyindən və bu fakt iş materialları ilə sübut olunduğundan, iddia tələbi qismən təmin edilməli, cavabdehdən xx.xx.2020-ci il tarixli MPK5751950 müqaviləyə əsasən 810 manat əsas, 81 manat cərimə borcu və xx.xx.2020-ci il tarixli MPK5751954 saylı müqaviləyə əsasən 130 manat əsas, 13 manat cərimə borcu olmaqla, ümumilikdə hər iki müqavilə üzrə 1034 manat məbləğində pul vəsaiti tutularaq, İddiaçı MMC-yə ödənilməlidir. Hazırki iş üzrə çəkilmiş məhkəmə xərcləri Azərbaycan Respublikasının Mülki Prosessual Məcəlləsinin 119.1-ci maddəsi ilə müəyyən edilmiş qaydada ödənilmiş iddia tələbinin məbləğinə mütənasib olaraq işdə iştirak edən şəxslərə aid edilməlidir. Göstərilənlərə əsasən və Azərbaycan Respublikasının Mülki Prosessual Məcəlləsinin 216-220 və 360-cı maddələrini rəhbər tutaraq, məhkəmə qət etdi: İddia tələbi qismən təmin edilsin. Cavabdeh Fərəcova (Əliyeva) Fərzanə Rövşən qızından xx.xx.2020-ci il tarixli MPK5751950 müqaviləyə əsasən 810 manat əsas, 81 manat cərimə borcu və xx.xx.2020ci il tarixli MPK5751954 saylı müqaviləyə əsasən 130 manat əsas, 13 manat cərimə borcu olmaqla, ümumilikdə hər iki müqavilə üzrə 1034 (bir min otuz dörd) manat məbləğində pul vəsaiti İddiaçı MMC-nin xeyrinə tutulsun. İddia qismən təmin edildiyi üçün iddiaçı tərəfindən ödənilmiş 32 manat dövlət rüsumunun 87%, yəni 27.80 manat cavabdehdən tutularaq iddiaçıya ödənilsin, qalan 13%, yəni 4.20 manat iddiaçıya aid edilsin. Qətnamədən onun rəsmi qaydada verildiyi gündən 1 (bir) ay müddətində Bakı şəhəri Binəqədi Rayon Məhkəməsi vasitəsilə (“Elektron məhkəmə” informasiya sistemində yaradılan elektron kabinet vasitəsilə) Bakı Apellyasiya Məhkəməsinin Mülki Kollegiyasına apellyasiya şikayəti verilə bilər. Sədrlik edən: Pərviz Məmmədov