Bakı Şəhəri Xətai Rayon Məhkəməsi Qərardad — İş №e-2(011)-1844/2023

Azərbaycan Respublikası adından QƏRARDAD Bakı şəhəri İş № e-2(011)-1844/2023 30.01.2023 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Samirə Eyvazova Əli qızı İddiaçı Cavabdeh MMC-yə qarşı cavabdehin cərimələnməsi və yazılı qaydada üzr istəməsi və belə əməllərin bir daha təkrarlanmayacağına dair yazılı qaydada iddiaçıya öhdəlik verməsi və belə öhdəliyi müvafiq binanın giriş hissəsində yayması tələbinə dair iddia ərizəsini və əlavə olunmuş sənədləri araşdırıb, MÜƏYYƏN ETDİ: İddiaçı Cavabdeh MMC-yə qarşı cavabdehin cərimələnməsi və yazılı qaydada üzr istəməsi və belə əməllərin bir daha təkrarlanmayacağına dair yazılı qaydada iddiaçıya öhdəlik verməsi və belə öhdəliyi müvafiq binanın giriş hissəsində yayması tələbinə dair iddia ərizəsi ilə məhkəməyə müraciət etmişdir. Məhkəmə iddia ərizəsini və ona əlavə edilmiş sənədləri nəzərdən keçirib hesab edir ki, iddia ərizəsi geri qaytarılmalıdır. Belə ki, Azərbaycan Respublikası Mülki Prosessual Məcəlləsinin (MPM) 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Məcəllənin 152.1.1-ci maddəsində qeyd edilir ki, iddia ərizəsinin bu Məcəllənin 149cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş sənədləri geri qaytarır. Məcəllənin 149.2.3-cü maddəsinin tələbinə əsasən, iddiaçı iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələbi öz ərizəsində göstərməlidir. Prosessual normaların tələbindən müəyyən olunur ki, iddiaçı iddia ərizəsində tələbini dəqiq və aydın göstərməli, tələbini əsaslandırdığı halları şərh etməlidir. Həmin Məcəllənin 152.1.5-ci maddəsinə əsasən müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. İddiaçı rüsumu müəyyən edilmiş məbləğdən az ödəmişdir. İddiaçının iddia ərizəsində istinad etdiyi Azərbaycan Respublikası İnzibati Xətalar Məcəlləsinin (İXM) 279-cu maddəsinə əsasən, qaz, elektrik və istilik enerjisi sahəsində qanunvericiliyin tələblərinin pozulmasına, yəni: 279.0.7. qaz, elektrik və ya istilik enerjisi xətlərinin qanunsuz olaraq kəsilməsinə və ya qanunvericilikdə istehlakçıya yazılı bildirişin göndərilməsi tələb olunan hallarda yazılı bildiriş göndərilmədən qazın, elektrik və ya istilik enerjisinin verilməsinin dayandırılmasına görə- fiziki şəxslər iki yüz manatdan dörd yüz manatadək məbləğdə, vəzifəli şəxslər min manatdan min beş yüz manatadək məbləğdə, hüquqi şəxslər iki min beş yüz manatdan üç min manatadək məbləğdə cərimə edilir. İnzibati xətalar haqqında işlərin məhkəmə aidiyyəti Azərbaycan Respublikası İXM-nin 43-cü maddəsi ilə müəyyən edilir. Bu maddənin tələblərinə əsasən, İXM-nin 279-cu maddəsi ilə nəzərdə tutulmuş inzibati xəta haqqında işlərə baxmaq rayon (şəhər) məhkəmələrinin səlahiyyətinə aid edilməmişdir. Azərbaycan Respublikası MPM-nin 24.3-cü maddəsinə əsasən, məhkəmə mübahisənin məhkəmə aidiyyəti ilə əlaqədar məsələlərini ərizənin məhkəmənin icraatına qəbul edilməsi zamanı yoxlamalıdır. İddiaçının istinad etdiyi Azərbaycan Respublikası İXM-nin maddi hüquq norması üzrə məhkəmə özünü səlahiyyətli hesab etmir. Qeyd edilən normaya görə inzibati məsuliyyətin realizə mexanizmi qanunvericilikdə fərqli təsbit edilmişdir. Qeyd olunanlara əsasən məhkəmə hesab edir ki, cavabdehə qarşı yönəlmiş tələb aydın və konkret olmadığından, dövlət rüsumu müəyyən edilmiş məbləğdə ödənilmədiyindən, ümumi məhkəmələr inzibati məsuliyyət məsələləri üzrə səlahiyyətli olmadığından hazırki iddia ərizəsi geri qaytarılmalıdır. Azərbaycan Respublikası MPM-nin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ikinci dəfə məhkəməyə müraciət etmək hüququ izah olunur. Şərh olunanlara əsaslanaraq və Azərbaycan Respublikasının MPM-nin 24, 149, 151, 152, 263-264-cü maddələrini rəhbər tutaraq, QƏRARA ALDİ: İddiaçı Cavabdeh MMC-yə qarşı cavabdehin cərimələnməsi və yazılı qaydada üzr istəməsi və belə əməllərin bir daha təkrarlanmayacağına dair yazılı qaydada iddiaçıya öhdəlik verməsi və belə öhdəliyi müvafiq binanın giriş hissəsində yayması tələbinə dair iddia ərizəsi və ona əlavə edilmiş sənədlər geri qaytarılsın. İddiaçı tərəfindən “Hökumət ödəniş portalı” vasitəsilə Bakı şəhəri Xətai Rayon Məhkəməsinin hesabına xx.xx.2023-cü il tarixdə ödənilmiş ********** qəbz nömrəli 10 manat dövlət rüsumu geri qaytarılsın. İddiaçıya hazırkı iddia ərizəsi ilə bağlı məhkəməyə ikinci dəfə müraciət etmək hüququnun olması izah olunsun. Qərardaddan, rəsmi qaydada verildikdən sonra 10 (on) gün müddətində Bakı şəhəri Xətai Rayon Məhkəməsinə şikayət verilə bilər. Hakim Samirə Eyvazova