Ağdam Rayon Məhkəməsi Qətnamə — İş №e-2(013)-1740/2025

Azərbaycan Respublikası adından QƏTNAMƏ Ağdam rayonu İş № e-2(013)-1740/2025 17.07.2025 AĞDAM RAYON MƏHKƏMƏSİ Ağdam Rayon Məhkəməsinin hakimi Məmmədov Rafiq Rəşid oğlunun sədrliyi, məhkəmə iclasının katibi Süleymanzadə Elman Seymur oğlunun katibliyi, Cavabdeh iştirakı ilə, İddiaçı Cavabdeh qarşı borc tələbinə dair iddia ərizəsi üzrə mülki işə məhkəmənin binasında, açıq məhkəmə iclasında baxaraq m ü ə y y ə n e t d i: Kreditor İddiaçı (bundan sonra - İddiaçı MMC) borclu Cavabdeh qarşı kiçik iddialara dair işlər üzrə sadələşdirilmiş icraat qaydasında iddia ərizəsi ilə məhkəməyə müraciət edərək, cavabdehdən iddiaçının xeyrinə xx.xx.2023-cü il tarixli, MPK6387828 saylı borc müqaviləsinə əsasən 2380 manat əsas borcun və xx.xx.2023-cü il tarixli, MPK6388127 saylı borc müqaviləsinə əsasən 3560 manat əsas borcun və ödənilmiş 80 manat dövlət rüsumunun, cəmi 6020 manat tutulması barədə qətnamə çıxarılmasını xahiş etmişdir. Ərizə onunla əsaslandırılmışdır ki, Cavabdeh xx.xx.2023-cü il tarixli, MPK6387828 saylı və xx.xx.2023-cü il tarixli, MPK6388127 saylı borc müqaviləsinə əsasən İddiaçı MMC-dən dəyəri 8501 manat olan məişət avadanlığı (avadanlıqları) əldə edib və borclunun müqavilə üzrə ödənişlər etdikdən sonra kreditora 5940 manat borcu qalıb. Hazırda borclunun ödəməli olduğu krediti ödəməkdən yayınması, beləliklə borclunun kredit müqaviləsinin tələblərini pozaraq üzərinə düşən öhdəliyi yerinə yetirməməsi, borclu ilə aralarında bağlanmış müqavilənin müddətinin bitməsinə baxmayaraq hazırki vaxtadək onun borcu ödənilməmişdir. Ağdam Rayon Məhkəməsinin 2(013)-1740/2025 nömrəli, xx.xx.2025-ci il tarixli qərardadı ilə qeyd olunan mülki işə iddia icraatı qaydasında baxılması qərara alınmış və məhkəmə iclasının vaxtı və yeri müəyyən edilmişdir. İddiaçı MMC-dən məhkəməyə ərizə daxil olmuş və həmin ərizədə qeyd olunan iddia ərizəsi üzrə 17 iyul 2025-ci il tarixə təyin edilmiş məhkəmə iclasında üzürlü səbəbdən iştirak edə bilməyəcəklərini, iddia tələbini müdafiə etdiklərini bildirmiş və mülki işə onların iştirak olmadan baxılmasını və müvafiq qətnamənin çıxarılmasını xahiş etmişdir. Məhkəmə baxışı iclasında iştirak edən Cavabdeh izahatında İddiaçı MMC-dən borc müqaviləsinə əsasən məişət məhsullarını, hissə-hissə ödəmək şərtilə aldığını və müqavilə şərtlərinə əsasən ödənişlərin hər ay vaxtında ödənilməsini öz öhdəsinə götürdüyünü, lakin maddi imkanının yaxşı olmaması səbəbindən borcunu ödəyə bilmədiyini, iddiaçı təşkilata olan borcunu hissə-hissə ödəməyə razı olduğunu bildirdi və iddianın qanuna uyğun həll edilməsini məhkəmədən xahiş etdi. Məhkəmə cavabdehin izahatını və çıxışını dinləyib, iş materiallarını araşdıraraq belə qənaətə gəlir ki, iddia təmin edilməlidir. Belə ki, iş materiallarında olan xx.xx.2023-cü il tarixli, MPK6387828 nömrəli «Borc müqaviləsi»ndən görünür ki, Cavabdeh İddiaçı MMC-dən hissə-hissə ödəmək şərti ilə cəmi 4217 manat məbləğində məişət avadanlığı əldə etmiş, 817 manat ilkin ödəniş etmiş, qalan 3400 manat məbləgi isə 20 ay müddətinə aylıq 170 manat olmaqla ödəməyi öz öhdəsinə götürmüşdür. İş materiallarında olan xx.xx.2023-cü il tarixli, MPK6388127 nömrəli «Borc müqaviləsi»ndən görünür ki, Cavabdeh İddiaçı MMC-dən hissə-hissə ödəmək şərti ilə cəmi 4284 manat məbləğində məişət avadanlığı əldə etmiş, 484 manat ilkin ödəniş etmiş, qalan 3800 manat məbləgi isə 20 ay müddətinə aylıq 190 manat olmaqla ödəməyi öz öhdəsinə götürmüşdür. İş materiallarında olan İddiaçı MMC tərəfindən verilmiş maliyyə arayışından görünür ki, Cavabdeh xx.xx.2024-cü il tarixinə, xx.xx.2021-ci il tarixində bağlanmış MPK6387828 saylı kredit müqaviləsi üzrə ödənilməmiş əsas (qalıq) borcu 2380 manat, xx.xx.2023-cü il tarixdə bağlanmış MPK6388127 saylı kredit müqaviləsi üzrə ödənilməmiş əsas (qalıq) borcu 3560 manat təşkil edir. Azərbaycan Respublikası Mülki Məcəlləsinin (bundan sonra- Mülki Məcəllə) 385.1-ci maddəsindən aydın olur ki, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, kreditorun isə borcludan vəzifəsinin icrasını tələb etmək hüququ vardır. Mülki Məcəllənin 425.1-ci maddəsinə müvafiq olaraq öz hüquqlarını həyata keçirərkən və vəzifələrini icra edərkən tərəflərdən hər biri vicdanlılığın tələb etdiyi tərzdə, yəni şərtləşdirilmiş vaxtda və yerdə lazımi şəkildə, öhdəliyin şərtlərinə və bu Məcəllənin tələblərinə müvafiq surətdə, belə şərtlər və tələblər olmadıqda isə işgüzar adətlərə və ya adətən irəli sürülən digər tələblərə müvafiq surətdə hərəkət etməlidir. Mülki Məcəllənin 442-ci maddəsinə əsasən öhdəliyin icra edilməməsi dedikdə, onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. Mülki Məcəllənin 567-ci maddəsinə əsasən, alğı-satqı müqaviləsinə görə satıcı əşyanı alıcının mülkiyyətinə verməyi, alıcı isə əşyanı qəbul edib əvəzində müəyyənləşdirilmiş pul məbləğini (qiyməti) ödəməyi öhdəsinə götürür. Mülki Məcəllənin 600.1-ci maddəsinə əsasən, alğı-satqı müqaviləsində əşyanın alıcıya verildikdən müəyyən müddət sonra ödənilməsinin (əşyaların nisyə satışının) nəzərdə tutulduğu halda alıcı ödənişi müqavilədə nəzərdə tutulan müddətdə, müqavilədə belə müddət nəzərdə tutulmadıqda isə bu Məcəllənin 427-ci maddəsinə uyğun müəyyənləşdirilmiş müddətdə həyata keçirməlidir. Azərbaycan Respublikası MPM-nin 14.2-ci maddəsinə əsasən, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Azərbaycan Respublikası MPM-nin 77.1-ci maddəsində göstərilir ki, hər bir tərəf öz tələblərinin və etirazlarının əsası kimi istinad etdiyi halları sübut etməlidir. Azərbaycan Respublikası MPM-nin 217.4-cü maddəsinə əsasən məhkəmə öz qətnaməsini yalnız məhkəmə iclasında tədqiq olunmuş sübutlarla əsaslandırır. Şərh olunanlara əsasən məhkəmə belə bir nəticəyə gəlir ki, iddia təmin edilməli, xx.xx.2023-cü il tarixli, MPK6387828 saylı borc müqaviləsinə əsasən 2380 manat əsas borcun və xx.xx.2023-cü il tarixli, MPK6388127 saylı borc müqaviləsinə əsasən 3560 manat əsas borcun, cəmi 6020 manat əsas borc Cavabdeh tutularaq İddiaçı ASC-nin xeyrinə ödənilməlidir. Azərbaycan Respublikası MPM-nin 119.1-ci maddəsinə əsasən, məhkəmə xərcləri ödənilmiş tələblərin məbləğinə münasib olaraq işdə iştirak edən şəxslərə aid edilir. Belə olan halda iş üzrə ödənilmiş 80 manat dövlət rüsumu iddia təmin edildiyindən cavabdehə aid edilməlidir. Göstərilənlərə əsasən və Azərbaycan Respublikası MPM-nin 216-220, 227 və 360-cı maddələrini rəhbər tutaraq, məhkəmə Q Ə T E T D İ: İddia təmin edilsin. Cavabdeh xx.xx.2023-cü il tarixli, MPK6387828 saylı borc müqaviləsinə əsasən 2380 manat əsas borcun və xx.xx.2023-cü il tarixli, MPK6388127 saylı borc müqaviləsinə əsasən 3560 manat əsas borcun və ödənilmiş 80 manat dövlət rüsumunun, cəmi 6020 (altı min iyirmi) manat tutularaq İddiaçı MMC-nin xeyrinə ödənilsin. Qətnamədən surəti rəsmi qaydada tərəflərə verildiyi gündən 01 (bir) ay müddətində Ağdam rayon Məhkəməsi vasitəsilə Gəncə Apelyasiya Məhkəməsinə apelyasiya şikayəti verilə bilər. Hakim Rafiq Məmmədov