Naxçıvan MR Naxçıvan Şəhər Məhkəməsi Qərardad — İş №e-2(078)-344/2022

Azərbaycan Respublikası adından QƏRARDAD Naxçıvan şəhəri İş № e-2(078)-344/2022 23.02.2022 NAXÇIVAN MR NAXÇIVAN ŞƏHƏR MƏHKƏMƏSİ Mən, Naxçıvan Şəhər Məhkəməsinin hakimi Əliyeva Gülsüm Kamal qızı "xxxx" Məhdud Məsuliyyətli Cəmiyyətinin Cavabdeh qarşı borcun ödənilməsi tələbi barədə ərizəsini və ərizəyə əlavə olunmuş sənədləri nəzərdən keçirərək m ü ə y y ə n e t d i m: İddiaçı "xxxx" Məhdud Məsuliyyətli Cəmiyyəti Cavabdeh qarşı iddia ərizəsi ilə məhkəməyə müraciət edərək, 13.06.2020-ci il tarixli müqaviləyə əsasən HOFFMANN markalı kondisioner, Nevresim yatak örtüsü, Tekstil yorğan, Nevresim takımı və 2 ədəd Tekstil yastıq üçün 996 (doqquz yüz doxsan altı) manat ödənilməmiş hissə, 40 (qırx) manat cərimə, 12.06.2020-ci il tarixli müqaviləyə əsasən Dnepr markalı çarpayı, dolab, termo, 2 ədəd tumba və matras üçün 385 (üç yüz səksən beş) manat ödənilməmiş hissə, 0 (sıfır) manat cərimə, 27.03.2020-ci il tarixli müqaviləyə sasən Transformer jurnal masası üçün 210 (iki yüz on) manat ödənilməmiş hissə, 20 (iyirmi) manat cərimə, 02.04.2020-ci il tarixli müqaviləyə əsasən İMEİ Kodu **********21488 olan X1 8 markalı telefon üçün 505 (beş yüz beş) manat ödənilməmiş hissə, 20 (iyirmi) manat cərimə, 27.03.2020-ci il tarixli müqaviləyə əsasən HOFFMANN markalı paltaryuyan üçün 372.2 (üç yüz yetmiş iki manat, iyirmi qəpik) manat ödənilməmiş hissə, 27.8 (iyirmi yeddi manat, səksən qəpik) manat cərimə, ümumilikdə 2576 manat borc və 45.76 manat ödənilmiş dövlət rüsumunun Cavabdeh alınaraq "xxxx" Məhdud Məsuliyyətli Cəmiyyətinə ödənilməsi barədə qətnamə çıxarılmasını məhkəmədən xahiş etmişdir. İddia ərizəsini və ona əlavə olunmuş sənədləri nəzərdən keçirib müəyyən etdim ki, Azərbaycan Respublikası Mülki-Prosessual Məcəlləsinin 284-4-cü maddəsinin tələblərinə əsasən iddia ərizəsinin icraata qəbul olunmasından imtina edilməlidir. Belə ki, iddia ərizəsi daxil olduqda hakim onun verilməsi zamanı Azərbaycan Respublikası Mülki-Prosessual Məcəlləsində nəzərdə tutulmuş tələblərə əməl edilməklə verilib-verilməməsini yoxlayır. İddia ərizəsini və ona əlavə edilmiş sənədləri qanunvericiliyin tələbləri daxilində nəzərdən keçirən zaman müəyyən edilmişdir ki, iddiaçı "xxxx" Məhdud Məsuliyyətli Cəmiyyəti tərəfindən Cavabdeh qarşı məhkəməyə verilmiş iddia ərizəsinə əlavə olunmuş 13 iyun 2020-ci il tarixli təhvil təslim aktında 13 iyul 2020-ci il tarixli müqvilədə göstərilən HOFFMANN markalı kondisioner göstərilməmiş, 12 iyun 2020-ci il tarixli təhvil-təslim aktında müqavilədə göstərilən əşyaların hamısı göstərilməmiş, 27.03.2020-ci il tarixli əşyaların təhvil-təslim aktı boşdur, həmçinin 27.03.2020-ci il tarixli 20204701 nömrəli müqavilə üzrə təhvil-təslim aktında HOFMANN markalı paltaryuyan göstərilməmişdir. Bu səbəbdən iddiaçı tərəfindən irəli sürülən tələb üzrə qeyd edilən əşyaların cavabdehə verilib verilməməsini müəyyən etmək mümkün olmamışdır. Azərbaycan Respublikası Mülki-Prosessual Məcəlləsinin 284-4.1 və 284-4.1.3-cü maddələrinin tələbinə əsasən verilmiş tələbi təsdiq edən sənədlər təqdim olunmamışdırsa məhkəmə kiçik iddialara dair işlərə sadələşdirilmiş qaydada baxılması ilə əlaqədar ərizənin qəbul olunmasından imtina edir. Azərbaycan Respublikasının Mülki-Prosessual Məcəlləsinin 284-4.2-ci maddəsinə əsasən bu Məcəllənin 284-4.1-ci maddəsində nəzərdə tutulmuş hallarda məhkəmə ərizənin daxil olduğu gündən 5 (beş) iş günü müddətində onun qəbul edilməsindən imtina haqqında əsaslandırılmış qərardad çıxarır. Məhkəmə bu müddət ərzində ərizəni qəbul etməkdən imtina etməyibsə, o, qəbul edilmiş sayılır. Ərizəni qəbul etməkdən imtina barədə qərardaddan şikayət verilə bilməz. İş üzrə iddiaçı "xxxx" Məhdud Məsuliyyətli Cəmiyyətinə izah edilir ki, Azərbaycan Respublikası Mülki Prosessual Məcəlləsinin 284-4.3-cü maddəsinə əsasən ərizənin qəbul edilməsindən imtina olunması iddiaçının həmin tələb üzrə iddia icraatı qaydasında iddia verməsinə mane olmur. Bu halda iddiaçı tərəfindən ödənilmiş dövlət rüsumu ödənilməli olan dövlət rüsumuna hesablanır. Həmçinin iddiaçının diqqətinə çatdırılır ki, iddiaçı tərəfindən cavabdeh Cavabdeh qarşı borcun ödənilməsi tələbinə dair iddia ərizəsi ilə bundan əvvəl də məhkəməyə müraciət edilmiş, yuxarıda qeyd olunan hallar mövcud olduğundan Naxçıvan Şəhər Məhkəməsinin 08 dekabr 2021-ci il tarixli, 2(078)-1417/2021 nömrəli qərardadı ilə ərizənin icraata qəbul edilməsindən imtina olunmuşdur. Lakin iddiaçı tərəfindən qeyd olunan nöqsanlar mövcud olduğu halda təkrarən kiçik iddialara dair işlər üzrə sadələşdirilmiş icraat barədə ərizə ilə məhkəməyə müraciət olunmuşdur. Məhkəmə həmçinin onu da qeyd edir ki, "xxxx" Məhdud Məsuliyyətli Cəmiyyəti Elektron Məhkəmə İnformasiya Sistemində yaradılmış elektron kabinet vasitəsi ilə məhkəməyə müraciət etdiyindən iddia ərizəsi və ona əlavə edilmiş sənədlər onun özündə saxlanılmışdır. Ona görə də qeyd edilən sənədlərin iddiaçıya geri qaytarılmasına zərurət yoxdur. Yuxarıda göstərilənlərə əsasən və Azərbaycan Respublikasının MPM-in 263, 264 və 284-4-cü maddələrini rəhbər tutaraq qərara aldım: "xxxx" Məhdud Məsuliyyətli Cəmiyyətinin Cavabdeh qarşı borcun ödənilməsi tələbinə dair ərizənin icraata qəbul edilməsindən imtina olunsun. "xxxx" Məhdud Məsuliyyətli Cəmiyyətinə izah olunsun ki, ərizənin qəbul edilməsindən imtina olunması iddiaçının həmin tələb üzrə iddia icraatı qaydasında iddia verməsinə mane olmur. Bu halda iddiaçı tərəfindən ödənilmiş dövlət rüsumu ödənilməli olan dövlət rüsumuna hesablanır. Bu qərardaddan şikayət verilə bilməz. Hakim: Gülsüm Əliyeva.