Gəncə Kommersiya Məhkəməsi Qətnamə — İş №e-2-2(115)-129/2023

Azərbaycan Respublikası adından QƏTNAMƏ Gəncə şəhəri İş № e-2-2(115)-129/2023 09.02.2023 GƏNCƏ KOMMERSİYA MƏHKƏMƏSİ Hakim Quliyeva Gülnaz Elxan qızının sədrliyi, Novruzov Maarif Vidadi oğlunun katibliyi ilə İddiaçı Azərbaycan Respublikası Kənd Təsərrüfatı Nazirliyi yanında Aqrar Kredit və İnkişaf Agentliyinin Cavabdeh qarşı pul tələbinə dair kommersiya mübahisəsinə məhkəmənin binasında açıq məhkəmə iclasında baxaraq məhkəmə MÜƏYYƏN ETDİ: İddiaçı Azərbaycan Respublikası Kənd Təsərrüfatı Nazirliyi yanında Aqrar Kredit və İnkişaf Agentliyi iddia ərizəsi ilə məhkəməyə müraciət edərək, maliyyə arayışının tərtib edildiyi xx.xx.2022-ci il tarixə xx.xx.2018-ci il tarixli 23-GL/18 nömrəli müqavilə üzrə yaranmış 5808 manat gecikdirilmiş əsas borc və 2799.46 manat cərimə borcunun, xx.xx.2017-ci il tarixli 1418-GL/17 nömrəli müqavilə üzrə 39647 manat gecikdirilmiş əsas borc və 19469,58 manat cərimə borcunun, eləcə də xx.xx.2015-ci il tarixli 1767-GL/15 nömrəli müqavilə üzrə 4661 manat gecikdirilmiş əsas borc və 2252,90 manat cərimə borcunun, ilkin mediasiya sessiyası üçün ödənilmiş 400 manatın, hüquqi yardımla bağlı ödənilmiş 300 manatın, cəmi 75337,94 manat pul vəsaitinin cavabeh Cavabdeh tutularaq iddiaçıya ödənilməsi barədə qətnamə qəbul edilməsini xahiş etmişdir. İddia ərizəsi onunla əsaslandırılmışdır ki, "xxxx" ASC ("xxxx" ASC) ilə Cavabdeh arasında bağlanmış xx.xx.2018-ci il tarixli 23-GL/18 nömrəli, xx.xx.2017-ci il tarixli 1418- GL/17 nömrəli və xx.xx.2015-ci il tarixli 1767-GL/15 nömrəli müqavilələrə əsasən borclu (lizinq alan) satış dəyərinin bir hissəsini əvvəlcədən, qalan hissəsini isə ödəniş qrafikinə uyğun şəkildə ödəmək şərti ilə kənd təsərrüfatı texnikalarını lizinqə götürmüşdür. Cavabdeh müqavilə üzrə üzərinə götürdüyü öhdəlikləri yerinə yetirməmişdir. Cavabdehə müvafiq pretenziya məktubu göndərilmiş, öhdəliyinin yerinə yetirilməsi barədə dəfələrlə edilmiş xəbərdarlıqlara baxmayaraq borclu tərəfindən ödənişlər yerinə yetirilməmişdir. Tərəflərə məhkəmə iclasının yeri və vaxtı barədə məlumat verilsə də məhkəmə iclasında iştirak etməmişlər. İddiaçının nümayəndəsi və vəkili məhkəməyə ərizələr ünvanlayaraq bütün sübutlarını elektron qaydada təqdim etdiyini, əlavə sübut və vəsatətinin olmadığını bildirmiş, habelə məhkəmə iclasının onun iştirakı olmadan keçirilməsini xahiş etmişdir. Məhkəmə işə iddiaçının nümayəndəsinin və cavabdehin iştirakı olmadan baxılmasını mümkün hesab etmişdir. İddia tələbinin dəlillərini iş materialları ilə birlikdə araşdırıb və işin hallarına hüquqi qiymət verərək aşağıda qeyd edilənlərə əsasən məhkəmə hesab edir ki, iddia tələbi qismən təmin edilməlidir. Belə ki, iş materiallarına əlavə olunmuş "xxxx" ASC ilə Cavabdeh arasında bağlanmış 28 avqust 2015-ci il tarixli 1767-GL/15 nömrəli kənd təsərrüfatı texnikasının lizinqə verilməsi barədə müqavilədən görünür ki, lizinq verən ümumi məbləği 10200 manat olan və spesifikasiyada göstərilən kənd təsərrüfatı texnikalarını ilkin dəyərinin 40%-nə güzəşt tətbiq edilməklə qalıq dəyəri tam ödənildikdən və müvafiq sənədləşmə aparıldıqdan sonra lizinq alanın mülkiyyətinə verilməsi şərti ilə lizinqə vermişdir. İş materiallarına əlavə olunmuş 28 avqust 2015-ci il tarixli lizinq müqaviləsinin spesifikasiyasından görünür ki, müqavilənin müddəti 28 avqust 2015-ci il tarixdən 28 avqust 2022-ci il tarixədək, qarğıdalı səpən şum aparmadan 6 cərgəli AGDCP-6 texnikasının ilkin qiyməti 25500 manat, ödənilmiş məbləğ 5100 manat, güzəştdən sonrakı qalıq məbləğ 10200 manat müəyyən edilmişdir. İş materiallarına əlavə olunmuş "xxxx" ASC ilə Cavabdeh arasında bağlanmış 31 iyul 2017-ci il tarixli 1418-GL/17 nömrəli kənd təsərrüfatı texnikasının lizinqə verilməsi barədə müqavilədən görünür ki, lizinq verən ümumi məbləği 134318 manat olan və spesifikasiyada göstərilən kənd təsərrüfatı texnikalarını ilkin dəyərinin 40%-nə güzəşt tətbiq edilməklə qalıq dəyəri tam ödənildikdən və müvafiq sənədləşmə aparıldıqdan sonra lizinq alanın mülkiyyətinə verilməsi şərti ilə lizinqə vermişdir. İş materiallarına əlavə olunmuş 31 iyul 2017-ci il tarixli lizinq müqaviləsinin spesifikasiyasından görünür ki, müqavilənin müddəti 31 iyul 2017-ci il tarixdən 31 iyul 2021-ci il tarixədək, təkərli traktor-Claas Arion 630C texnikasının ilkin qiyməti 149600 manat, ödənilmiş məbləğ 29920 manat, güzəştdən sonrakı qalıq məbləğ 59840 manat, traktor təkərli Claas Axion 820 texnikasının ilkin qiyməti 162000 manat, ödənilmiş məbləğ 32400 manat, güzəştdən sonrakı qalıq məbləğ 64800 manat, universal yemdoğrayan və yemqarışdıran Charger V8 texnikasının ilkin qiyməti 18300 manat, ödənilmiş məbləğ 5490 manat, güzəştdən sonrakı qalıq məbləğ 5940 manat, kultivator 6 cərgəli (gübrəsəpənlər)-AKB-4.2 texnikasının ilkin qiyməti 13960 manat, ödənilmiş məbləğ 4188 manat, güzəştdən sonrakı qalıq məbləğ 4188 manat, ümumilikdə güzəştdən sonrakı qalıq məbləğ 208896 manat müəyyən edilmişdir. İş materiallarına əlavə olunmuş "xxxx" ASC ilə Cavabdeh arasında bağlanmış 04 iyun 2018-ci il tarixli 23-GL/18 nömrəli kənd təsərrüfatı texnikasının lizinqə verilməsi barədə müqavilədən görünür ki, lizinq verən ümumi məbləği 10028 manat olan və spesifikasiyada göstərilən kənd təsərrüfatı texnikalarını ilkin dəyərinin 40%-nə güzəşt tətbiq edilməklə qalıq dəyəri tam ödənildikdən və müvafiq sənədləşmə aparıldıqdan sonra lizinq alanın mülkiyyətinə verilməsi şərti ilə lizinqə vermişdir. İş materiallarına əlavə olunmuş 04 iyun 2018-ci il tarixli lizinq müqaviləsinin spesifikasiyasından görünür ki, müqavilənin müddəti 17 yanvar 2018-ci il tarixdən 17 yanvar 2023-cü il tarixədək, mala ağır 48 diskli hidravlik (tandem)-CAN-D.H.G-48K texnikasının ilkin qiyməti 33430 manat, ödənilmiş məbləğ 10030 manat, güzəştdən sonrakı qalıq məbləğ 10028 manat müəyyən edilmişdir. İş materiallarına əlavə olunmuş 24 iyun 2015-ci il tarixli, 08 iyun 2017-ci il tarixli və 13 noyabr 2017-ci il tarixli aktlardan görünür ki, qarğıdalı səpən şum aparmadan 6 cərgəli AGDCP-6, mala ağır 48 diskli hidravlik (tandem)-CAN-D.H.G-48K, təkərli traktor-Claas Arion 630C, traktor təkərli Claas Axion 820, universal yemdoğrayan və yemqarışdıran Charger V8 və kultivator 6 cərgəli (gübrəsəpənlər)-AKB-4.2 texnikaları Cavabdeh təhvil verilmişdir. İş materiallarına əlavə olunmuş 14 sentyabr 2015-ci il tarixli 4238/ü nömrəli əmrdən görünür ki, "xxxx" ASC ilə Cavabdeh arasında bağlanmış 19 iyun 2015-ci il tarixli 1049-L/15 və 2715ü/6/19/2015 nömrəli müqavilələrə, 07 noyabr 2017-ci il tarixli 5365/5 nömrəli əmrdən görünür ki, 01 iyun 2017-ci il tarixli 536-L/17 və 07 iyun 2017-ci il tarixli 2600ü nömrəli müqavilələrə, 04 iyun 2018-ci il tarixli 2951/52 nömrəli əmrdən görünür ki, 07 noyabr 2017-ci il tarixli 1603-L/17 nömrəli və 08 noyabr 2017-ci il tarixli 5379ü nömrəli müqavilələrə xitam verilməsi, əmrlərin qüvvədən düşmüş hesab edilməsi, "xxxx" ASC ilə Cavabdeh arasında bağlanmış 04 iyun 2018-ci il tarixli 23-GL/18 nömrəli lizinq müqaviləsinə əsasən mala ağır 48 diskli hidravlik (tandem)-CAN-D.H.G-48K güzəşt məbləği 13372 manat, qalıq məbləğ 10028 manat, 31 iyul 2017-ci il tarixli lizinq müqaviləsinə əsasən təkərli traktor-Claas Arion 630C, traktor təkərli Claas Axion 820, universal yemdoğrayan və yemqarışdıran Charger V8 və kultivator 6 cərgəli (gübrəsəpənlər)-AKB-4.2 güzəşt məbləği ümumilikdə 137544 manat, qalıq məbləğ 134318 manat müəyyən olunmaqla yenidən lizinqə verilmişdir. İş materiallarına əlavə edilmiş xx.xx.2022-ci il tarixli maliyyə arayışlarından görünür ki, Cavabdeh 04 iyun 2018-ci il tarixli müqaviləyə əsasən 10028 manat məbləğdən 528 manat ödəniş etmiş, gecikdirilmiş borc 5808 manat, cərimə 2799,46 manat, cəmi 8607,46 manat (Gəncə İnzibati-İqtisadi Məhkəməsinin xx.xx.2019-cu il tarixli e-2-2(083)-624/2019 saylı qətnaməsindən ödənilməmiş 3168 manat daxil deyil), 31 iyul 2017-ci il tarixli müqaviləyə əsasən 134318 manat məbləğdən 12780 manat ödəniş etmiş (Gəncə İnzibati-İqtisadi Məhkəməsinin xx.xx.2019-cu il tarixli e-2-2(083)-624/2019 saylı qətnaməsindən ödənilmiş 4100 manat daxil olmaqla), gecikdirilmiş borc 39647 manat (Gəncə İnzibati-İqtisadi Məhkəməsinin xx.xx.2019-cu il tarixli e-2-2(083)-624/2019 saylı qətnaməsindən ödənilməmiş 18184 manat daxil deyil), cərimə 19649,58 manat, cəmi 59116,58 manat, 28 avqust 2015-ci il tarixli müqaviləyə əsasən 10200 manat məbləğdən 2989 manat ödəniş etmiş, gecikdirilmiş borc 4661 manat (Gəncə İnzibati-İqtisadi Məhkəməsinin xx.xx.2019-cu il tarixli e-2-2(083)- 624/2019 saylı qətnaməsindən ödənilməmiş 2550 manat daxil deyil), cərimə 2252,90 manat, cəmi 6913,90 manat müəyyən edilmişdir. İş materiallarına əlavə edilmiş 08 avqust 2022-ci il tarixli pretenziya məktubunun surətindən görünür ki, borcluya yaranmış borcun ödənilməsi barədə xəbərdarlıq edilmişdir. İş materiallarına əlavə edilmiş Gəncə İnzibati-İqtisadi Məhkəməsinin xx.xx.2019-cu il tarixli e-2-2(083)-624/2019 saylı qətnaməsindən görünür ki, iddia tələbi təmin edilmiş, Cavabdeh 28002 manat əsas borc, 5500 manat cərimə, 30 manat dövlət rüsumu, cəmi 33532 manat məbləğində pul vəsaitinin tutularaq "xxxx" Açıq Səhmdar Cəmiyyətinin xeyrinə tutulması qət edilmişdir. Azərbaycan Respublikası Mülki Məcəlləsinin 6.2-ci maddəsinə əsasən, fiziki və hüquqi şəxslər mülki hüquqları öz mənafelərini gerçəkləşdirmək üçün iradələrinə uyğun olaraq əldə edir və həyata keçirirlər. Onlar müqavilə əsasında öz hüquq və vəzifələrini müəyyənləşdirməkdə və qanunvericiliyə zidd olmayan hər hansı müqavilə şərtləri qoymaqda sərbəstdirlər. Həmin Məcəllənin 385.1-ci maddəsinin tələbinə görə, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Həmin Məcəllənin 386.1-ci maddəsinin tələbinə görə, öhdəliyin zərər vurulması, əsassız varlanma və ya bu Məcəllədə nəzərdə tutulmuş digər əsaslar nəticəsində əmələ gəlməsi halları istisna olmaqla, öhdəliyin əmələ gəlməsi üçün onun iştirakçıları arasında müqavilə olmalıdır. Həmin Məcəllənin 442-ci maddəsinin tələbinə görə, öhdəliyin icra edilməməsi dedikdə onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. Həmin Məcəllənin 445-ci maddəsinin tələbinə görə, icranı gecikdirmiş borclu gecikdirmə nəticəsində vurduğu zərər üçün və gecikdirmə zamanı təsadüfən baş vermiş icra mümkünsüzlüyünün nəticələri üçün kreditor qarşısında məsuliyyət daşıyır. Həmin Məcəllənin 448.1-ci maddəsinin tələbinə görə, əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir. Həmin Məcəllənin 747.1-ci maddəsinə əsasən, lizinq müqaviləsinə görə, lizinq verən müəyyən əşyanı müqavilə ilə şərtləşdirilmiş müəyyən haqla, müəyyən müddətə və digər şərtlərlə (lizinq alana əmlakı satın almaq hüququnun verilməsi də daxil olmaqla) lizinq alanın istifadəsinə verməyə borcludur. Lizinq alan müəyyənləşdirilmiş dövriliklə muzd ödəməyə borcludur. Həmin Məcəllənin 748-10.1-ci maddəsinə əsasən, lizinq müqaviləsinin qüvvədə olduğu müddət ərzində həmin müqavilə üzrə ödənişlərin ümumi məbləği lizinq ödənişləri hesab edilir. Lizinq ödənişləri lizinq müqaviləsi üzrə lizinq alana verilmiş lizinq obyektindən istifadəyə görə onun tərəfindən lizinq verənin xeyrinə həyata keçirilən ödənişlərdir. Həmin Məcəllənin 748-10.2-ci maddəsinə əsasən, lizinq ödənişlərinin məbləği, həyata keçirilməsi üsulu, forması və dövriliyi lizinq müqaviləsinə uyğun olaraq Məcəllənin müddəaları nəzərə alınmaqla həyata keçirilir. Məhkəmə qeyd edir ki, "xxxx" ASC ilə Cavabdeh arasında bağlanmış xx.xx.2015-ci il tarixli 1767-GL/15 nömrəli lizinq müqaviləsinə əsasən qarğıdalı səpən şum aparmadan 6 cərgəli AGDCP-6 texnikası ilkin dəyərinin 40%-nə güzəşt tətbiq edilməklə qalıq dəyəri 10200 manat, xx.xx.2017-ci il tarixli 1418-GL/17 saylı lizinq müqaviləsinə əsasən təkərli traktor- Claas Arion 630C, traktor təkərli Claas Axion 820, universal yemdoğrayan və yemqarışdıran Charger V8, kultivator 6 cərgəli (gübrəsəpənlər)-AKB-4.2 texnikaları ilkin dəyərinin 40%-nə güzəşt tətbiq edilməklə qalıq dəyəri 134318 manat, xx.xx.2018-ci il tarixli 23-GL/18 saylı lizinq müqaviləsinə əsasən mala ağır 48 diskli hidravlik (tandem)-CAN-D.H.G-48K texnikası ilkin dəyərinin 40%-nə güzəşt tətbiq edilməklə qalıq dəyəri 10028 manat müəyyən edilməklə qalıq dəyəri tam ödənildikdən və müvafiq sənədləşmə aparıldıqdan sonra lizinq alanın mülkiyyətinə verilməsi şərti ilə yenidən lizinqə verilmişdir. Lizinq verən müqavilələr üzrə üzərinə götürdüyü öhdəlikləri yerinə yetirmiş, lizinq alan isə üzərinə götürdüyü öhdəlikləri yerinə yetirməmiş, lizinq ödənişini ödəməmişdir. Ona görə də məhkəmə hesab edir ki, lizinq verən müqavilələr üzrə yaranmış borc məbləğlərini tələb etməkdə haqlıdır. Həmin hissədə iddia tələbi əsaslıdır və təmin edilməlidir. Məhkəmə, eyni zamanda iddianın cərimənin ödənilməsi hissəsini də araşdıraraq hesab edir ki, iddia həmin hissədə qismən təmin edilməlidir. Belə ki, Azərbaycan Respublikası Mülki Məcəlləsinin 460.1-ci maddəsinə əsasən öhdəliklərin icrası girov, dəbbə pulu, borclunun əmlakının saxlanması, zaminlik, qarantiya, beh ilə və bu Məcəllədə və ya müqavilədə nəzərdə tutulan digər üsullarla təmin edilə bilər. Həmin Məcəllənin 462.1-ci maddəsinə görə dəbbə pulu (cərimə, penya) müqavilə ilə müəyyənləşdirilən, öhdəliyin icra edilmədiyi və ya lazımınca icra edilmədiyi, o cümlədən icranın gecikdirildiyi halda borclunun kreditora ödəməli olduğu pul məbləğidir. Həmin Məcəllənin 467-ci maddəsinə əsasən məhkəmə işin hallarını nəzərə alaraq tənasübsüz surətdə yüksək dəbbə pulunu azalda bilər. Tənasüb müəyyənləşdirilərkən kreditorun həm əmlak mənafeləri, həm də bütün əsaslı mənafeləri nəzərə alınır. Dəbbə pulu ödənildikdən sonra onun miqdarının azaldılması istisna edilir. Qanun normasının mənasına görə, məhkəmə dəbbə pulunun məbləğini cavabdehin belə vəsatət verməsindən asılı olmayaraq azalda bilər. Hər bir konkret iş üzrə dəbbə pulunun azaldılması meyarları kimi dəbbə pulunun qeyri-mütənasib olması, öhdəliyin pozulması nəticəsində yarana biləcək mümkün zərərin həcmindən əhəmiyyətli dərəcədə artıq olması, öhdəliklərin yerinə yetirilməsindən yayınma müddətləri və s. çıxış edə bilər. Məhkəmə nəzərə alır ki, dəbbə pulunun iddiada göstərilən həcmdə tutulması cavabdehin əmlak mənafelərinə ciddi xələl gətirə bilər. Dəbbə pulunun məbləğinin azaldılması kreditorun əmlak mənafelərinə əsaslı təsir etmir. Belə ki, kreditor borc verərkən dəbbə pulunu əldə edəcəyi gözlənilən qazanc kimi deyil, öhdəliyin icrasının təminatı üsulu kimi nəzərdə tutmuşdur. Məhkəmə cavabdehin üzərində əsas borc olaraq icra edilməmiş pul öhdəliyinin olmasını, bununla yanaşı əlavə olaraq yüksək məbləğdə cərimənin tətbiq edilməsinin onun vəziyyətini daha da ağırlaşdırdığını nəzərə alaraq hesab edir ki, hər bir müqavilə üzrə dəbbə pulu (cərimə) tənasübsüz surətdə yüksəkdir. Odur ki, dəbbə pulu azaldılaraq 28 avqust 2015-ci il tarixli 1767-GL/15 saylı lizinq müqaviləsi üzrə 100 manat, xx.xx.2017-ci il tarixli 1418-GL/17 saylı lizinq müqaviləsi üzrə 200 manat, xx.xx.2018-ci il tarixli 23-GL/18 saylı lizinq müqaviləsi üzrə 100 manat məbləğində müəyyən edilməlidir. Beləliklə məhkəmə hesab edir ki, iddia qismən təmin edilməli, "xxxx" ASC ilə Cavabdeh arasında bağlanmış 28 avqust 2015-ci il tarixli 1767-GL/15 saylı lizinq müqaviləsi üzrə 4661 manat əsas borc, 100 manat məbləğində cərimə borcu olmaqla, cəmi 4761 manat, xx.xx.2017-ci il tarixli 1418-GL/17 saylı lizinq müqaviləsi üzrə 39647 manat əsas borc, 200 manat məbləğində cərimə borcu olmaqla, cəmi 39847 manat, xx.xx.2018-ci il tarixli 23-GL/18 saylı lizinq müqaviləsi üzrə 5808 manat əsas borc, 100 manat məbləğində cərimə borcu olmaqla, cəmi 5908 manat, ümumilikdə 50516 manat pul cavabdehdən tutularaq iddiaçıya ödənilməlidir. Azərbaycan Respublikası Mülki-Prosessual Məcəlləsinin 14.2-ci maddəsinin tələbinə görə, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən hər bir tərəf öz tələb və etirazlarının əsası kimi istinad etdiyi halları sübut etməlidir. Həmin Məcəllənin 217.4-cü maddəsinin tələblərinə görə, məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Həmçinin məhkəmə qeyd edir ki, Azərbaycan Respublikası Mülki-Prosessual Məcəlləsinin 119.1-ci maddəsinə əsasən məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. Həmin Məcəllənin 119.2-ci maddəsinə əsasən iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə mütənasib olaraq cavabdehdən tutularaq dövlət gəlirlərinə alınır. Həmin Məcəllənin 124.1-ci maddəsinə əsasən işə baxılması ilə əlaqədar məhkəmənin çəkdiyi xərclər və iddiaçının ödəməkdən azad edildiyi dövlət rüsumu, iddia tələblərinin təmin edilmiş hissəsinə mütənasib olaraq dövlət mədaxilinə cavabdehdən alınır. İş materiallarına əlavə edilmiş xx.xx.2022-ci il tarixli qəbzdən görünür ki, Bakı şəhər Mərkəzi Vəkil bürosunun hesabına hüquqi xidmət haqqı olaraq 300 manat pul köçürülmüşdür. İş materiallarına əlavə edilmiş xx.xx.2022-ci il tarixli MŞB/3-01739 nömrəli arayışdan görünür ki, Bakı şəhəri 3 saylı Mediasiya Təşkilatı tərəfindən iddiaçının nümayəndəsinin mediasiya sessiyasında iştirak etməsi və onun tərəfindən 400 manat məbləğində mediasiyaya dair ödəniş edildiyi barədə arayış verilmişdir. Qeyd edilənləri nəzərə alaraq məhkəmə hesab edir ki, hüquqi yardımla bağlı ödənilmiş 300 manat və ödənilmiş 400 manat mediasiya xərci də cavabdehdən tutularaq iddiaçıya ödənilməlidir. Bundan başqa məhkəmə qeyd edir ki, iddiaçı mediasiyaya dair xərci ödədiyindən dövlət rüsumu ödəməkdən azad edilmiş, ona görə də iddianın təmin edilmiş hissəsinə mütənasib olaraq 241 manat 55 qəpik dövlət rüsumu cavabdehdən alınaraq dövlət büdcəsinə ödənilməlidir. Azərbaycan Respublikası Mülki-Prosessual Məcəlləsinin 10-1.3-cü maddəsinə əsasən kommersiya mübahisələri üzrə məhkəmə icraatı, habelə “Elektron məhkəmə” informasiya sisteminin tətbiq olunduğu məhkəmələrdə mülki işlər üzrə məhkəmə icraatı, o cümlədən ərizə, şikayət və digər sənədlərin göndərilməsi, qəbulu, habelə məhkəmə sənədlərinin məhkəməyə və proses iştirakçılarına çatdırılması “Elektron məhkəmə” informasiya sistemində yaradılan elektron kabinet vasitəsilə həyata keçirilir. Şərh olunanlara əsasən və Azərbaycan Respublikası Mülki Prosessual Məcəlləsinin 216-220, 227, 233, 360-cı maddələrini rəhbər tutaraq, məhkəmə QƏT ETDİ: İddia qismən təmin edilsin. "xxxx" Açıq Səhmdar Cəmiyyəti ilə Cavabdeh arasında bağlanmış xx.xx.2015-ci il tarixli 1767-GL/15 saylı lizinq müqaviləsi üzrə 4661 manat əsas borc, 100 manat məbləğində cərimə borcu olmaqla, cəmi 4761 manat, xx.xx.2017-ci il tarixli 1418-GL/17 saylı lizinq müqaviləsi üzrə 39647 manat əsas borc, 200 manat məbləğində cərimə borcu olmaqla, cəmi 39847 manat, xx.xx.2018-ci il tarixli 23-GL/18 saylı lizinq müqaviləsi üzrə 5808 manat əsas borc, 100 manat məbləğində cərimə borcu olmaqla, cəmi 5908 manat, ümumilikdə 50516 manat pul, hüquqi yardımla bağlı ödənilmiş 300 manat və ödənilmiş 400 manat mediasiya xərci Cavabdeh tutularaq iddiaçı Azərbaycan Respublikası Kənd Təsərrüfatı Nazirliyi yanında Aqrar Kredit və İnkişaf Agentliyinə ödənilsin. Cavabdeh 241 manat 55 qəpik dövlət rüsumu tutularaq dövlət büdcəsinə ödənilsin. İddianın qalan hissəsi təmin edilməsin. Qətnamədən rəsmi qaydada verildiyi gündən 1 (bir) ay müddətində “Elektron məhkəmə” informasiya sistemində yaradılan elektron kabinet vasitəsilə Gəncə Kommersiya Məhkəməsinə təqdim edilməklə Gəncə Apellyasiya Məhkəməsinin Kommersiya Kollegiyasına apellyasiya şikayəti verilə bilər. Hakim Gülnaz Quliyeva