Sumqayıt Kommersiya Məhkəməsi Qətnamə — İş №e-2-2(119)-222/2025

Azərbaycan Respublikası adından QƏTNAMƏ Sumqayıt şəhəri İş № e-2-2(119)-222/2025 30.01.2025 Sumqayıt Kommersiya Məhkəməsi Sumqayıt Kommersiya Məhkəməsinin hakimi Həmidli Fərman Fəzail oğlu, İddiaçı “AZ ESTETİK GROUP" Məhdud Məsuliyyətli Cəmiyyəti tərəfindən Cavabdeh qarşı verilmiş “borcun tutulması” tələbi barədə iddia ərizəsinə kiçik iddialara dair işlər üzrə sadələşdirilmiş icraat qaydasında baxaraq, MÜƏYYƏN E T D İ: İddiaçı “AZ ESTETİK GROUP" Məhdud Məsuliyyətli Cəmiyyəti “Elektron məhkəmə” informasiya sistemində yaradılmış elektron kabinet vasitəsilə Cavabdeh qarşı kiçik iddialara dair işlər üzrə sadələşdirilmiş icraat qaydasında “borcun tutulması” tələbi barədə iddia ərizəsi ilə məhkəməyə müraciət edərək 27 avqust 2022-ci il tarixli alqı-satqı müqaviləsi üzrə 420 (dörd yüz iyirmi) manat məbləğində borc, 12 (on iki) manat məbləğində cərimə, 24 fevral 2024-cü il tarixli alqı-satqı müqaviləsi üzrə 750 (yeddi yüz əlli manat) manat məbləğində borc, 18 (on səkkiz) manat məbləğində cərimə və 32 (otuz iki) manat məbləğində dövlət rüsumunun əvəzinin cavabdehdən iddiaçının xeyrinə tutulması barədə qətnamə qəbul edilməsini xahiş etmişdir. İddiaçı iddia tələbini onunla əsaslandırmışdır ki, aralarında bağlanmış 27 avqust 2022-ci il tarixli alqı-satqı müqaviləsi üzrə cavabdeh iddiaçıdan ümumi dəyəri 600 manat məbləğində olan mal satın almış, 600 manat məbləğində pulu 27 avqust 2022-ci il tarixli X1 əsasən, 2 ay ərzində ödəməyi öhdəsinə götürsə də, 420 manat məbləğində borcu qalmışdır. Həmçinin 24 fevral 2024-cü il tarixli alqı-satqı müqaviləsinə əsasən, cavabdeh iddiaçıdan ümumi dəyəri 1100 manat məbləğində olan mal satın almış, 1100 manat məbləğində pulu 24 fevral 2024-cü il tarixli X1 əsasən, 4 ay ərzində ödəməyi öhdəsinə götürsə də, 750 manat məbləğində borcu qalmışdır. Cavabdehlə mübahisənin pretenziya qaydasında nizama salınmasına cəhd edilməsi hər hansı nəticə vermədiyindən məhkəməyə müraciət etmək zərurəti yaranmışdır. Məhkəmə iddiaçının cavabdehə qarşı iddia ərizəsinə dair kommersiya işinə kiçik iddialara dair işlər üzrə sadələşdirilmiş icraat qaydasında baxılmasını mümkün hesab etmiş, bununla əlaqədar Azərbaycan Respublikasının Mülki Prosessual Məcəlləsinin tələblərinə uyğun olaraq “bildirişi rəsmi qaydada aldığı gündən 10 (on) iş günü müddətində iddiaya qarşı əsaslandırılmış etirazını və ona əlavə olunmuş sənədləri məhkəməyə göndərmək” hüququnun izah olunması barədə bildiriş müvafiq qaydada cavabdehə göndərilmişdir. Məhkəmə kiçik iddialara dair işlər üzrə ərizəni və işin faktiki hallarını araşdırıb, işdə olan sənədləri tədqiq etməklə sübutları qiymətləndirərək hesab edir ki, aşağıda göstərilənlərə əsasən iddia təmin edilməlidir. İş materialları: İş materiallarında olan iddiaçı ilə cavabdeh arasında bağlanmış 27 avqust 2022-ci il tarixli 013090 nömrəli malların alqı-satqı müqaviləsinin 1.1-ci bəndinə əsasən, satıcı (iddiaçı “AZ ESTETİK GROUP" MMC) ümumi dəyəri və təyinatı, bu müqavilənin tərkib hissəsi olan qiymətlərin razılaşma protokolunda əks olunan texniki avadanlıqları dəyərini nağd və ya hissə-hissə ödənilməklə alıcıya (Cavabdeh) satmağı, alıcı isə malı qəbul edib qiymətini bu müqaviləyə və Əlavə 1-də əks olunmuş formada satıcıya ödəməyi öhdəsinə götürür. Həmin müqavilənin 2.1.5-ci, 2.1.7-ci və 2.1.9-cu yarımbəndlərinə əsasən, satılan malın dəyərini alıcıdan tələb etmək, satılan malın dəyərinin ilkin ödənişi edildikdən sonra qalıq məbləğini bu müqavilənin tərkib hissəsi olan Əlavə 1 əsasında ödənilməsini alıcıdan tələb etmək, müqavilə ilə nəzərdə tutulmuş öhdəliklərin, vəzifələrin alıcı tərəfindən vaxtında və lazımi qaydada icra olunmasını tələb etmək satıcının hüququdur. Həmin müqavilənin 2.2.2-ci yarımbəndinə əsasən, malın dəyərini vaxtında və müqavilədə qeyd olunan qaydada və şərtlərlə ödəmək alıcının vəzifəsidir. Həmin müqavilənin 3.2-ci bəndinə əsasən, müqavilənin 1.1-ci maddəsinə əsasən Əlavə 1-də qeyd olunan malın ƏDV daxil dəyəri 600 manat təşkil edir. Həmin müqavilənin 3.3-cü bəndinə əsasən, alıcı alınan malın dəyərini tərəflər arasındakı razılaşmaya uyğun olaraq tam və hissə-hissə olmaqla ödəniş edə bilər. Alıcı malın ümumi dəyərinin razılaşdırılmış məbləğini (hissəsini) 0 manat həcmində ilkin ödənişini dərhal, qalıq məbləğini isə Əlavə 1 ilə razılaşdırılmış müddətdə satıcıya ödəyir. Həmin müqavilənin 4.2-ci bəndinə əsasən, alıcı malın dəyərini və qalıq məbləğini müqavilənin 3.2-ci maddəsində göstərilən müddətdə 1 nömrəli əlavəyə uyğun olaraq tam və ya qismən icra etmədikdə, hər gecikdirilmiş gün üçün ödənilməyən məbləğin 1% həcmində satıcıya cərimə ödəyir. İş materiallarında olan 27 avqust 2022-ci il tarixli X1 (Əlavə 1-ə) əsasən, 750 manat məbləğində olan ödənişin aylıq 375 manat olmaqla 27 sentyabr 2022-ci il tarixdən başlayaraq 2 ay müddətində ödənilməsi tərəflər arasında razılaşdırılmışdır. İş materiallarında olan 27 avqust 2022-ci il tarixli təhvil-təslim aktına (Əlavə 2-yə) əsasən, iddiaçı tərəfindən 600 manat məbləğində 1 ədəd “FQ A 31 GUATRO” markalı lampa və 150 manat məbləğində 1 ədəd “FQ A 31 GUATRO” markalı avadanlıq cavabdehə təhvil verilmişdir. İş materiallarında olan 09 dekabr 2024-cü il tarixli maliyyə arayışından görünür ki, cavabdehin iddiaçıya 27 avqust 2022-ci il tarixli 013090 nömrəli nömrəli alqı-satqı müqaviləsi üzrə bu sənədin tərtib edildiyi tarixə 420 manat məbləğində borcu vardır və 12 manat məbləğində cərimə hesablanmışdır. İş materiallarında olan iddiaçı ilə cavabdeh arasında bağlanmış 24 fevral 2024-cü il tarixli 023907 nömrəli malların alqı-satqı müqaviləsinin 1.1-ci bəndinə əsasən, satıcı (iddiaçı “AZ ESTETİK GROUP" MMC) ümumi dəyəri və təyinatı, bu müqavilənin tərkib hissəsi olan qiymətlərin razılaşma protokolunda əks olunan texniki avadanlıqları alıcıya (Cavabdeh) satmağı, alıcı isə malı qəbul edib qiymətini bu müqaviləyə uyğun olaraq nağd və ya hissə-hissə, Əlavə 1-də əks olunmuş formada satıcıya ödəməyi öhdəsinə götürür. Həmin müqavilənin 2.1.5-ci, 2.1.6-cı və 2.1.9-cu yarımbəndlərinə əsasən, satılan malın dəyərini alıcıdan tələb etmək, satılan malın dəyərinin ilkin ödənişi edildikdən sonra qalıq məbləğini bu müqavilənin tərkib hissəsi olan “Əlavə 1” əsasında ödənilməsini alıcıdan tələb etmək, müqavilə ilə nəzərdə tutulmuş öhdəliklərin, vəzifələrin alıcı tərəfindən vaxtında və lazımi qaydada icra olunmasını tələb etmək satıcının hüququdur. Həmin müqavilənin 2.2.2-ci yarımbəndinə əsasən, malın dəyərini vaxtında və müqavilədə qeyd olunan qaydada və şərtlərlə ödəmək alıcının vəzifəsidir. Həmin müqavilənin 3.2-ci bəndinə əsasən, alıcı satılmış malın dəyərini tərəflər arasında razılaşdırılmış, “Əlavə 1“də göstərilən qaydada satıcıya ödəməyi öhdəsinə götürür. Həmin müqavilənin 4.2-ci bəndinə əsasən, alıcı malın dəyərini və qalıq məbləğini müqavilənin 3.2-ci maddəsində göstərilən müddətdə 1 nömrəli əlavəyə uyğun olaraq tam və ya qismən icra etmədikdə, hər gecikdirilmiş gün üçün ödənilməyən məbləğin 1% həcmində satıcıya cərimə ödəyir. İş materiallarında olan 24 fevral 2024-cü il tarixli X1 (Əlavə 1-ə) əsasən, 1100 manat məbləğində ödənişin 24 mart 2024-cü il tarixdən başlayaraq aylıq 275 manat olmaqla 4 ay müddətində ödənilməsi tərəflər arasında razılaşdırılmışdır. İş materiallarında olan 24 fevral 2024-cü il tarixli təhvil-təslim aktına (Əlavə 2-yə) əsasən, iddiaçı tərəfindən 700 manat məbləğində 1 ədəd “4X MELİSA HR DPL” markalı lampa və 400 manat məbləğində 1 ədəd “FQ A 31 SAPPHİRE” markalı avadanlıq cavabdehə təhvil verilmişdir. İş materiallarında olan 09 dekabr 2024-cü il tarixli maliyyə arayışından görünür ki, cavabdehin iddiaçıya 24 fevral 2024-cü il tarixli 023907 nömrəli alqı-satqı müqaviləsi üzrə bu sənədin tərtib edildiyi tarixə 750 manat məbləğində borcu vardır və 18 manat məbləğində cərimə hesablanmışdır. Tətbiq edilən hüquq: Mülki Prosessual Məcəllənin 14.2-ci maddəsinə əsasən, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 88-ci maddəsinə əsasən, məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verir. Həmin Məcəllənin 284-1-ci maddəsinə əsasən, mülki işlər üzrə iddianın qiyməti beş min manatdan, kommersiya mübahisələrinə dair işlər üzrə iddianın qiyməti on min manatdan az olan iddialar (kiçik iddialar) üzrə işlərə bu fəslə uyğun olaraq sadələşdirilmiş qaydada baxılmasına yol verilir. Həmin Məcəllənin 284-5.3-cü maddəsinə əsasən, ərizə məhkəməyə daxil olduğu gündən 30 (otuz) iş günü ərzində işə tərəflərin təqdim etdiyi sənədlər əsasında, məhkəmə baxışı keçirilmədən və tərəflər izahatları dinlənilmək üçün çağırılmadan baxılmalı və həmin işin həllinə dair qətnamə çıxarılmalıdır. Həmin Məcəllənin 284-6.1-ci maddəsinə əsasən, işə mahiyyəti üzrə baxan hakim tərəfindən iddianın tam və ya qismən təmin və ya rədd edilməsi haqqında qətnamə qəbul edilir. Azərbaycan Respublikasının Mülki Məcəlləsinin 385.1-ci maddəsinə əsasən, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Həmin Məcəllənin 425.1-ci maddəsinə əsasən, öz hüquqlarını həyata keçirərkən və vəzifələrini icra edərkən tərəflərdən hər biri vicdanlılığın tələb etdiyi tərzdə, yəni şərtləşdirilmiş vaxtda və yerdə lazımi şəkildə, öhdəliyin şərtlərinə və Mülki Məcəllənin tələblərinə müvafiq surətdə, belə şərtlər və tələblər olmadıqda isə işgüzar adətlərə və ya adətən irəli sürülən digər tələblərə müvafiq surətdə hərəkət etməlidir. Həmin Məcəllənin 425.2-ci maddəsinə əsasən, öhdəlikləri icra edərkən tərəflər müqavilənin yerinə yetirilməsinə zəmin yaratmaq üçün birgə hərəkət etməli və müqavilənin məqsədinə çatmağa maneçilik törədə biləcək və ya öhdəliklərin icrasını təhlükəyə məruz qoya biləcək hər cür hərəkətlərdən çəkinməlidirlər. Həmin Məcəllənin 427.3-cü maddəsinə əsasən, əgər öhdəlik onun icrası gününü və ya icra edilməli olduğu vaxt dövrünü nəzərdə tutursa və ya müəyyənləşdirilməyə imkan verirsə, öhdəlik həmin gün və ya bu cür dövr ərzində istənilən an icra edilməlidir. Həmin Məcəllənin 442-ci maddəsinə əsasən, öhdəliyin icra edilməməsi dedikdə, onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. Mülki Məcəllənin 462.1-ci maddəsinə əsasən, dəbbə pulu (cərimə, penya) qanun və ya müqavilə ilə müəyyənləşdirilən, öhdəliyin icra edilmədiyi və ya lazımınca icra edilmədiyi, o cümlədən icranın gecikdirildiyi halda borclunun kreditora ödəməli olduğu pul məbləğidir. Həmin Məcəllənin 465.2-ci maddəsinə əsasən, borclu öhdəliyin lazımınca icra edilməməsi, o cümlədən müəyyənləşdirilmiş müddətdə icra edilməməsi üçün cərimə ödəyəcəyini vəd etmişdirsə, kreditor cərimənin ödənilməsini və öhdəliyin icrasını tələb edə bilər. Həmin Məcəllənin 567-ci maddəsinə əsasən, alğı-satqı müqaviləsinə görə satıcı əşyanı alıcının mülkiyyətinə verməyi, alıcı isə əşyanı qəbul edib əvəzində müəyyənləşdirilmiş pul məbləğini (qiyməti) ödəməyi öhdəsinə götürür. Həmin Məcəllənin 600.1-ci maddəsinə əsasən, alğı-satqı müqaviləsində əşyanın alıcıya verildikdən müəyyən müddət sonra ödənilməsinin (əşyaların nisyə satışının) nəzərdə tutulduğu halda alıcı ödənişi müqavilədə nəzərdə tutulan müddətdə, müqavilədə belə müddət nəzərdə tutulmadıqda isə bu Məcəllənin 427-ci maddəsinə uyğun müəyyənləşdirilmiş müddətdə həyata keçirməlidir. Həmin Məcəllənin 600.4-cü maddəsinə əsasən, əşyanı təhvil almış alıcı onu alğısatqı müqaviləsində nəzərdə tutulan müddətdə ödəmək vəzifəsini icra etmədikdə, satıcı verilmiş əşyanın ödənilməsini və ya ödənilməmiş malın qaytarılmasını tələb edə bilər. Məhkəmənin mövqeyi: Beləliklə, yuxarıda təsvir olunanlarla müəyyən edilir ki, iddiaçı ilə cavabdeh arasında 27 avqust 2022-ci il tarixli 013090 nömrəli, 24 fevral 2024-cü il tarixli 023907 nömrəli alqısatqı müqavilələri bağlanılmış, satıcı qismində çıxış edən iddiaçı müqavilə öhdəliklərinə uyğun olaraq həmin müqavilələrin predmeti olan avadanlıqları cavabdehə təqdim etsə də, alıcı qismində iştirak edən cavabdeh həmin müqavilələr üzrə üzərində götürdüyü öhdəlikləri lazımınca icra etməyərək təhvil aldığı malların dəyərini tam olaraq ödəməmiş və bununla da öhdəliyini lazımınca yerinə yetirməmişdir. Göstərilənlərə əsasən məhkəmə hesab edir ki, 27 avqust 2022-ci il tarixli 013090 nömrəli müqavilə üzrə 420 manat məbləğində və 24 fevral 2024-cü il tarixli 023907 nömrəli müqavilə üzrə 750 manat məbləğində borc məbləğinin cavabdehdən iddiaçının xeyrinə tutulması barədə iddia tələbi əsaslıdır və təmin edilməlidir. İddia tələbinin cavabdehdən 27 avqust 2022-ci il tarixli 013090 nömrəli müqavilə üzrə 12 manat məbləğində, 24 fevral 2024-cü il tarixli 023907 nömrəli müqavilə üzrə isə 18 manat məbləğində cərimənin tutulmasına aid hissəsi ilə bağlı məhkəmə qeyd edir ki, cavabdehin müqavilələr üzrə ödənişlərini gecikdirməsi işin yuxarıda göstərilən halları ilə müəyyən edildiyindən və tərəflər arasında bağlanmış müqavilələrdə öhdəliyin icra edilməsinin gecikdirilməsinə görə cərimə ödənilməsi nəzərdə tutulduğundan (müqavilələrin yuxarıda istinad edilmiş 4.2-ci bəndi) iddiaçı cavabdehdən cərimənin ödənilməsini də tələb etməkdə haqlıdır və iddia tələbi bu hissədə də təmin edilməlidir. Bundan başqa, iddia tələbinin 32 manat məbləğində dövlət rüsumunun əvəzinin cavabdehdən iddiaçının xeyrinə tutulmasına aid hissəsinə gəldikdə, iş materiallarında olan 11 dekabr 2024-cü il tarixli ********** nömrəli ödəniş qəbzindən görünür ki, iddiaçı tərəfindən məhkəməyə müraciət edilən zaman 32 manat məbləğində dövlət rüsumu ödənilmişdir. “Dövlət rüsumu haqqında” Azərbaycan Respublikasının Qanununun 8.1.2-ci maddəsinə əsasən, iddia qiyməti 1000 manatdan 10000 manatadək olduqda 30 manat + 1000 manatdan yuxarı olan iddia qiymətinin 1 faizi məbləğində dövlət rüsumu tutulur. Mülki Prosessual Məcəllənin 107-ci maddəsinə əsasən, məhkəmə xərcləri dövlət rüsumundan və işə baxılması ilə əlaqədar olan məsrəflərdən ibarətdir. Həmin Məcəllənin 119.1-ci maddəsinə əsasən, məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. Hazırkı iddia təmin edildiyindən yuxarıda istinad olunan qanunvericilik normalarının tələblərinə əsasən iddia ərizəsinin verilməsinə görə iddiaçı tərəfindən ödənilmiş 32 manat məbləğində dövlət rüsumunun əvəzi də cavabdehdən iddiaçının xeyrinə tutulmalıdır. Beləliklə, məhkəmə yuxarıda göstərilənləri ümumiləşdirib, istinad olunan qanunvericilik normalarını işin faktiki hallarına tətbiq edərək hesab edir ki, iddia təmin edilməli, cavabdehdən 27 avqust 2022-ci il tarixli 013090 nömrəli müqavilə üzrə 420 manat məbləğində borc, 12 manat məbləğində cərimə, 24 fevral 2024-cü il tarixli 023907 nömrəli müqavilə üzrə 750 manat məbləğində borc, 18 manat məbləğində cərimə və 32 manat məbləğində dövlət rüsumunun əvəzi olmaqla, cəmi 1232 manat məbləğində pul vəsaiti iddiaçının xeyrinə tutulmalıdır. Yuxarıda göstərilənlərə əsasən və Mülki Prosessual Məcəllənin 216-220, 222, 227, 233, 284-1–284-6, 358, 360 və 362-ci maddələrini rəhbər tutaraq, QƏT E T D İ: İddia təmin edilsin. Cavabdeh 27 avqust 2022-ci il tarixli 013090 nömrəli nömrəli alqı-satqı müqaviləsi üzrə 420 (dörd yüz iyirmi) manat məbləğində borc, 12 (on iki) manat məbləğində cərimə, 24 fevral 2024-cü il tarixli 023907 nömrəli alqı-satqı müqaviləsi üzrə 750 (yeddi yüz əlli manat) manat məbləğində borc, 18 (on səkkiz) manat məbləğində cərimə və 32 (otuz iki) manat məbləğində dövlət rüsumunun əvəzi olmaqla, cəmi 1232 (min iki yüz otuz iki) manat məbləğində pul vəsaiti iddiaçı “AZ ESTETİK GROUP" Məhdud Məsuliyyətli Cəmiyyətinin xeyrinə tutulsun. Qətnamədən rəsmi qaydada verildiyi gündən bir ay müddətində Sumqayıt Kommersiya Məhkəməsi vasitəsilə Sumqayıt Apellyasiya Məhkəməsinə apellyasiya şikayəti verilə bilər. Hakim: Fərman Həmidli