Bakı Şəhəri Binəqədi Rayon Məhkəməsi Qərardad — İş №2(001)-3388/2025

Azərbaycan Respublikası adından QƏRARDAD Bakı şəhəri İş № 2(001)-3388/2025 11.04.2025 BAKI ŞƏHƏRİ BİNƏQƏDİ RAYON MƏHKƏMƏSİ Mən, Bakı Şəhəri Binəqədi Rayon Məhkəməsinin hakimi Hətəmzadə Fərid Eldar oğlu, Ərizəçi (maraqlı şəxs qismində Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestri Publik Hüquqi Şəxsi 1 saylı Bakı Ərazi İdarəsi cəlb edilməklə) fərdi yaşayış evi üzərində istifadə və sahiblik hüququnun tanınmasına dair ərizəsinin məhkəmə icraatının mümkünlüyü məsələsinə baxaraq, m ü ə y y ə n e t d i m: Ərizəçi ərizə ilə məhkəməyə müraciət edərək, Bakı şəhəri, Binəqədi rayonu, Binəqədi qəsəbəsi, 3-cü mədən küçəsi, korpus 108 ünvanında olan 111 saylı fərdi yaşayış evi üzərində istifadə və sahiblik hüququnun tanınması barədə qətnamə qəbul edilməsini xahiş etmişdir. Ərizə onunla əsaslandırılmışdır ki, X3 şəxsi mülkiyyətində olan xx.xx.1993-cü il tarixli 22-ci səhifə 3324 qeydəalma nömrəli Bakı şəhəri, Binəqədi rayonu, Binəqədi qəsəbəsi, 3cü mədən küçəsi, korpus 108 ünvanında olan 111 saylı fərdi yaşayış evinin dəyəri onun tərəfindən tam ödənilməklə alqı-satqı yolu ilə almışdır. X2 qaynı X5 Bakı şəhəri 32 saylı Notariat kontoru tərəfindən xx.xx.1993-cü il tarixli 3 il müddətinə etibarnamə verilmişdir ki, X3 şəxsi mülkiyyətində olan Bakı şəhəri, Binəqədi rayonu, Binəqədi qəsəbəsi, 3-cü mədən küçəsi, korpus 108 ünvanında olan 111 saylı fərdi yaşayış evinin alqı-satqısını onunla həyata keçirə bilsinlər, lakin qaynı X1 yaranan problemlərlə bağlı ölkə xaricinə getmiş və o, 3 il müddətinə Bakı şəhərinə qayıtmaması ilə əlaqədar sözügedən etibarnamənin müddəti başa çatmış və onlar əmlakın notarial alqı-satqısını həyata keçirə bilməmişlər. Bununla əlaqədar o, Azərbaycan Respublikası Ədliyyə Nazirliyinin Qeydiyyat və Notariat Baş İdarəsinə qaynı X4 adına verilən xx.xx.1993-cü il tarixli baş etibarnamənin bərpa edilməsi üçün müraciət etmişdir. Onun məktubuna cavab olaraq 3-16-5/2-M-237-6/2023 nömrəli, xx.xx.2023-cü il tarixli məktubla bildirilmişdir ki, aidiyyatı üzrə məhkəməyə müraciət etməyi tövsiyyə olunur. Onun X6ya sözügedən fərdi yaşayış evinin dəyərini tam ödəməyi barədə qonşuları tərəfindən öz imzaları ilə təsdiq edilən akt tərtib edilmişdir. Həmçinin ünvan 1 ünvanında olan fərdi yaşayış evində o və iki övladı ilə birlikdə pasport qeydiyyatında olmaqla yaşayırlar. Ərizə və ona əlavə edilmiş sənədləri nəzərdən keçirərək hesab edirəm ki, ərizənin icraata qəbulundan imtina olunmalıdır. Belə ki, Azərbaycan Respublikası Mülki Prosessual Məcəlləsinin: 307.1-ci maddəsinə əsasən məhkəmə fiziki və hüquqi şəxslərin şəxsi və ya əmlak hüquqlarının əmələ gəlməsi, dəyişməsi, xitam verilməsinin asılı olduğu faktları müəyyən edir; 307.2 və 307.2.6-cı maddələrinə əsasən məhkəmə mülkiyyət hüququ üzrə daşınmaz əmlaka sahiblik, ondan istifadə etmək və onun barəsində sərəncam vermək faktının müəyyən edilməsi barədə işlərə baxır; 310.1-ci maddəsinə əsasən ərizədə həmin faktın müəyyən edilməsinin ərizəçiyə nə məqsəd üçün lazım olduğu, habelə lazımi sənədləri ərizəçinin ala bilməməsini, yaxud itən sənədlərin bərpasının mümkünsüzlüyünü təsdiq edən sübutlar göstərilməlidir. “Hüquqi əhəmiyyəti olan faktların müəyyən edilməsinə dair işlər üzrə məhkəmə təcrübəsinin bəzi məsələləri haqqında” Azərbaycan Respublikası Ali Məhkəməsi Plenumunun 12 aprel 2019-cu il tarixli, 03 saylı qərarının 7-ci maddəsinə əsasən Azərbaycan Respublikası MPM-nin 307.2.6-cı maddəsinə əsasən mülkiyyət hüququ üzrə daşınmaz əmlaka sahiblik, ondan istifadə etmə və onun barəsində sərəncam vermə faktı məhkəmə qaydasında o vaxt müəyyən edilə bilər ki, özünü daşınmaz əmlakın mülkiyyətçisi hesab edən şəxs həmin əmlakın ona məxsus olduğunu təsdiq edən hüquqmüəyyənedici sənədləri itirmiş olsun və yaxud bu sənədlərin məhkəmədən kənar qaydada bərpası mümkün olmasın. Mülki-prosessual qanunvericiliyin tələblərindən göründüyü kimi, daşınmaz əmlakdan sahiblik və istifadə etmə faktı məhkəmə qaydasında o vaxt müəyyən edilə bilər ki, həmin əmlak mülkiyyət hüququ üzrə ərizəçiyə məxsus olsun və bunu təsdiq edən sənədlər itirilmiş olsun və yaxud bu sənədlərin məhkəmədən kənar qaydada bərpası mümkün olmasın. Ərizədən və ona əlavə edilmiş sənədlərdən isə görünür ki, ərizədə göstərilən daşınmaz əmlak ərizəçinin mülkiyyətində deyil. Azərbaycan Respublikası Mülki Prosessual Məcəlləsinin: 153.2 və 153.2.1-ci maddələrinə əsasən ərizəyə məhkəmə qaydasında və ya mülki məhkəmə icraatı qaydasında baxılmalı deyildirsə hakim iddianın yolverilməzliyinə görə iddia ərizəsini qəbul etməkdən imtina edir. 153.3-cü maddəsinə əsasən hakim ərizəni qəbul etməkdən imtina barədə əsaslandırılmış qərardad çıxarır. İşə məhkəmə qaydasında və ya mülki məhkəmə icraatı qaydasında baxılmalı deyildirsə, iddiaçının hansı orqana və ya məhkəməyə müraciət etməli olmasını orada göstərir. 114.1 və 114.1.2-ci maddələrinə əsasən bu Məcəllə ilə nəzərdə tutulmuş əsaslarla ərizəni baxılmaq üçün qəbul etməkdən imtina edilərsə ödənilmiş dövlət rüsumu qaytarılır. 114.2-ci maddəsinə əsasən məhkəmə dövlət rüsumunun qaytarılması məsələsi barədə qərardad çıxarır, qərardadda dövlət rüsumunun tam və ya qismən qaytarılmasının əsasları göstərilir. Beləliklə hesab edirəm ki, ərizənin icraata qəbul edilməsindən imtina edilməli, ərizə və ona əlavə edilmiş sənədlər ərizəçiyə geri qaytarılmalıdır. Göstərilənlərə əsasən və Azərbaycan Respublikası Mülki Prosessual Məcəlləsinin 153, 263 və 264-cü maddələrini rəhbər tutaraq, q ə r a r a a l d ı m: Ərizəçi (maraqlı şəxs qismində Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestri Publik Hüquqi Şəxsi 1 saylı Bakı Ərazi İdarəsi cəlb edilməklə) fərdi yaşayış evi üzərində istifadə və sahiblik hüququnun tanınmasına dair ərizəsinin icraata qəbul edilməsindən imtina edilsin, ərizə və ona əlavə edilmiş sənədlər ərizəçiyə geri qaytarılsın. Qərardad rəsmi qaydada verildikdən sonra ondan 10 gün müddətində Elektron Məhkəmə İnformasiya Sistemində yaradılan elektron kabinet vasitəsilə Bakı Şəhəri Binəqədi Rayon Məhkəməsinə şikayət verilə bilər. Hakim Fərid Hətəmzadə