Bakı Şəhəri Yasamal Rayon Məhkəməsi Qətnamə — İş №2(004)-3223/2022

Azərbaycan Respublikası adından QƏTNAMƏ Bakı şəhəri İş № 2(004)-3223/2022 06.09.2022 BAKI ŞƏHƏRİ YASAMAL RAYON MƏHKƏMƏSİ Hakim Xəlilova Təhminə Cəmil qızının sədrliyi Allahverdiyeva Aytac Fizuli qızının katibliyi İddiaçı iştirakı ilə İddiaçı Məlikova (Əhmədova) Gülsədəf Məmməd qızının Cavabdeh qarşı nikahın etibarsız sayılması tələbinə dair mülki işə açıq məhkəmə iclasında baxaraq MÜƏYYƏN ETDİ : İddiaçı cavabdehə qarşı iddia ərizəsi ilə məhkəməyə müraciət edərək, tərəflər arasında xx.xx.2021-ci il tarixdə Yasamal Rayon Qeydiyyat Şöbəsində 307 nömrəli akt qeydinə əsasən bağlanılmış nikahın etibarsız sayılması barədə qətnamə qəbul edilməsini xahiş etmişdir. İddia tələbi onunla əsaslandırılmışdır ki, iddiaçı xx.xx.2016-cı il tarixdə 5 saylı “Bakı Asan Xidmət” Mərkəzinin qeydiyyat şöbəsində X1 ilə nikaha daxil olmuşdur. xx.xx.2019-cu il tarixdə müəyyən səbəblərdən Zaqatala Rayon Qeydiyyat Şöbəsində nikahları pozulmuşdur. Daha sonra isə cavabdeh ilə tanış olmuşdur. Bir müddət bir-birilərini tanıdıqdan sonra müəyyən şərtlərini olmasını bildirmişdir. Məlik yalnız nikaha daxil olduqdan sonra şərtləri yerinə yetirəcəyini bildirmişdir. Nikaha daxil olduqdan sonra Məlik ona demişdir ki, toya onun ailəsi tərəfindən heç kim gəlməyəcəkdir. Gəlməməklərinə səbəb onun boşanması olmuşdur. Cavabdeh boşanmasını heç kimin bilməməsini istəmişdir. İddiaçı cavabdehlə razılaşmışdır. Lakin cavabdeh verdiyi sözlərin heç birini tutmamışdır. Aralarında müəyyən söhbətlər olmuş, razılaşma olmadığından toyları da olmamışdır. Məhkəmə iclasında iddiaçı iddia ərizəsinin məzmununa uyğun izahat verərək, iddianın təmin edilməsi barədə qətnamə çıxarılmasını məhkəmədən xahiş etmişdir. Məhkəmə iclasının vaxtı və yeri barədə lazımi qaydada xəbərdar edilmiş cavabdeh məhkəmə iclasına gəlməmiş, səbəbləri barədə məlumat verməmişdir. Məhkəmə, Azərbaycan Respublikası Mülki Prosessual Məcəlləsinin 185-ci maddəsinə əsasən işə tərəflərin iştirakı olmadan baxılmasını mümkün hesab etmişdir. Məhkəmə tərəfin izahatını dinləyib, iş materiallarını araşdırıb və sübutlara məcmu halda hüquqi qiymət verərək hesab edir ki, iddia təmin edilməməlidir. Azərbaycan Respublikası Ailə Məcəlləsinin 25.1-ci maddəsinə əsasən bu məcəllənin 10—12-ci maddələrində və 13.7-ci maddəsində nəzərdə tutulmuş şərtlər pozulduqda, eləcə də tərəflərdən birinin və ya hər ikisinin ailə qurmaq niyyəti olmadıqda bağlanan nikah (saxta nikah) etibarsız sayılır. Həmin Məcəllənin 25.2-ci maddəsinə əsasən nikah məhkəmə qaydasında etibarsız sayılır. Həmin Məcəllənin 25.4-cü maddəsinə əsasən etibarsız hesab edilmiş nikah onun bağlandığı gündən etibarsız sayılır. Həmin Məcəllənin 27.3-cü maddəsinə əsasən saxta nikaha daxil olmuş şəxslər məhkəmədə işə baxılana qədər faktiki olaraq ailə qurublarsa, məhkəmə nikahı saxta hesab edə bilməz. Beləliklə məhkəmə iclasında tədqiq olunmuş sübutlardan müəyyən olunmuşdur ki, tərəflərin nikah bağlanarkən ailə qurmaq niyyəti olmuşdur. Odur ki, iddia əsassızdır və rədd edilməlidir. Mülki Prosessual Məcəllənin 119.1-ci maddəsinə görə məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. Məhkəmə hesab edir ki, iddia rədd edildiyindən iddiaçı tərəfindən iddia ərizəsinin verilməsi üçün ödənilmiş 50 manat dövlət rüsumu iddiaçıya aid edilməlidir. Yuxarıdakılara əsasən və Azərbaycan Respublikası Mülki Prosessual Məcəlləsinin 216-220, 227, 360-cı maddələrini rəhbər tutaraq QƏT ETDİ : İddia rədd edilsin. Nikahın etibarsızlığı iddiası ilə əlaqədar iddiaçı tərəfindən ödənilmiş 100 (yüz) manat məbləğində dövlət rüsumu iddiaçıya aid edilsin. Qətnamədən rəsmi verildiyi gündən bir ay müddətində apellyasiya şikayəti verilə bilər. Qətnamədən şikayət verilməzsə, işdə iştirak edən şəxslərə rəsmi qaydada verildiyi gündən 1 ay keçdikdən sonra qanuni qüvvəyə minir. Hakim Təhminə Xəlilova