Bakı Şəhəri Yasamal Rayon Məhkəməsi Qətnamə — İş №2(004)-7041/2025

Azərbaycan Respublikası adından QƏTNAMƏ Bakı şəhəri İş № 2(004)-7041/2025 19.02.2026 BAKI ŞƏHƏRİ YASAMAL RAYON MƏHKƏMƏSİ Hakim Oruclu Aydan Adəm qızının sədrliyi, Məhkəmə iclasının katibi Şəfiyev Rəhman İntizar oğlunun katibliyi, İddiaçı iştirakı ilə, İddiaçı Cavabdeh qarşı “pul” tələbinə dair iddia ərizəsi üzrə mülki işə məhkəmənin inzibati binasında açıq məhkəmə iclasında baxaraq, məhkəmə MÜƏYYƏN ETDİ: İddiaçı Cavabdeh qarşı “pul” tələbinə dair iddia ərizəsi ilə məhkəməyə müraciət edərək, Cavabdeh onun kart hesabına göndərdiyi 2264 manat pulun və 43 manat dövlət rüsumunun, ümumilikdə 2307 manat pulun alınıb ona verilməsi barədə qətnamə çıxarılmasını xahiş etmişdir. İddia tələbi onunla əsaslandırılmışdır ki, xx xxxxxx 1987-ci il tarixində Lerik rayon Pirasora kəndidə anadan olmaqla həmən kənddə yaşayır. Həyat yoldaşı X1 vəzi xərçəngindən əziyyət çəkir. Müxtəlif xəstəxanalarda müalicə olunmasına baxmayaraq, vəziyyəti günü-gündən pisləşməyə doğru gedir. Cavabdeh ilə xəstəxanaların birində tanış olmuşdur. Ona etdiyi müalicələrin faydasız olduğunu bildirərək bitki müalicəsi təklif etmişdir. Yoldaşının vəziyyətinin günü-gündən pisləşməsi səbəbindən çarəsiz vəziyyətdə olduqlarını üçün ona inanmışlar. Cavabdeh onlara bitki tərkibli dərmanlarla yoldaşını sağaltmaq vədəsi ilə aldatmış, 24 may 2025-ci il tarixində 1010 manat, 27 may 2025-ci il tarixində 1000 manat, 07 iyun 2025-ci il tarixində 100 manat, 18 avqust 2025-ci il tarixində 114 manat və 07 iyun tarixində 40 manat olmaqla, ümumilikdə 2264 manat pul Cavabdeh bank kartına köçürmüşdür. O da öz növbəsində ona xaricdən bitki tərkibli dərmanlar gətirəcəyi vədi vermiş, sonradan onları aldadaraq telefonlara cavab verməmişdir. Onların çarəsiz vəziyyətlərindən istifadə edərək onu aldatmışdır. Bütün bunları nəzərə alaraq Cavabdeh 2264 manat pulun alınıb ona verilməsi zəruriəti yaranmışdır. Məhkəmə iclasında iştirak edən İddiaçı iddianı müdafiə edərək, iddia ərizəsinin məzmununa uyğun izahat verərək, iddianın təmin edilməsi barədə qətnamə qəbul edilməsini xahiş etdi. Məhkəmə iclasının vaxtı və yeri barədə lazımi qaydada məlumat verilməsinə baxmayaraq Cavabdeh məhkəmə iclasında iştirak etməmiş, iştirak etməməsinin səbəbləri barədə məhkəməyə məlumat verməmişdir. Azərbaycan Respublikasının Mülki Prossesual Məcəlləsinin 185.5-ci maddəsinə əsasən məhkəmə iclasının vaxtı və yeri haqqında lazımi qaydada xəbərdar edilmiş cavabdehin gəlməməsinin səbəbləri haqqında məlumat olmadıqda və ya məhkəmə gəlməməyin səbəblərini üzürsüz hesab etdikdə, yaxud məhkəmə cavabdehin icraatı qəsdən yubandırdığını aşkar etdikdə, işə baxmağa haqlıdır. Bu halda qətnamə çəkişmə şəraitində qəbul edilmiş kimi qiymətləndirilərək cavabdehə apellyasiya qaydasında şikayət etmək hüququ verilir. İş materiallarında olan xx.xx.2025-ci il tarixli ödəniş qəbzinə əsasən ****6796 nömrəli kart nömrəsindən ****6818 nömrəli kart nömrəsinə (Calala T*****) 1000 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****4060 nömrəli kart nömrəsindən ****6818 nömrəli kart nömrəsinə (Calala T*****) 500 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****5595 nömrəli kart nömrəsindən ****6818 nömrəli kart nömrəsinə (Calala T*****) 500 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****4060 nömrəli kart nömrəsindən ****4427 nömrəli kart nömrəsinə 100 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****4060 nömrəli kartdan kredit ödənişi üçün 40 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****4060 nömrəli kart nömrəsindən ****3681 nömrəli kart nömrəsinə 48 manat köçürülmüşdür. İş materiallarında olan xx.xx.2025-ci il tarixli ödəniş qəbzinə əsasən ****4060 nömrəli kart nömrəsindən ****3681 nömrəli kart nömrəsinə 66 manat köçürülmüşdür. Məhkəmə iddiaçının izahatını dinləyib, iş materiallarını tədqiq edərək hesab edir ki, iddia təmin edilməməlidir. Belə ki, Azərbaycan Respublikasının Mülki Məcəlləsinin: 385.1-ci maddəsinə görə, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. 386.1-ci maddəsinə əsasən öhdəliyin zərər vurulması, əsassız varlanma və ya bu Məcəllədə nəzərdə tutulmuş digər əsaslar nəticəsində əmələ gəlməsi halları istisna olmaqla, öhdəliyin əmələ gəlməsi üçün onun iştirakçıları arasında müqavilə olmalıdır. 390.1-ci maddəsinə əsasən fiziki və hüquqi şəxslər azad surətdə müqavilələr bağlaya və bu müqavilələrin məzmununu müəyyənləşdirə bilərlər. Onlar bu Məcəllədə nəzərdə tutulmayan, lakin ona zidd olmayan müqavilələr də bağlaya bilərlər. 399.1-ci maddəsinə əsasən müqavilə bağlandığı andan qüvvəyə minir və tərəflər üçün məcburi olur. 425.1-ci maddəsinə əsasən öz hüquqlarını həyata keçirərkən və vəzifələrini icra edərkən tərəflərdən hər biri vicdanlılığın tələb etdiyi tərzdə, yəni şərtləşdirilmiş vaxtda və yerdə lazımi şəkildə, öhdəliyin şərtlərinə və bu Məcəllənin tələblərinə müvafiq surətdə, belə şərtlər və tələblər olmadıqda isə işgüzar adətlərə və ya adətən irəli sürülən digər tələblərə müvafiq surətdə hərəkət etməlidir. 442-ci maddəsinə əsasən öhdəliyin icra edilməməsi dedikdə, onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. 445.2.1 və 445.2.2-ci maddələrinə əsasən öhdəliyin onun icrası üçün müəyyənləşdirilmiş müddətdə icra edilməməsi və icra müddəti çatanadək kreditorun etdiyi xəbərdarlıqdan sonra da öhdəliyin icra edilməməsi borclunun icranı gecikdirməsi sayılır. 448.1-ci maddəsinə əsasən əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir. Azərbaycan Respublikasının Mülki Prosessual Məcəlləsinin: 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. 88-ci maddəsinə əsasən məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verir. Heç bir sübutun məhkəmə üçün qabaqcadan müəyyən edilmiş qüvvəsi yoxdur. 106.1-cı maddəsinə əsasən işdə iştirak edən şəxslərin iş üçün əhəmiyyətli olan və onlara məlum olan faktlar barədə izahatları iş üzrə toplanmış digər sübutlarla yanaşı yoxlanılmalı və qiymətləndirilməlidir. 217.4-cü maddəsinə əsasən məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. İddiaçı iddia ərizəsində Cavabdeh bank kartına bitki tərkibli dərmanlarla yoldaşını müalicə edəcəyinə dair verdiyi vədə inanaraq, müxtəlif tarixlərdə ümumilikdə 2264 manat köçürdüyünü bildirmişdir. Hazırda İddiaçı Cavabdeh 2264 manat və 43 manat dövlət rüsumunun, ümumilikdə 2307 manat pulun alınıb ona verilməsi tələbi ilə məhkəməyə müraciət etmişdir. Məhkəmə iclasında iştirak edən İddiaçı aldadıldığını, etibarından suiistifadə edildiyini bildirmişdir. Məhkəmə ilk öncə qeyd edir ki, mülki məhkəmə icraatının prinsipinə görə sübutların toplanması və təqdim edilməsi yükü bütünlüklə tərəflərin üzərinə düşür. Məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir, hər bir tərəf isə öz tələblərinin və etirazlarının əsası kimi istinad etdiyi halları sübut etməlidir. İşin faktiki hallarını obyektiv surətdə aşkara çıxarmağa imkan verən sübutlar təqdim olunması tərəflərin birbaşa vəzifəsidir. Hər bir dəlilin söykəndiyi sübutun mötəbərliyi şübhə yaratmamalıdır. Sübuta yetirilməyən tələb isə əsaslı hesab edilə bilməz. Göründüyü kimi, iddiaçı tərəfindən təqdim edilmiş bank qəbzlərinə əsasən Cavabdeh adına olan bank kartına və digər bank kartlarına müxtəlif vaxtlarda pullar köçürüldüyü müəyyən olunsa da, həmin ödənişlərin hansı hüquqi əsasla və hansı şərtlərlə həyata keçirildiyi məhkəmə araşdırması zamanı müəyyən olunmamışdır. Beləliklə, məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verərək, sadalanan qanunvericilik normalarını rəhbər tutaraq, işin faktiki hallarını nəzərə alaraq hesab edir ki, İddiaçı Cavabdeh qarşı “pul” tələbinə dair iddiası təmin edilməməlidir. Məhkəmə xərcləri ilə əlaqədar məsələyə münasibətdə məhkəmə hesab edir ki, iddia təmin edilmədiyindən məhkəmə xərcləri iddiaçıya aid edilməlidir. Belə ki, Azərbaycan Respublikasının Mülki Prosessual Məcəlləsinin 119.1-ci maddəsinə əsasən, məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. Göstərilənlərə əsasən və Azərbaycan Respublikası Mülki Prosessual Məcəlləsinin 216-220, 227, 233, 360-cı maddələrini rəhbər tutaraq, məhkəmə QƏT ETDİ: İddia təmin edilməsin. Qətnamədən rəsmi qaydada verildiyi gündən 1 (bir) ay müddətində “Elektron məhkəmə” informasiya sistemində yaradılan elektron kabinetdən Bakı Şəhəri Yasamal Rayon Məhkəməsi vasitəsi ilə Bakı Apellyasiya Məhkəməsinin Mülki Kollegiyasına apellyasiya şikayəti verilə bilər. Qətnamədən şikayət verilmədikdə, işdə iştirak edən şəxslərə rəsmi qaydada verildiyi gündən 1 (bir) ay keçdikdən sonra qanuni qüvvəyə minir. Hakim: Aydan Oruclu