Bakı Şəhəri Nərimanov Rayon Məhkəməsi Qətnamə — İş №2(005)-3327/2021

Azərbaycan Respublikası adından QƏTNAMƏ Bakı şəhəri İş № 2(005)-3327/2021 10.08.2021 BAKI ŞƏHƏRİ NƏRİMANOV RAYON MƏHKƏMƏSİ Hakim Novruzova Aytən Nazim qızının sədrliyi Məhkəmə iclasının katibi X1, İddiaçı "xxxx" MMC-nin nümayəndəsi X3 iştirakı ilə, İddiaçı "xxxx" MMC-nin Cavabdeh qarşı “pul” tələbinə dair iddia ərizəsi üzrə mülki işə məhkəmənin inzibati binasında, açıq məhkəmə iclasında baxaraq, məhkəmə müəyyən etdi: İddiaçı "xxxx" MMC Cavabdeh qarşı iddia ərizəsi ilə məhkəməyə müraciət edərək, 13.12.2019-cu il tarixli müqavilə üzrə DECT GİGASET C530 markalı ev telefonu, İMEİ kodu **********59592 olan Samsung Galaxy A30s markalı telefon üçün 438 (dörd yüz otuz səkkiz) manat ödənilməmiş hissə, 131 (yüz otuz bir) manat dəbbə, 27.05.2020-ci il tarixli müqavilə üzrə İMEİ kodu **********43155 olan X8 9S markalı telefon, Xiaomi qulaqlıq üçün 723.6 (yeddi yüz iyirmi üç manat altmış qəpik) manat ödənilməmiş hissə, 195.4 (yüz doxsan beş manat qırx qəpik) manat dəbbə, 11.07.2020-ci il tarixli müqavilə üzrə HOFFMANN kondisioner üçün 1144.8 (min yüz qırx dörd manat səksən qəpik) manat ödənilməmiş hissə, 285.2 (iki yüz səksən beş manat iyirmi qəpik) manat dəbbə, ümumilikdə 2918 manat borc, 30 manat ödənilmiş dövlət rüsumu Cavabdeh alınaraq "xxxx" Məhdud Məsuliyyətli Cəmiyyətinə ödənilməsi barədə qətnamə çıxarılmasını xahiş etmişdir. İddiaçı "xxxx" MMC iddia tələbini onunla əsaslandırmışdır ki, cavabdeh "xxxx" MMC ilə 13.12.2019-cu il 27.05.2020-ci il və 11.07.2020-ci il tarixli müqaviləsinə əsasən, DECT GİGASET C530 markalı ev telefonu, İMEİ kodu **********59592 olan Samsung Galaxy A30s markalı telefon, İMEİ kodu **********43155 olan X8 9S markalı telefon, Xiaomi qulaqlıq, HOFFMANN kondisioner almış və nəticədə 2918 (iki min doqquz yüz on səkkiz) manat borc yaranmışdır. Cavabdeh müqavilənin şərtlərini pozmuş və nəticədə 13.12.2019-cu il tarixli müqaviləsinə əsasən, alqı-satqı qiyməti 876 (səkkiz yüz yetmiş altı) manat (12 ay x 73 manat + 0 manat ilkin ödəniş) olan DECT GİGASET C530 markalı ev telefonu, İMEİ kodu **********59592 olan Samsung Galaxy A30s markalı telefon üçün ümumilikdə, 569 (beş yüz altmış doqquz) manat olmaqla ondan, 438 (dörd yüz otuz səkkiz) manat ödənilməmiş hissə, müştəriyə güzəşt olunaraq 131 (yüz otuz bir) manat dəbbə; 27.05.2020-ci il tarixli müqaviləsinə əsasən, alqı-satqı qiyməti 789.6 (yeddi yüz səksən doqquz manat altmış qəpik) manat (12 ay x 65.8 manat + 0 manat ilkin ödəniş) olan İMEİ kodu **********43155 olan X8 9S markalı telefon, Xiaomi qulaqlıq üçün ümumilikdə, 919 (doqquz yüz on doqquz) manat olmaqla ondan, 723.6 (yeddi yüz iyirmi üç manat altmış qəpik) manat ödənilməmiş hissə, müştəriyə güzəşt olunaraq 195.4 (yüz doxsan beş manat qırx qəpik) manat dəbbə; 11.07.2020-ci il tarixli müqaviləsinə əsasən, alqı-satqı 1144.8 (min yüz qırx dörd manat səksən qəpik) manat (12 ay x 95.4 manat + 0 manat ilkin ödəniş) olan HOFFMANN kondisioner üçün ümumilikdə, 1430 (min dörd yüz otuz) manat olmaqla ondan, 1144.8 (min yüz qırx dörd manat səksən qəpik) manat ödənilməmiş hissə, müştəriyə güzəşt olunaraq 285.2 (iki yüz səksən beş manat iyirmi qəpik) manat dəbbə, cavabdehin cəmi ödədiyi məbləğ 504 manat təşkil edir, ödəniş cədvəlinin 2-ci bəndinə əsasən ödənişlərdə gecikmələr aşkarlanıbsa, müddəti keçmiş məbləğin hər növbəti təqvim gününə hesablanmış 1%-i həcmində mübahisəsiz olaraq penya ödəyir. Ödəniş cədvəlinin 3-cü bəndinə əsasən ödəniş edilən zaman hesablanmış penya aşkarlanırsa, müştərinin ödədiyi məbləğin 50%-nə qədər hissəsi penya ödənilməsinə yönəldilə bilər. Məhkəmə iclasında iddiaçı "xxxx" MMC-nin nümayəndəsi X4 iddia tələbinin dəlillərinə uyğun izahat verərək, iddianın təmin olunması barədə qətnamə çıxarılmasını xahiş etmişdir. Məhkəmə iclaslarının yeri və vaxtı barədə cavabdeh X2 lazımi qaydada məlumat verilməsinə baxmayaraq, cavabdeh heç bir səbəb təqdim etmədən məhkəmə iclaslarında iştirak etməmişdir. Məhkəmə Azərbaycan Respublikası MPM-nin 185.5-ci maddəsinin tələblərinə əsasən işə cavabdehin iştirakı olmadan baxılmasını mümkün hesab etmişdir. Məhkəmə tərəfin izahatlarını dinləyib, iş materiallarını araşdırıb, toplanmış və məhkəmə iclasında araşdırılmış sübutlara məcmu halda hüquqi qiymət verərək hesab edir ki, iddia qismən təmin edilməlidir. Belə ki, mülki işin materiallarında olan və məhkəmə baxışında tədqiq edilmiş: "xxxx" MMC ilə Cavabdeh arasında bağlanmış 11.07.2020-ci il tarixli, 21014777 nömrəli əşyanın nisyə alqı-satqısına dair müqaviləyə və müqaviləyə əlavələrə əsasən Cavabdeh "xxxx" MMC-dən qiyməti 1144,8 manat olan HOFFMANN markalı kondisioneri almış və 12 ay müddətinə 0 manat ilkin ödəniş olmaqla ayda 95,4 manat ödəniş etməyi öhdəsinə götürmüşdür; "xxxx" MMC ilə Cavabdeh arasında bağlanmış 27.05.2020-ci il tarixli əşyanın nisyə alqısatqısına dair müqaviləyə və müqaviləyə əlavələrə əsasən Cavabdeh "xxxx" MMC-dən qiyməti 789,6 manat olan İMEİ kodu **********43155 olan X8 9S markalı telefon, Xiaomi qulaqlıq almış, 12 ay müddətinə 0 manat ilkin ödəniş olmaqla ayda 65,8 manat ödəniş etməyi öhdəsinə götürmüşdür; "xxxx" MMC ilə Cavabdeh arasında bağlanmış 13.12.2019-cu il tarixli, 01123519 nömrəli əşyanın nisyə alqı-satqısına dair müqaviləyə və müqaviləyə əlavələrə əsasən Cavabdeh "xxxx" MMC-dən qiyməti 876 manat olan DECT GİGASET C530, İMEİ kodu **********59592 olan Samsung Galaxy A30s markalı telefon almış və 12 ay müddətinə 0 manat ilkin ödəniş olmaqla, ayda 73 manat ödəniş etməyi öhdəsinə götürmüşdür; 13.12.2019, 27.05.2020 və 11.07.2020-ci il tarixli əşyanın təhvil-təslim aktlarına əsasən DECT GİGASET C530, İMEİ kodu **********59592 olan Samsung Galaxy A30s markalı telefon, İMEİ kodu **********43155 olan X8 9S markalı telefon, Xiaomi qulaqlıq, HOFFMANN kondisioner Cavabdeh təhvil verilmişdir; "xxxx" MMC-nin 26.05.2021-ci il tarixli maliyyə arayışına əsasən Cavabdeh 13.12.2019, 27.05.2020 və 11.07.2020-ci il tarixli müqavilələrinə əsasən "xxxx" MMC-dən DECT GİGASET C530, İMEİ kodu **********59592 olan Samsung Galaxy A30s markalı telefon, İMEİ kodu **********43155 olan X8 9S markalı telefon, Xiaomi qulaqlıq, HOFFMANN kondisioneri almışdır. Cavabdeh bu günə kimi iki müqavilələr üzrə 504 manat ödəmiş, 26.05.2021-ci il tarixə cavabdehin cəmiyyətə 2306,4 manat məbləğində ödənilməmiş əsas borcu, 611,6 manat dəbbə pulu borcu, cəmi 2918 manat borcu vardır; "xxxx" MMC tərəfindən Cavabdeh ünvanlanan 16.12.2020-ci il tarixli xəbərdarlıq məktubuna əsasən cavabdehdən alqı-satqı müqavilələri üzrə öhdəliyini yerinə yetirməsi tələb edilmiş, əks halda müqavilənin qiymətinin tam ödənilməsi və müqavilənin ləğv olunması barədə məhkəmədə iddia qaldıracağı barədə cavabdehə xəbərdarlıq edilmişdir; 27.05.2021-ci il tarixli ödəniş qəbzinə əsasən iddiaçı "xxxx" MMC tərəfindən Bakı Şəhəri Nərimanov Rayon Məhkəməsində iddia qaldırmaq üçün 30 manat məbləğində pul ödənilmişdir. Azərbaycan Respublikası Mülki Məcəlləsinin: 385.1-ci maddəsinə əsasən öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır; 427.3-cü maddəsinə əsasən əgər öhdəlik onun icrası gününü və ya icra edilməli olduğu vaxt dövrünü nəzərdə tutursa və ya müəyyənləşdirməyə imkan verirsə, öhdəlik həmin gün və ya bu cür dövr ərzində istənilən an icra edilməlidir; 442-ci maddəsinə əsasən öhdəliyin icra edilməməsi dedikdə onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür; 443.1-ci maddəsinə görə öhdəliyini icra etməyən borclu kreditora dəymiş zərərin əvəzini ödəməyə borcludur; 448.1-ci maddəsinə əsasən əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir; 567-ci maddəsinə əsasən alqı-satqı müqaviləsinə görə satıcı əşyanı alıcının mülkiyyətinə verməyi, alıcı isə əşyanı qəbul edib əvəzində müəyyənləşdirilmiş pul məbləğini (qiyməti) ödəməyi öhdəsinə götürür; 600.1-ci maddəsinə əsasən alqı-satqı müqaviləsində əşyanın alıcıya verildikdən müəyyən müddət sonra ödənilməsinin (əşyanın nisyə satışının) nəzərdə tutulduğu halda alıcı ödənişi müqavilədə nəzərdə tutulan müdətdə, müqavilədə belə müddət nəzərdə tutulmadıqda isə bu Məcəllənin 427-ci maddəsinə uyğun müəyyənləşdirilmiş müddətdə həyata keçirməlidir; 600.4-cü maddəsinə əsasən əşyanı təhvil almış alıcı onu alğı-satqı müqaviləsində nəzərdə tutulan müddətdə ödəmək vəzifəsini icra etmədikdə satıcı verilmiş əşyanın ödənilməsini və ya ödənilməmiş malın qaytarılmasını tələb edə bilər; 601.1-ci maddəsinə əsasən əşyanın nisyə satılması haqqında müqavilədə onun hissə-hissə ödənilməsi nəzərdə tutula bilər. Hissə-hissə ödəmə şərti ilə əşyanın nisyə satılması haqqında müqavilə o halda bağlanmış sayılır ki, alğı-satqı müqaviləsinin digər mühüm şərtləri ilə yanaşı əşyanın qiyməti, ödənişlərin qaydası, müddətləri və məbləğləri nəzərdə tutulmuş olsun. Məhkəmə baxışında tədqiq olunmuş sübutlarla müəyyən edilmişdir ki, "xxxx" MMC ilə Cavabdeh arasında bağlanmış 13.12.2019, 27.05.2020 və 11.07.2020-ci il tarixli əşyanın nisyə alqı-satqısına dair müqavilələrə əsasən Cavabdeh "xxxx" MMC-dən qiyməti 876 manat olan DECT GİGASET C530, İMEİ kodu **********59592 olan Samsung Galaxy A30s markalı telefon almış və 12 ay müddətinə 0 manat ilkin ödəniş olmaqla, ayda 73 manat ödəniş etməyi, qiyməti 789,6 manat olan İMEİ kodu **********43155 olan X8 9S markalı telefon, Xiaomi qulaqlıq almış, 12 ay müddətinə 0 manat ilkin ödəniş olmaqla ayda 65,8 manat ödəniş etməyi, qiyməti 1144,8 manat olan HOFFMANN markalı kondisioneri almış və 12 ay müddətinə 0 manat ilkin ödəniş olmaqla ayda 95,4 manat aylıq ödəniş etməyi bu şərtləri pozduqda qalıq məbləğinin hər növbəti təqvim gününə hesablanmış 1% həcmində mübahisəsiz olaraq penya ödəməyi barədə öhdəlik götürmüşdür (Müqavilənin 3.3-cü bəndi). İddiaçı "xxxx" MMC Cavabdeh tərəfindən 26.05.2021-ci il tarixinə onun 2306,4 manat məbləğində ödənilməmiş əsas borcu, 611,6 manat dəbbə pulu borcu, cəmi 2918 manat məbləğində borcunun yarandığını iddia edir və bu məbləği cavabdehdən tələb edir. Cavabdeh tərəfindən hər hansı məbləğdə borcun ödənilməsini təsdiq edən sənəd mövcud deyil. Məhkəməyə müraciət etməkdən əvvəl iddiaçı cavabdehə müvafiq bildiriş göndərməklə yaranmış borcun və ya əşyaların qaytarılmasını tələb etmiş, əks təqdirdə məsələ ilə bağlı məhkəməyə müraciət ediləcəyi barədə cavabdehə xəbərdarlıq etmişdir, lakin bu bir nəticə verməmişdir. İddiaçı tərəfindən 30 manat məbləğində dövlət rüsumu ödənilmişdir. Göründüyü kimi, iddiaçı ilə cavabdeh arasında bağlanmış nisyə alqı-satqı müqavilələrinə əsasən iddiaçı müqavilənin predmetləri olan və yuxarıda göstərilən əşyaları müəyyən edilmiş müddətlərdə və məbləğlərdə onun dəyərini ödəmək şərti ilə cavabdehə nisyə satmışdır. Həmin müqavilələrdə əşyaların qiyməti, ödənişin qaydası, müddəti və məbləği göstərilmişdir. Cavabdeh həmin əşyaları qəbul etmiş, lakin müqavilələr üzrə müəyyən edilmiş müddətlərdə və məbləğlərdə ödənişlər etməyərək, müqavilələrin şərtlərini pozmuşdur. Nəticədə iddiaçıya borcu yaranmışdır. Məhkəmə hesab edir ki, iddia tələbi əsas borcun tutulması hissəsində əsaslıdır və tam təmin edilməli, Cavabdeh onun risk dairəsinə daxil olan öhdəliyin icra edilmədiyi bütün hallar üçün cavabdeh olduğundan, öz öhdəliyinin hər bir təqsirli pozuntusuna görə məsuliyyət daşıyaraq, 13.12.2019, 27.05.2020 və 11.07.2020-ci il tarixli müqavilələr üzrə yaranmış cəmi 2306,4 manat məbləğində əsas borcu iddiaçıya ödəməlidir. Azərbaycan Respublikası Mülki Məcəlləsinin: 462.1-ci maddəsinə görə dəbbə pulunun ödənilməsi tələbi üzrə kreditor ona zərər vurulduğunu sübuta yetirməyə borclu deyildir; 463.1-ci maddəsinə əsasən dəbbə pulu haqqında razılaşma əsas öhdəliyin formasından asılı olmayaraq yazılı formada bağlanmalıdır; 465.2-ci maddəsinə görə, əgər borclu öhdəliyin lazımınca icra edilməməsi, o cümlədən müəyyənləşdirilmiş müddətdə icra edilməməsi üçün cərimə ödəyəcəyini vəd etmişdirsə, kreditor cərimənin ödəniməsini və öhdəliyin icrasını tələb edə bilər; 467-ci maddəsinə əsasən məhkəmə işin hallarını nəzərə alaraq tənasübsüz surətdə yüksək dəbbə pulunu azalda bilər. Eyni zamanda məhkəmə araşdırılması zamanı müəyyən edilmişdir ki, "xxxx" MMC ilə Cavabdeh arasında bağlanmış müqavilə üzrə cavabdeh ödənişləri gecikdirdiyi təqdirdə hesablanacaq cərimə məbləğinin ödənilməsi barədə yazılı formada vəd verməklə öhdəlik götürmüşdür. Hazırda iddiaçı öhdəliyin icrasını, o cümlədən hesablanmış cəmi 611,6 manat məbləğində cərimənin ödənilməsini tələb edir. Məhkəmə hesab edir ki, iddia tələbi cərimə borcunun (dəbbə pulunun) tutulması hissəsində qismən təmin edilməli, 13.12.2019, 27.05.2020 və 11.07.2020-ci il tarixli müqavilələr üzrə hesablanmış 131 manat, 195,4 manat və 285,2 manat məbləğində cərimə əsas borclara məbləğinə mütənasib olmadığından dəbbə pulu müvafiq olaraq 40 manat, 70 manat və 100 manat məbləğində müəyyən edilməli və həmin məbləğ cərimə borcu qismində Cavabdeh iddiaçının xeyrinə tutulmalıdır. Azərbaycan Respublikası Mülki Prosessual Məcəllənin: 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir; 77.1 maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. 119.1-ci maddəsinə əsasən məhkəmə xərcləri ödənilmiş tələblərin məbləğinə münasib olaraq işdə itirak edən şəxslərə aid edilir; 217.4. maddəsinə əsasən, məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Beləliklə, məhkəmə tədqiq olunmuş sübutlara məcmu halında hüquqi qiymət verərək hesab edir ki, iddia qismən təmin edilməli, Cavabdeh 13.12.2019, 27.05.2020 və 11.07.2020-ci il tarixli müqavilələr üzrə 2306,4 manat məbləğində əsas, cəmi 210 manat məbləğində cərimə məbləğində pul, habelə 30 manat məbləğində dövlət rüsumu "xxxx" MMC-nin xeyrinə tutulmalı, iddia qalan hissədə rədd edilməlidir. Qeyd olanlara əsasən və Azərbaycan Respublikası MPM-nin 119-cu, 216-220-ci maddələrini rəhbər tutaraq, məhkəmə qət etdi: İddia qismən təmin edilsin. Cavabdeh 13.12.2019, 27.05.2020 və 11.07.2020-ci il tarixli müqavilələr üzrə 2306,4 (iki min üç yüz altı manat qırx qəpik) manat ödənilməmiş hissə, 210 (iki yüz on) manat dəbbə, cəmi 2516,4 (iki min beş yüz on altı manat, qırx qəpik) manat məbləğində borc, habelə 30 (otuz) manat məbləğində dövlət rüsumu "xxxx" MMC-nin xeyrinə tutulsun. İddia qalan hissədə rədd edilsin. Qətnamədən onun rəsmi qaydada verildiyi gündən 1 (bir) ay müddətində Bakı Şəhəri Nərimanov Rayon Məhkəməsi vasitəsilə Bakı Apellyasiya Məhkəməsinə apellyasiya şikayəti verilə bilər. Sədrlik edən Aytən Novruzova