Bakı Şəhəri Nizami Rayon Məhkəməsi Qərardad — İş №2(007)-2281/2024

Azərbaycan Respublikası adından QƏRARDAD Bakı şəhəri İş № 2(007)-2281/2024 28.06.2024 BAKI ŞƏHƏRİ NİZAMİ RAYON MƏHKƏMƏSİ Bakı şəhəri Nizami Rayon Məhkəməsinin hakimi Əhmədova Həqiqət Mülazim qızı, Ərizəçi Əzizova (Əliyeva) Fəridə İbrahim qızının cavabdeh Maraqlı şəxs1 və Maraqlı şəxs2 qarşı “atalığın müəyyən olunması” haqqında ərizəsini və ona əlavə olunmuş sənədləri nəzərdən keçirərək, MÜƏYYƏN ETDİ: Ərizəçi Əzizova (Əliyeva) Fəridə İbrahim qızı cavabdeh Maraqlı şəxs1 və Maraqlı şəxs2 qarşı “atalığın müəyyən olunması” haqqında ərizə ilə Bakı şəhəri Nizami Rayon Məhkəməsinə müraciət etmişdir. Ərizədən və ona əlavə edilmiş sənədlərdən görünür ki, ərizəçi müvafiq prosessual pozuntulara yol verməklə məhkəməyə müraciət etmişdir. Azərbaycan Respublikası Mülki Prosessual Məcəlləsinin: 149.2.3-cü maddəsinə əsasən, iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb iddia ərizəsində göstərilməlidir. 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. “Hüquqi əhəmiyyəti olan faktların müəyyən edilməsinə dair işlər üzrə məhkəmə təcrübəsinin bəzi məsələləri haqqında” Azərbaycan Respublikası Ali Məhkəməsinin Plenumunun 12 aprel 2019-cu il tarixli qərarının 11.2-ci bəndinə əsasən atanın sağ olduğu dövrdə atalığın müəyyən olunması isə Ailə Məcəlləsinin 45.1-ci maddəsinə əsasən həll edilir və birmənalı olaraq bu iddialara iddia icraatı qaydasında baxılır. Göründüyü kimi, hazırda ərizəçinin ərizədə qeyd etdikləri ilə uşağın atasının olmasını tələb etdiyi Maraqlı şəxs1 İsaməddin oğlunun və atası olaraq qeyd edilən Maraqlı şəxs2 sağ olduğu öz təsdiqini tapmışdır. Belə olan halda isə, ərizəçinin tələbi iddia icraatı qaydasında verilməlidir. Halbuki, Əzizova (Əliyeva) Fəridə İbrahim qızı ərizədə özünü ərizəçi, Maraqlı şəxs1 cavabdeh, Maraqlı şəxs2 isə maraqlı şəxs qismində qeyd etmişdir. Bunun nəticəsində məhkəmə ərizəyə hansı icraat qaydasında baxılmasını müəyyənləşdirə bilməmişdir. Belə olan halda, məhkəmə hesab edir ki, ərizə və ona əlavə edilmiş sənədlər ərizəçiyə geri qaytarılmalı, qeyd edilən nöqsanlar aradan qaldırıldıqdan sonra təkrarən, ümumi qaydada məhkəməyə müraciət etmək hüququnun olması ərizəçiyə izah edilməlidir. Azərbaycan Respublikası MPM-nin 114.1.3-cü maddəsinə əsasən, bu məcəllə ilə nəzərdə tutulmuş əsaslarla ərizə geri qaytarılarsa ödənilmiş dövlət rüsumu geri qaytarılır. Göstərilənlərə əsasən və Azərbaycan Respublikası MPM-nin 149-150, 152, 263-264, 267-268-ci maddələrini rəhbər tutaraq, QƏRARA ALDİ: Ərizəçi Əzizova (Əliyeva) Fəridə İbrahim qızının cavabdeh Maraqlı şəxs1 və Maraqlı şəxs2 qarşı “atalığın müəyyən olunması” haqqında ərizəsi ona əlavə olunmuş sənədlərlə birlikdə geri qaytarılsın. Ərizəçi Əzizova (Əliyeva) Fəridə İbrahim qızına göstərilən nöqsanları aradan qaldırdıqdan sonra ümumi qaydada məhkəməyə müraciət etmək hüququ izah olunsun. Qərardad Ərizəçi Əzizova (Əliyeva) Fəridə İbrahim qızı tərəfindən ödənilmiş 101 manat (Şəxsiyyət vəsiqəsinin Fini: xxxxxxx, büdcə səviyyə kodu: 142213, qəbzin nömrəsi: 6131, GPP qəbzin nömrəsi: **********, tarix: xx.xx.2024-cü il) dövlət rüsumunun qaytarılması üçün əsasdır. Qərardadın icrası dövlət rüsumunun qaytarılması hissəsində Bakı Şəhəri üzrə Baş Maliyyə İdarəsinə həvalə edilsin. Qərardaddan tərəfə rəsmi qaydada verildikdən sonra 10 gün müddətində “Elektron məhkəmə” İnformasiya Sistemində yaradılan elektron kabinet vasitəsilə Bakı şəhəri Nizami Rayon Məhkəməsinə şikayət verilə bilər. Hakim: Həqiqət Əhmədova