Bakı Şəhəri Sabunçu Rayon Məhkəməsi Qərardad — İş №2(008)-2552/2024

Azərbaycan Respublikası adından QƏRARDAD Bakı şəhəri İş № 2(008)-2552/2024 16.02.2024 BAKI ŞƏHƏRİ SABUNÇU RAYON MƏHKƏMƏSİ Mən, Bakı Şəhəri Sabunçu Rayon Məhkəməsinin hakimi Əsədova Tahirə Əlif qızı, İddiaçı cavabdeh ləğv prosesində olan QSC «Bank Standard» KB Ləğvedicisi Əmanətlərin Sığortalanması Fonduna qarşı Daşınmaz Əmlakın Kadastrı və Reyestri Publik Hüquqi Şəxsi üçüncü şəxs kimi qeyd edilməklə öhdəliyin icrasının cavabdehin üzərinə qoyulması barədə iddia tələbinə dair iddia ərizəsini və ona əlavə edilmiş sənədləri nəzərdən keçirərək, MÜƏYYƏN ETDİM: İddiaçının cavabdeh ləğv prosesində olan QSC «Bank Standard» KB Ləğvedicisi Əmanətlərin Sığortalanması Fonduna qarşı Daşınmaz Əmlakın Kadastrı və Reyestri Publik Hüquqi Şəxsi üçüncü şəxs kimi qeyd edilməklə iddia ərizəsi ilə məhkəməyə müraciət edərək cavabdehin üzərinə ipotekaya xitam verilməsi ilə əlaqədar «ipotekanın qeydiyyatını aparan dövldət orqanına ərizə ilə müraciət etmə” öhdəliyinin qoyulması barədə qətnamə qəbul edilməsini xahiş etmişdir. İddia ərizəsini və ona əlavə olunmuş sənədləri nəzərdən keçirib hesab edirəm ki, iddia ərizəsi geri qaytarılmalıdır. Belə ki, İddiaçı iddia ərizəsində QSC «Bank Standard» KB Ləğvedicisi Əmanətlərin Sığortalanması Fondunun hüquqi ünvanını AZ1014 Azərbaycan, Bakı şəhəri, Bül-bül prospekti, 40, faktiki ünvanını AZ1025 Azərbaycan, Bakı şəhəri, Babək prospekti, 16 kimi göstərmişdir. İddiaçının cavabdehin hüquqi ünvanı kimi göstərdiyi AZ1014 Azərbaycan, Bakı şəhəri, Bül-bül prospekti, 40 Səbail rayonu, faktiki ünvanı kimi göstərdiyi AZ1025 Azərbaycan, Bakı şəhəri, Babək prospekti, 16 isə Xətai rayon ərazisinədə yerləşir. Göründüyü kimi, iddia ərizəsi qanunla müəyyən olunmuş qaydada ərazi aidiyyəti üzrə düzgün verilməmişdir. Azərbaycan Respublikası MPM-nin 149.2.3-cü maddəsinə əsasən iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb ərizədə göstərilməlidir. Lakin, iddiaçı tərəfindən öz tələblərinin əsası kimi istinad etdiyi fakt və hallar və onları təsdiq edən sübutları iddia ərizəsinə əlavə edilməmişdir. Azərbaycan Respublikası MPM-nin: 31.1-ci maddəsinə əsasən aidiyyat qaydalarının pozulmasına yol verilmir; 35.1-ci maddəsinə əsasən qanunla başqa hal nəzərdə tutulmamışdırsa, iddia cavabdehin rəsmi qeydə alındığı yerin məhkəməsinə verilir; 152.1.-ci maddəsinə əsasən hakim iddia ərizəsini və ona əlavə edilmiş sənədləri geri qaytarır: 152.1.1-ci maddəsinə əsasən iddia ərizəsi bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır; 152.1.3. əgər iş ərazi aidiyyəti üzrə həmin məhkəmədə baxılmalı deyildirsə; 152.2. İddia ərizəsinin qaytarılması haqqında hakim qərardad çıxarır; 152.3. İddia ərizəsinin qaytarılması haqqında qərardaddan şikayət verilə bilər. Qərardad ləğv edildikdə, iddia ərizəsi məhkəməyə müraciət edildiyi gündən verilmiş hesab edilir. 152.4. İddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Azərbaycan Respublikası MPM-nin 268.1-ci maddəsinə əsasən şikayət qərardad tərəfə rəsmi qaydada verildikdən sonra 10 gün müddətində verilir. Qeyd olunanlara əsasən və Azərbaycan Respublikası Mülki Prosessual Məcəlləsinin 152, 263-264, 267-268-ci maddələrini rəhbər tutaraq, QƏRARA ALDİ: İddia ərizəsi icraata qəbul edilmədən geri qaytarılsın. Şikayət qərardad tərəflərə rəsmi qaydada təqdim edildikdən sonra 10 gün müddətində verilə bilər. Hakim Tahirə Əsədova