Bakı Şəhəri Səbail Rayon Məhkəməsi Qərardad — İş №2(009)-2254/2022

Azərbaycan Respublikası adından QƏRARDAD Bakı şəhəri İş № 2(009)-2254/2022 04.10.2022 BAKI ŞƏHƏRİ SƏBAİL RAYON MƏHKƏMƏSİ Hakim Abdullayev Şahin Zülfüqar oğlunun sədrliyi ilə İddiaçı cavabdeh Bakı şəhəri Mədəniyyət baş İdarəsinə qarşı “işə bərpa” tələbinə dair iddia ərizəsinin mümkünlüyü məsələsinə baxaraq … MÜƏYYƏN ETDİ: İddiaçı cavabdeh Bakı şəhəri Mədəniyyət baş İdarəsinə qarşı” işə bərpa” tələbinə dair iddia ərizəsi ilə məhkəməyə müraciət etmişdir. Hakim iş materiallarını araşdırıb hesab edir ki, iddia ərizəsi və ona əlavə edilmiş sənədlər geri qaytarılmalıdır. Hakim ilk növbədə qeyd edir ki, iddia ərizəsi AR MPM-nin 149-cu maddəsinin tələblərinə riayət edilmədən tərtib edildiyindən geri qaytarılmalıdır. Belə ki, AR MPM-nin 149.2.2-ci maddəsinə əsasən iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) poçt ünvanları göstərilir. Hakim qeyd edir ki, iddiaçı tərəfindən nə özünün qeydiyyatda olduğu və yaşayış yeri barədə məlumatlar, nə də cavabdehin hüquqi ünvanı barədə məlumatlar iddia ərizəsində göstərilməmişdir. Hakim eyni zamanda qeyd edir ki, iddiaçı məhkəməyə iddia ərizəsini bir nüsxədə göndərmiş, iddiaya əlavə edilən sənədlərin siyahısı iddia ərizəsində göstərilməmiş, eyni zamanda onun cavabdehlə əmək münasibətlərində olmasını təsdiq edən sübutlar (əmək müqaviləsi, əmək kitabçasının sürəti), işdən azad olunma əmrin sürəti də iddia ərizəsinə əlavə edilməmişdir. AR MPM-nin 149.2.5-ci maddəsinə əsasən ərizəyə əlavə edilən sənədlərin siyahısı iddia ərizəsində göstərilməlidir. AR MPM-nin 150.1.1-ci maddəsinə əsasən cavabdehlərin və üçüncü şəxslərin sayına görə iddia ərizəsinin surətləri (iddia ərizəsi elektron formada verildiyi hal istisna olmaqla) əlavə edilməlidir. Beləliklə, hakim hesab edir ki, iddiaçı tərəfindən iddia ərizəsində tərəflərin yaşayış və hüquqi ünvanıarı barədə məlumatlar qeyd edilmədiyindən, iddia ərizəsi bir nüsxədə məhkəməyə təqdim olunduğundan, iddia ərizəsinə əlavə olunmuş sənədlərin siyahısı göstərilmədiyindən, əmək kitabçasının(əmək müqaviləsinin) surəti, işdən çıxma ilə bağlı əmrin surəti iddia ərizəsinə əlavə edilmədiyindən, bununla da iddia ərizəsi AR MPM-nin 149-cu maddəsi ilə müəyyən olunmuş forma və məzmununa riayət edilməklə verilmədiyindən iddia ərizəsi geri qaytarılmalıdır. AR MPM-nin 152.1.1-ci maddəsinə əsasən iddia ərizəsi bu Məcəllənin 149-cu maddəsi ilə müəyyən olunmuş formasına və məzmununa riayət edilməklə verilmədikdə hakim iddia ərizəsini və ona əlavə edilmiş sənədləri geri qaytarır. Şərh olunanlara əsasən və AR MPM-nin 152.1.3 maddəsini rəhbər tutaraq hakim… QƏRARA ALDİ: İddiaçı cavabdeh Bakı şəhəri Mədəniyyət baş İdarəsinə qarşı işə bərpa tələbinə dair iddia ərizəsi ona əlavə edilmiş sənədlərlə birlikdə geri qaytarılsın. İddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə aidiyyət qaydalarına riayət edilməklə məhkəməyə müraciət etməyə mane olmur. Qərardaddan 10 gün müddətində Səbail rayon Məhkəməsinə şikayət verilə bilər. Qeyd: Şikayət elektron sistem vasitəsi ilə verilmədikdə AR MPM-nin 363.1.5-ci maddəsinə əsasən geri qaytarılacaqdır. Hakim: Şahin Abdullayev