Daşkəsən Rayon Məhkəməsi Qərardad — İş №2(030)-357/2025

Azərbaycan Respublikası adından QƏRARDAD Daşkəsən rayonu İş № 2(030)-357/2025 06.05.2025 DAŞKƏSƏN RAYON MƏHKƏMƏSİ X1, İddiaçı cavabdeh Azərbaycan Dövlət Su Ehtiyatları Agentliyinin tabeliyində X3 Xidməti Publik hüquqi şəxs X4 Sistemlərinin İstismarı İdarəsinə qarşı işdən çıxarılma haqqında əmrin ləğv edilərək işə bərpa olunması, ötürülmüş ayların əmək haqqının ödənilməsi, məzuniyyət və istirahət hüquqlarının təmin edilməsi tələbinə dair iddia ərizəsi və ərizəyə əlavə olunmuş sənədləri nəzərdən keçirərək MÜƏYYƏNETDİ: İddiaçı cavabdeh Azərbaycan Dövlət Su Ehtiyatları Agentliyinin tabeliyində X3 Xidməti Publik hüquqi şəxs X4 Sistemlərinin İstismarı İdarəsinə qarşı iddia ərizəsi ilə məhkəməyə müraciət edib, Azərbaycan Dövlət Su Ehtiyatları Agentliyinin tabeliyində X3 Xidməti Publik hüquqi şəxs X4 Sistemlərinin İstismarı İdarəsi tərəfindən işdən çıxarılması haqqında verilmiş əmrin ləğv edərək həmin müəssisədəki işinə - vəzifəsinə bərpa olunmasını, iş üzrə yekun məhkəmə aktı qanuni qüvvəyə minib icra edilənədək ötürülmüş ayların əmək haqqının hesablanaraq ona ödənilməsi, məzuniyyət və istirahət hüquqlarının cavabdeh tərəfindən təmin edilməsi barədə qətnamə çıxarılmasını xahiş etmişdir. Məhkəmə İddiaçı iddia ərizəsini və ona əlavə edilmiş sənədləri tədqiq edərək hesab edir ki, iddia ərizəsi geri qaytarılmalıdır. Ona görə ki, məhkəməyə daxil olmuş iddia ərizəsi tərtib olunarkən Azərbaycan Respublikası Mülki-Prosessual Məcəlləsinin 149-cu maddəsi ilə müəyyən olunmuş forma və məzmunun tələblərinə riayət edilməmişdir. Belə ki, iddia ərizəsində mübahisələndirilən əmrin tarixi və nömrəsi qeyd olunmamış, həmçinin iddiaçının işləmiş olduğu vəzifə və ya peşə, yəni, bərpa olunmaq istədiyi həmin iş yeri barədə məlumatlar ərizədə göstərilməmişdir. Azərbaycan Respublikası Mülki Prosessual Məcəlləsinin 149.2.3-cü maddəsinə əsasən, iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb. 152.1.1-ci maddəsinə əsasən, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. 152.2-ci maddəsinə görə, iddia ərizəsinin qaytarılması haqqında hakim qərardad çıxarır. 152.3-cü maddəsinə əsasən, iddia ərizəsinin qaytarılması haqqında qərardaddan şikayət verilə bilər. Qərardad ləğv edildikdə, iddia ərizəsi məhkəməyə müraciət edildiyi gündən verilmiş hesab edilir. 152.4-cü maddəsinə görə, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsasən və Azərbaycan Respublikası Mülki Prosessual Məcəlləsinin 152, 263, 264, 267, 268-ci maddələrini rəhbər tutaraq, məhkəmə QƏRARAALDİ: İddiaçı iddia ərizəsi və ona əlavə edilmiş sənədlər geri qaytarılsın. Qərardaddan onun təqdim edildiyi və ya alındığı gündən 10 (on) gün müddətində “Elektron məhkəmə” informasiya sistemində yaradılmış elektron kabinet üzərindən Daşkəsən Rayon Məhkəməsinə şikayət verilə bilər. Hakim: Kənan Vəliyev