Saatlı Rayon Məhkəməsi Qətnamə — İş №2(055)-595/2023

Azərbaycan Respublikası adından QƏTNAMƏ Saatlı rayonu İş № 2(055)-595/2023 05.07.2023 SAATLI RAYON MƏHKƏMƏSİ Hakim Sadıqov Mirlətif Süleyman oğlunun sədrliyi, Məhkəmə iclasının katibi X3, Ərizəçi iştirakı ilə, Doğum faktının müəyyən edilməsi barədə Ərizəçi ərizəsi üzrə mülki işə açıq məhkəmə iclasında baxaraq, məhkəmə M ü ə y y ə n e t d i: Ərizəçi ərizə ilə məhkəməyə müraciət edərək onun 05 yanvar 1963-cü ildə Saatlı rayonunun Qara Nuru (keçmiş Krasnoselsk) kəndində doğulması faktının müəyyən edilməsini xahiş etmişdir. Məhkəmə baxışı iclasında Ərizəçi izahatında göstərdi ki, o 05 yanvar 1963-cü ildə Saatlı rayonunun Qara Nuru (keçmiş Krasnoselsk) kəndində anadan olmuşdur və hazırda da həmin kənddə yaşayır. Ona verilən doğum haqqında şəhadətnaməni itirdiyi üçün təkrar doğum haqqında şəhadətnamə almaq məqsədi ilə Saatlı rayon Qeydiyyyat Şöbəsinə müraciət etmiş, lakin Qeydiyyat Şöbəsində onun adına doğum akt qeydi aşkar olunmadığından doğum haqqında şəhadətnamənin verilməsi mümkün olmamış, lakin bununla bağlı ona doğum faktının müəyyən edilməsi barədə məhkəməyə müraciət etməsi tövsiyə olunmuşdur. Bundan sonra doğum haqqında şəhadətnamənin başqa qaydada alınması mümkün olmadığını bilmiş və bununla bağlı məhkəməyə müraciət etmişdir. Ona görə də göstərdiklərinin nəzərə alınıb ərizənin təmin edilməsi barədə qətnamə çıxarılmasını məhkəmədən xahiş etdi. Məhkəmə baxışı zamanı şahid X4 ifadəsində göstərdi ki, Ərizəçi onun qardaşının arvadıdır. Qohum olduğundan ərizəçinin 05 yanvar 1963-cü ildə Saatlı şəhərində anadan olmasını dəqiqliklə bilir. Məhkəmə baxışı iclasında şahid qismində dindirilmiş X1 və X6 da digər şahid X2 ifadəsinə uyğun ifadə verdi. İşdə olan və məhkəmə iclasında elan edilmiş Saatlı rayon Qeydiyyat Şöbəsi tərəfindən verilmiş 13 may 2023-cü il tarixli arayışdan görünür ki, Ərizəçi doğum akt qeydinin bərpa edilməsi üçün şəxsin şəxsiyyətini təsdiq edən heç bir sənəd mövcud olmamışdır. Məhkəmə ərizəçinin izahatını və şahidlərin ifadələrini dinləyib, işə əlavə edilmiş sənədləri araşdırıb, məhkəmə tədqiqatı zamanı toplanmış sübutların məcmusuna qiymət verərək belə hesab edir ki, ərizə təmin olunmalıdır. Belə ki, məhkəmədə işin araşdırılan halları və şahidlərin ifadələri ilə müəyyən olundu ki, Ərizəçi 05 yanvar 1963-cü ildə Saatlı rayonunun Qara Nuru (keçmiş Krasnoselsk) kəndində doğulmuş, lakin doğum akt qeydinin bərpa edilməsi üçün şəxsin şəxsiyyətini təsdiq edən heç bir sənəd mövcud olmadığından doğum haqqında şəhadətnamə ala bilməmişdir. Azərbaycan Respublikası Mülki Prosessual Məcəlləsinin 307.2.3-cü maddəsinin tələbinə görə məhkəmə şəxsin doğumunun qeyd edilmə faktının müəyyən edilməsi barədə işlərə baxır. Həmin Məcəllənin 308-ci maddəsinə əsasən məhkəmə hüquqi əhəmiyyəti olan faktları o, zaman müəyyən edə bilər ki, ərizəçi həmin faktları təsdiq edən lazımı sənədləri başqa qaydada ala bilməsin. Şərh olunanları nəzərə alaraq məhkəmə belə nəticəyə gəlir ki, ərizə təmin edilməli, Ərizəçi 05 yanvar 1963-cü ildə Saatlı rayonunun Qara Nuru (keçmiş Krasnoselsk) kəndində doğulması faktı müəyyən edilməlidir. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 216-220-ci maddələrini rəhbər tutaraq məhkəmə, Q ə t e t d i: Ərizə təmin edilsin. Ərizəçi 05 yanvar 1963-cü ildə Saatlı rayonunun Qara Nuru kəndində doğulması faktı müəyyən edilsin. Qətnamədən bir ay müddətində Saatlı Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti vermək olar.