Sabirabad Rayon Məhkəməsi Qərardad — İş №2(056)-3289/2025

Azərbaycan Respublikası adından QƏRARDAD Sabirabad rayon İş № 2(056)-3289/2025 20.11.2025 SABİRABAD RAYON MƏHKƏMƏSİ Mən, Sabirabad rayon Məhkəməsinin hаkimi Allahverdiyev Səlim Məhərrəm оğlu, Ərizəçilər Ərizəçi1, Ərizəçi2 və X1 “qohumluq münasibətinin müəyyən olunması” tələbinə dair ərizəsini və ona əlavə olunmuş sənədləri nəzərdən keçirərək, M Ü Ə Y Y Ə N E T D İ M: Ərizəçilər Ərizəçi1, Ərizəçi2 və X1 “qohumluq münasibətinin müəyyən olunması” tələbinə dair ərizə ilə məhkəməyə müraciət etmişlər. Ərizəni və ona əlavə edilmiş sənədləri nəzərdən keçirərək hesab edirəm ki, ərizədə maraqlı şəxs qeyd edilmədiyindən və ərizəçilərin eyniləşdirmə məlumatları göstərilmədiyindən geri qaytarılmalıdır. Belə ki, Azərbaycan Respublikasının MPM-nin 149.2.2-ci maddəsinə əsasən, ərizədə iddiaçının, nümayəndəsinin (əgər ərizəni nümayəndə verirsə), cavabdehin və işdə iştirak edən digər şəxslərin, şahidin və məhkəməyə dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatları, yaşayış yeri və ya olduğu yer (həm faktiki, həm də rəsmi qeydə alındığı ünvanı), olduğu halda – iş yerinin ünvanı, telefon nömrələri o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. Bundan əlavə qeyd edilməlidir ki, ərizə tədqiq edilərkən müəyyən edilmişdir ki, ərizəçilərdən Ərizəçi1 əri X2 münasibətdə ərizəçi qismində göstərilsə də, onun əri Xanlar Məmmədov vəfat etmiş olsa da, iş materiallarına onun ərizəçi qismində çıxış edə bilməsinin təsdiqi ola biləcək Xanlar Məmmədovun vərəsəsi olması ilə əlaqədar hər hansı sənəd əlavə edilməmişdir. Belə olan halda Ərizəçi1 da hazrıki tələblə məhkəməyə müraciət etməsi yolverilməz sayılmalıdır. Azərbaycan Respublikasının MPM-nin 152.1.1-ci maddəsinə əsasən, hakim iddia ərizəsini və ona əlavə edilmiş sənədləri iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə geri qaytarır. Həmin Məcəllənin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsasən və MPM-nin 149-152, 264-268-ci maddələrini rəhbər tutaraq, QƏRARA ALDİM: Ərizəçilər Ərizəçi1, Ərizəçi2 və X1 “qohumluq münasibətinin müəyyən olunması” tələbinə dair ərizəsi əlavə olunmuş bütün sənədlərlə birlikdə ərizəçilərə geri qaytarılsın. Ərizəçilərə izah edilsin ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra 10 gün müddətində yazılı şəkildə qərardadı qəbul edən məhkəməyə şikayət verilə bilər.