Gəncə Şəhər Məhkəməsi Qərardad — İş №2(125)-6774/2023

Azərbaycan Respublikası adından QƏRARDAD Gəncə şəhəri İş № 2(125)-6774/2023 06.10.2023 GƏNCƏ ŞƏHƏR MƏHKƏMƏSİ Mən Gəncə Şəhər Məhkəməsinin hakimi Quliyev Camal Yusifəli oğlu, İddiaçı Gəncə-Daşkəsən regional Təhsil idarəsi Nizami Gəncəvi adına 11 nömrəli tam orta məktəbinin direktoru Səidə İsmayılovaya qarşı «dərnək rəhbəri vəzifəsinə bərpa edilməsi və vurulmuş maddi zərərin əvəzi qismində pul» tələbi barədə iddia ərizəsini və ona əlavə olunmuş sənədləri məhkəmənin inzibati binasında nəzərdən keçirərək, MÜƏYYƏN ETDİM: İddiaçı Gəncə-Daşkəsən regional Təhsil idarəsi Nizami Gəncəvi adına 11 nömrəli tam orta məktəbinin direktoru Səidə İsmayılovaya qarşı Azərbaycan Respublikası Təhsil Nazirliyinin Gəncə şəhər Təhsil İdarəsinin Nizami Gəncəvi adına 11 nömrəli tam orta məktəbin direktoru S.İsmayılovanın 15 sentyabr 2022-ci il tarixli əmr, 260 nömrəli və 14 sentyabr 2022-ci il tarixli, 24 nömrəli əmrinin ləğv edilməsi, iddiaçının həmin məktəbdə tam ştat cədvəl üzrə bədii qiraət dərnəyinin aparılmasına icazə verərək dərnək rəhbəri vəzifəsinə bərpa edilməsi və həmin dövrlər üçün maddi ziyana görə əmək haqqının hesablanaraq alınması tələbinə dair iddia ərizəsi ilə məhkəməyə müraciət etmişdir. İddia ərizəsini və ona əlavə olunmuş sənədləri tədqiq edərək, hesab edirəm ki, iddia ərizəsi və ona əlavə edilmiş sənədlər geri qaytarılmalıdır. Belə ki, Azərbaycan Respublikası Mülki Prosessual Məcəlləsinin 149.2.2 və 149.2.3-cü maddələrinə görə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları); iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb ərizədə göstərilməlidir. Lakin məhkəməyə daxil olmuş iddia ərizəsində tələb qismində maddi ziyana görə əmək haqqının hesablanaraq alınmasını xahiş etsə də, hansı məbləğdə pul vəsaitini cavabdehdən tələb etməsini qeyd etməmiş, həmçinin iddia tələbinin yönəldiyi cavabdehə dair Azərbaycan Respublikası Mülki Prosessual Məcəlləsinin 149.2.2-ci maddəsində göstərilən məlumatlar tam göstərməmişdir. Azərbaycan Respublikası Mülki Prosessual Məcəlləsinin 152.1.1-ci maddəsinə görə iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. Həmin Məcəllənin 152.4-cü maddəsinə görə iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Yuxarıda göstərilənlərə əsasən və Azərbaycan Respublikası MPM-nin 152, 263, 264, 267 və 268-ci maddələrini rəhbər tutaraq, QƏRARA ALDİM : İddiaçı Gəncə-Daşkəsən regional Təhsil idarəsi Nizami Gəncəvi adına 11 nömrəli tam orta məktəbinin direktoru Səidə İsmayılovaya qarşı «dərnək rəhbəri vəzifəsinə bərpa edilməsi və vurulmuş maddi zərərin əvəzi qismində pul» tələbi barədə iddia ərizəsi və ona əlavə olunmuş sənədlər geri qaytarılsın. İddiaçıya izah edilsin ki, nöqsanlar aradan qaldırıldıqdan sonra yenidən ümumi qaydada məhkəməyə müraciət oluna bilər. Qərardad tərəfə rəsmi qaydada verildikdən sonra 10 gün müddətində ondan «Elektron məhkəmə» informasiya sistemində yaradılmış elektron kabinet vasitəsi ilə Gəncə Şəhər Məhkəməsinə şikayət verilə bilər. Hakim: Camal Quliyev