Şirvan Apellyasiya Məhkəməsi Qərardad — İş №2-2(106)-81/2025

Azərbaycan Respublikası adından QƏRARDAD Şirvan şəhəri İş № 2-2(106)-81/2025 13.03.2025 ŞİRVAN APELLYASİYA MƏHKƏMƏSİ X2 Fehruz oğlunun sədrliyi və məruzəsi ilə, Kərimov Tale Suliddin oğlu və Əliyev Qasım Vəli oğlundan ibarət tərkibdə, Şirvan Kommersiya Məhkəməsinin e-2-2(121)-697/2025 saylı 25 fevral 2025-ci il tarixli qərardadından (hakim R.Nəbiyev) iddiaçı 9 saylı X1 Mərkəzi tərəfindən verilmiş şikayətə məhkəmənin inzibati binasında, tərəflərin iştirakı olmadan, yazılı icraat qaydasında baxaraq, məhkəmə kollegiyası Müəyyənetdi: İddiaçı 9 saylı X1 Mərkəzi Cavabdeh qarşı iddia ərizəsi ilə Şirvan Kommersiya Məhkəməsinə müraciət edərək, 9 saylı X1 Mərkəzinin 1 saylı meşəbəyliyinin 4 saylı dolayının 9-cu kvartalında Cavabdeh məxsus taxdadan inşa edilmiş 1 ədəd 13x4 metr ölçüdə yeməkxananın, 1 ədəd 7x4 mert ölçüdə yeməkxananın, 1 ədəd 9x3 metr ölçüdə yeməkxananın, 3 ədəd 4x3 metr ölçdə söhbətgahların, 1 ədəd 18x15 metr ölçüdə yeməkxananın, 1 ədəd 5x4 metr ölçüdə mişar daşlarından inşa edilmiş yeməkxananın cavabdehin öz vəsaiti hesabına sökülməsi, ərazinin əvvəlki vəziyyətə gətirilərək, boşaldılmasına dair qətnamə qəbul edilməsini xahiş etmişdir. Şirvan Kommersiya Məhkəməsinin xx.xx.2025-ci il tarixli, e-2-2(121)-697/2025 saylı qərardadı ilə iddiaçı 9 saylı X1 Mərkəzinin Cavabdeh qarşı “qanunsuz tikdirdiyi tikilini öz vəsaiti hesabına sökülməsi, ərazinin əvvəlki vəziyyətə gətirilərək boşaldılması tələbi”nə dair iş üzrə icraata xitam verilməsinə qərar verilmişdir. xx.xx.2025-ci il tarixdə Şirvan Kommersiya Məhkəməsinin xx.xx.2025-ci il tarixli, e-2- 2(121)-697/2025 saylı qərardadından iddiaçı 9 saylı X1 Mərkəzinin şikayət verərək Şirvan Kommersiya Məhkəməsinin xx.xx.2025-ci il tarixli, e-2-2(121)-697/2025 saylı qərardadının ləğv edilməsini xahiş etmişdir. Şirvan Kommersiya Məhkəməsinin xx.xx.2025-ci il tarixli, e-2-2(121)-697/2025 saylı qərardadı ilə, Şirvan Kommersiya Məhkəməsinin xx.xx.2025-ci il tarixli, e-2-2(121)- 697/2025 saylı qərardadından iddiaçı 9 Saylı X1 Mərkəzi tərəfindən verilmiş şikayət MPMin 361-ci maddəsinin tələblərinə riayət edilmədən verildiyinə görə geri qaytarılmışdır. xx.xx.2025-ci il tarixdə iddiaçı Şirvan Kommersiya Məhkəməsinin xx.xx.2025-ci il tarixli, e-2-2(121)-697/2025 saylı qərardadında qeyd olunan nöqsanları aradan qaldıraraq Şirvan Kommersiya Məhkəməsinin xx.xx.2025-ci il tarixli, e-2-2(121)-697/2025 saylı qərardadından yenidən şikayət vermişdir. Şirvan Kommersiya Məhkəməsi xx.xx.2025-ci il tarixli, e-2-2(121)-697/2025 saylı qərardadından verilmiş şikayətə Azərbaycan Respublikası Mülki Prosessual Məcəlləsinin 269-cu maddəsinin tələblərinə uyğun baxmadan iş materiallarını şikayətə baxılmasından ötrü Şirvan Apellyasiya Məhkəməsinə göndərmişdir. Azərbaycan Respublikası Mülki Prosessual Məcəlləsinin 397.2-ci maddəsinə əsasən apellyasiya instansiyası məhkəməsi qərardaddan verilən şikayətə onun məhkəməyə daxil olduğu vaxtdan 20 gün müddətində yazılı icraat qaydasında baxır. Həmin Məcəllənin 372.7-ci maddəsinə əsasən apellyasiya instansiyası məhkəməsi şikayətin dəlillərindən aslı olmayaraq, məhkəmənin maddi və prosessual hüquq normalarına riayət etməsini yoxlayır. Apellyasiya instansiyası məhkəməsi ilk olaraq daxil olmuş işlərin apellyasiya qaydasında baxılmasının mümkünlüyünü yoxlayır. Buraya işə apellyasiya qaydasında baxılmaq üçün prosessual əsasların olması daxildir. Əgər apellyasiyanın mümkünlüyü üçün əsaslar yoxdursa, o, qəbul olunmamış hesab edilə bilər. Hətta ilkin mərhələdə mümkün sayılmış apellyasiya şikayəti, aparılmış araşdırmalar zamanı sonradan da, qəbul olunmamış hesab oluna və qeyri-mümkün sayıla bilər. Mülki mühakimə icraatının hamılıqla qəbul edilmiş prosessual qənaət prinsipi də bunu tələb edir. Azərbaycan Respublikası Mülki Prosessual Məcəlləsinin : 269.1-ci maddəsinə əsasən şikayətə qərardadı qəbul etmiş birinci instansiya məhkəməsi tərəfindən 3 gün müddətində yazılı icraat qaydasında baxılır. 269.2-ci maddəsinə əsasən şikayət əsaslıdırsa, hakim qərardadı dəyişdirir və ya ləğv edir və mübahisəyə baxılması üçün tərəflərlə birlikdə sonrakı prosessual hərəkətləri yerinə yetirir. 269.3-cü maddəsinə əsasən əks təqdirdə bu şikayət baxıldıqdan sonra 7 gün müddətində işlə birlikdə apellyasiya instansiyası məhkəməsinə, bu Məcəllənin 32.5-ci maddəsində nəzərdə tutulmuş qaydada aidiyyət haqqında qərardaddan şikayət verildikdə isə həmin şikayət bu Məcəllənin 403-1.5-ci maddəsinin tələbləri izah edilməklə işdə iştirak edən şəxslərə rəsmi qaydada verilir və iş kasasiya instansiyası məhkəməsinə göndərilir. İş materiallarından göründüyü kimi işə baxan birinci instansiya məhkəməsi şikayətlə 25 fevral 2025-ci il tarixli qərardad mübahisələndirildiyi halda, şikayətə Azərbaycan Respublikası Mülki Prosessual Məcəlləsinin 269-cu maddəsinin tələblərinə əsasən baxmamış və iş materiallarını şikayətə baxılmasından ötrü apellyasiya instansiyası məhkəməsinə göndərmişdir. Azərbaycan Respublikası Mülki Prosessual Məcəlləsinin 398.0.2-ci maddəsinə əsasən apellyasiya instansiyası məhkəməsinin şikayətə baxıb qərardad qəbul etdikdə, qərardadı tam və ya qismən ləğv edib, yaxud dəyişib işi birinci instansiya məhkəməsinə göndərmək hüququ vardır. Həmin Məcəllənin 399-cu maddəsinə əsasən birinci instansiya məhkəməsinin qərardadını ləğv edib işi yenidən baxılmağa göndərdikdə, apellyasiya instansiyası məhkəməsinin qərardadında müəyyən olunmuş göstərişlər işə baxan birinci instansiya məhkəməsi üçün məcburidir. Kollegiya hesab edir ki, iş materialları 25 fevral 2025-ci il tarixli qərardaddan verilmiş şikayətə Mülki Prosessual Məcəllənin 269-cu maddəsinə müvafiq qaydada baxılmasından ötrü Şirvan Kommersiya Məhkəməsinə qaytarılmalıdır. Azərbaycan Respublikası Mülki Prosessual Məcəlləsinin 402.2-ci maddəsinə əsasən apellyasiya məhkəmələrinin mülki və kommersiya kollegiyalarının və Naxçıvan Muxtar Respublikası Ali Məhkəməsinin mülki və kommersiya kollegiyalarının aşağıdakı qərardadlarından kassasiya şikayəti verilə bilər: 402.2.1. apellyasiyanın qeyri-mümkün hesab edilməsi haqqında; 402.2.2. kassasiya şikayətinin qaytarılması (kassasiya şikayəti kassasiya instansiyası məhkəməsinin şikayətin qeyri-mümkünlüyü barədə qərarına əsasən qaytarıldığı hallar istisna olunmaqla) haqqında; 402.2.3. kassasiya şikayətinin verilməsi müddətinin bərpasından imtina edilməsi barədə; 402.2.4. iş üzrə icraata xitam verilməsi barədə; 402.2.5. bu Məcəllənin 384.0.4-cü maddəsində nəzərdə tutulmuş işin aidiyyəti üzrə göndərilməsinə dair və bu Məcəllənin 384.0.6-cı maddəsində nəzərdə tutulmuş apellyasiya şikayətinin bu Məcəllənin tələblərinə zidd olaraq icraata qəbul olunması əsası ilə icraata qəbul qərardadının ləğv edilərək işin apellyasiya baxışından çıxarılmaqla birinci instansiyası məhkəməsinə qaytarılması haqqında. Göründüyü kimi hazırki qərardaddan kassasiya şikayətinin verilməsi prosessual qanunvericilikdə nəzərdə tutulmamışdır. Şərh olunanlara əsasən və Mülki Prosessual Məcəllənin 269, 400, 402-ci maddələrini rəhbər tutaraq, məhkəmə kollegiyası Qərara aldı: Şirvan Kommersiya Məhkəməsinin 25 fevral 2025-ci il tarixli e-2-2(121)-697/2025 saylı qərardadından iddiaçı tərəfindən verilmiş şikayət qeyri-mümkün hesab edilsin. Kommersiya işinin materialları qərardadın əsaslandırıcı hissəsində qeyd edilənlər nəzərə alınmaqla 25 fevral 2025-ci il tarixli e-2-2(121)-697/2025 saylı qərardaddan verilən şikayət üzrə sonrakı prosessual hərəkətlərin yerinə yetirilməsindən ötrü Şirvan Kommersiya Məhkəməsinə göndərilsin. Qərardad qəbul edildiyi andan qanuni qüvvəyə minir. Qərardaddan şikayət verilə bilməz.