Gəncə Apellyasiya Məhkəməsi Qərardad — İş №2(3-7)-523/2026

Azərbaycan Respublikası adından Qərardad Gəncə şəhəri İş № 2(3-7)-523/2026 09.04.2026 GƏNCƏ APELLYASIYA MƏHKƏMƏSI Gəncə Apellyasiya Məhkəməsinin Mülki kollegiyasının hakimləri- Qəhrəmanov Əkrəm Sabir oğlu (sədrlik edən və məruzəçi), X4 və Muradov Rəhman Şaban oğlundan ibarət tərkibdə, İddiaçı X8 cavabdehlər Əlizadə Coşqun İlqar oğlu və Rəhimov İlqar Əli oğluna qarşı zəbt edilmiş torpaq sahəsinin qaytarılması və maddi ziyan tələbinə dair mülki iş üzrə Tərtər Rayon Məhkəməsinin işə baxan hakimi, eyni zamanda məhkəmənin sədri səlahiyyətlərini müvəqqəti icra edən Kamil Rzayevin tərəfindən özü-özünə verilmiş etiraza baxaraq, MÜƏYYƏN ETDİ: İddiaçı X8 cavabdehlər Əlizadə Coşqun İlqar oğluna və Rəhimov İlqar Əli oğluna qarşı iddia ərizəsi ilə məhkəməyə müraciət edərək cavabdehlər tərəfindən ona məxsus 0,20 ha zəbt edilmiş torpaq sahəsinin qaytarılması və 862 manat maddi ziyanın ödənilməsi və ödənilmiş dövlət rüsumunun tələbinə dair qətnamə çıxarılmasını xahiş etmişdir. İddia ərizəsi məhkəmənin icraatına qəbul edilmiş və *(***)-****/**** saylı mülki iş açılmışdır. Məhkəmə hazırlıq iclasında müəyyən olunmuşdur ki, cavabdeh Əlizadə Coşğun İlqar oğlu Tərtər Rayon Məhkəməsində məsləhətçi-məhkəmə iclas katibi vəzifəsində işləyir. İşə baxan hakim (həmin vaxt məhkəmənin sədrinin səlahiyyətlərini müvəqqəti icra edən) Kamil Rzayev özü-özünə etiraz etmiş və Tərtər Rayon Məhkəməsinin qərardadı ilə etiraz baxılması üçün Gəncə Apellyasiya Məhkəməsinə göndərilmişdir. Qərardad onunla əsaslandırmışdır ki, mülki iş üzrə cavabdeh Əlizadə Coşqun İlqar oğlu hal-hazırda Tərtər Rayon Məhkəməsində məsləhətçi-məhkəmə iclas katibi vəzifəsində işlədiyindən qanunvericilik normalarına əsasən həmin mülki işə hakim kimi mahiyyəti üzrə baxa bilməz. Bu halda iş üzrə qəbul ediləcək yekun məhkəmə aktının obyektivliyinə və qərəzsizliyinə dair şübhə olmaması baxımından özü-özünə etiraz etmişdir. Məhkəmə kollegiyası iş materiallarını araşdırıb və məruzəçi hakimi dinləyərək aşağıdakılara əsasən hesab edir ki, etiraz təmin edilməlidir. Azərbaycan Respublikasının Mülki Prosessual Məcəlləsinin 19.1-ci maddəsinə əsasən, hakimin işə baxılmasına aşağıdakı hallarda yol verilmir: O, Azərbaycan Respublikasının qanunvericiliyi ilə müəyyən edilmiş qaydada hakim vəzifəsinə təyin edilməmişsə; O, Azərbaycan Respublikasının qanunvericiliyinə müvafiq olaraq işin baxılması üçün nəzərdə tutulmuş hakim deyildirsə;O, əvvəllər hakim kimi, birinci instansiya məhkəməsində, apellyasiya və kassasiya instansiyalarında, həmçinin yeni açılmış hallar üzrə işin mahiyyəti üzrə baxılmasında iştirak etmişsə; O, əvvəllər tərəflərdən birinin nümayəndəsi, yaxud vəkili olmuşsa və ya işdə şahid, ekspert, mütəxəssis, tərcüməçi, məhkəmə iclasının katibi kimi iştirak etmişsə; O, məhkəmədə baxılan mübahisə üzrə əvvəllər tərəflər arasında mediasiya prosesində mediator kimi iştirak etmişdirsə; O, tərəflərdən biridirsə və ya tərəflərdən birinin və yaxud onun nümayəndəsinin və ya vəkilinin qohumudursa və ya qohumu olmuşsa; onun şəxsən, bilavasitə və ya dolayı yolla işin nəticəsində maraqlı olmasına, obyektivliyinə və qərəzsizliyinə dair şübhə doğuran kifayət qədər əsas varsa. Həmin Məcəllənin 21.1-ci maddəsinə əsasən, bu Məcəllənin 19 və 20-ci maddələrində göstərilən hallar olduqda hakim, ekspert, mütəxəssis, tərcüməçi, məhkəmə iclasının katibi özüözünə etiraz etməyə borcludur. İşdə iştirak edən şəxslər də həmin əsaslar üzrə etiraz edə bilərlər. Həmin Məcəllənin 21.2-ci maddəsinə əsasən, etiraz etmə və ya özü-özünə etiraz etmə yazılı formada əsaslandırılmalı və işə mahiyyəti üzrə baxılmağa başlanana qədər edilməlidir. Sonradan etiraz etməyə və ya özü-özünə etiraz etməyə yalnız o halda yol verilir ki, etirazın əsasları məhkəməyə və etiraz edənə işə baxılmağa başlanandan sonra məlum olsun. Həmin Məcəllənin 22.5-ci maddəsinə əsasən, əgər etiraz birinci instansiya məhkəməsində işə baxan məhkəmə sədrinə, yaxud təktərkibli məhkəmənin hakiminə edilmişsə, bu halda etiraz, baxılmaq üçün apellyasiya instansiyası məhkəməsinə göndərilir. «Məhkəmələr və hakimlər haqqında» Azərbaycan Respublikası Qanununun 8-ci maddəsində göstərilir ki, ədalət mühakiməsi hakimlərin müstəqilliyi təmin edilməklə, heç bir məhdudiyyət qoyulmadan, faktlara əsasən, qərəzsiz, ədalətlə və qanunlara müvafiq həyata keçirilir. «İnsan hüquqlarının və əsas azadlıqlarının müdafiəsi haqqında» Avropa Konvensiyasının 6-cı maddəsinin birinci hissəsində göstərilmişdir ki, hər kəs onun hüquq və vəzifələri müəyyən edilərkən və ya ona qarşı hər hansı cinayət ittihamı irəli sürülərkən, qanun əsasında yaradılmış müstəqil və qərəzsiz məhkəmə vasitəsi ilə, ağlabatan müddətdə işinin ədalətli və açıq araşdırılması hüququna malikdir. Göründüyü kimi, Konvensiyada “qərəzsiz” məhkəmə baxışının keçirilməsi ədalətli məhkəmə araşdırması hüququnun ayrılmaz tərkib hissəsi, təməl prinsipi kimi nəzərdə tutulur. Konvensiyanın bu prinsipinin təcrübədə tətbiqi ilə bağlı Avropa Məhkəməsi bir sıra qərarlarında göstərmişdir məhkəmənin müstəqilliyi həm də zahiri əlamətlərə malik olmalıdır. Məsələn, «Fay Avstriyaya qarşı» ## ###### 1993-cü il tarixli qərarın 28-ci bəndində məhkəmə izah etmişdir ki, 6-cı maddənin 1-ci bəndinin məqsədləri üçün qərəzsizliyin mövcudluğu subyektiv test əsasında, yəni konkret hakimin konkret iş üzrə şəxsi mövqeyi əsasında, habelə obyektiv test əsasında, yəni hakimin təqdim etdiyi təminatların onun qərəzsizliyi ilə bağlı hər hansı haqlı şübhələri istisna edib-etmədiyini müəyyənləşdirmək əsasında müəyyən edilməlidir. Subyektiv testə gəldikdə, bunun əksi sübut olunmayınca ehtimal edilməlidir ki, hakimin şəxsi qərəzliliyi yoxdur. Hazırki işdə obyektiv test tətbiq edilməlidir. Obyektiv testə əsasən, hakimin şəxsi davranışından savayı, onun qərəzsizliyinə qarşı şübhələr yarada bilən inandırıcı faktların olub-olmadığı müəyyən edilməlidir. Bu baxımdan hətta zahiri əlamətlər də müəyyən əhəmiyyət kəsb edə bilər. Burada söhbət demokratik cəmiyyətdə məhkəmələrin ictimaiyyətdə və ilk proses iqştirakçısında doğurduğu inamdan gedir. Bu o deməkdir ki, konkret halda konkret hakimin qərəzsiz olmadığından ehtiyatlanmaq üçün haqlı səbəbin mövcud olub-olmadığı barədə qərar çıxararkən proses iştirakçısının mövqeyi önəmlidir, amma həlledici deyil. Həlledici olan odur ki, bu ehtiyatlanmanın obyektiv əsasa söykəndiyi müəyyən edilməlidir. Baxılan işdə də məhkəmənin qərəzsizliyi və obyektivliyi şübhə doğurmasa da, lakin ədalət mühakiməsinin proses iştirakçılarının nəzərində inam hissinə əsaslanan şəraitdə keçirilməsi əsas məqsəddir və ona görə də işə baxan hakimin (məhkəmənin sədri) özü-özünə etirazı təmin edilməlidir. Məhkəmə kollegiyası həmçinin mübahisənin xarakterini, tərəflərin yaşayış yerini və diqqətəlayiq digər halları nəzərdən keçirərək hesab edir ki, iş baxılması üçün Naftalan Şəhər Məhkəməsinə göndərilməlidir. Qeyd edilənlərə əsasən və Azərbaycan Respublikasının MPM-nin 21-22, 263-264 və 402.2-ci maddələrini rəhbər tutaraq, məhkəmə kollegiyası, QƏRARA ALDİ: İddiaçı X8 cavabdehlər Əlizadə Coşqun İlqar oğlu və Rəhimov İlqar Əli oğluna qarşı zəbt edilmiş torpaq sahəsinin qaytarılması və maddi ziyan tələbinə dair mülki iş üzrə Tərtər Rayon Məhkəməsinin işə baxan hakimi, eyni zamanda məhkəmənin sədri səlahiyyətlərini müvəqqəti icra edən Kamil Rzayev tərəfindən özü-özünə verilmiş etiraz təmin edilsin və mülki iş baxılması üçün Naftalan Şəhər Məhkəməsinə göndərilsin. Qərardaddan şikayət verilə bilməz. Qərardad çıxarıldığı andan qanuni qüvvəyə minir.