Bakı şəhəri Qaradağ Rayon Məhkəməsi Qərardad — İş №e-2(002)-2182/2022

Azərbaycan Respublikası adından QƏRARDAD Bakı şəhəri İş № e-2(002)-2182/2022 15.07.2022 BAKI ŞƏHƏRİ QARADAĞ RAYON MƏHKƏMƏSİ İddiaçı cavabdeh Azərbaycan Respublikası Daxili İşlər Nazirliyinin Baş X1 İdarəsinə qarşı “qərarın ləğv edilməsi” tələbinə dair iddia ərizəsini və ona əlavə edilmiş sənədləri nəzərdən keçirərək, məhkəmə MÜƏYYƏN ETDİ: İddiaçı cavabdeh Azərbaycan Respublikası Daxili İşlər Nazirliyinin Baş X1 İdarəsinə qarşı “qərarın ləğv edilməsi” tələbinə dair ərizəsi ilə məhkəməyə müraciət edərək, EQ9183330,EQ9202925,EQ9164319 saylı protokollara görə çıxarılmış qərar ləğv edilsin və buna protokollara görə ödənilmiş 91 AZN məbləğində cərimələr ona geri ödənilməsi barədə qətnamə qəbul edilməsini xahiş etmişdir. İddia ərizəsi və ona əlavə edilmiş sənədləri nəzərdən keçirərək məhkəmə hesab edir ki, iddia ərizəsi icraata qəbul etməkdən imtina edilməlidir. Belə ki, Azərbaycan Respublikasının Mülki Prosessual Məcəlləsinin 153.2.1-ci maddəsinə əsasən ərizəyə məhkəmə qaydasında və ya mülki məhkəmə icraatı qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir; 153.5-ci maddəsinə əsasən ərizəni qəbul etməkdən imtina edilməsi iddiaçıya həmin cavabdehə qarşı, həmin predmet barəsində və həmin əsaslarla yenidən iddia qaldırmağa mane olur; 153.6-cı maddəsinə əsasən iddia ərizəsini qəbul etməkdən imtina barədə qərardaddan şikayət verilə bilər. İddia ərizəsinin məzmunundan aydın olur ki, qeyd edilən tələb inzibati xəta haqqında işlər üzrə qəbul edilmiş qərardan şikayətlə bağlıdır ki, həmin tələblə bağlı yaranmış mübahisəli hüquq münasibətlərinə mülki məhkəmə icraatı qaydasında baxılmır. Ona görə də məhkəmə hesab edir ki, qeyd edilən iddia ərizəsinin məhkəmə icraatına qəbul edilməsindən imtina olunmalıdır. Həmçinin, iddia ərizəsi vermiş şəxsə izah edilməlidir ki, inzibati xətalar haqqında işlər üzrə qəbul edilmiş qərarlardan şikayət vermə qaydası və proseduru Azərbaycan Respublikası İnzibati Xətalar Məcəlləsində qeyd olunmuş, həmin qanunvericiliyin tələbinə uyğun qaydada və prosedura əməl etməklə şikayət vermək hüququna malikdir. Şərh olunanlara əsasən və Azərbaycan Respublikası Mülki Prosessual Məcəlləsinin 153, 266-268-ci maddələrini rəhbər tutaraq, QƏRARA ALDİ: İddiaçı cavabdeh Azərbaycan Respublikası Daxili İşlər Nazirliyinin Baş X1 İdarəsinə qarşı “qərarın ləğv edilməsi” tələbinə dair iddia ərizəsi icraata qəbul edilməsindən imtina edilsin. İddia ərizəsi və ona əlavə olunmuş sənədlər ərizəçiyə geri qaytarılsın. Qərardaddan, qərardad tərəflərə rəsmi qaydada verildikdən sonra 10 gün müddətində Bakı şəhəri Qaradağ Rayon Məhkəməsinə şikayət verilə bilər. Hakim: Gülnar Əhmədova