Bakı Şəhəri Yasamal Rayon Məhkəməsi Qətnamə — İş №e-2(004)-6072/2025

Azərbaycan Respublikası adından QƏTNAMƏ Bakı şəhəri İş № e-2(004)-6072/2025 02.12.2025 BAKI ŞƏHƏRİ YASAMAL RAYON MƏHKƏMƏSİ Hakim Xudayev Kərim Bahəddin oğlunun sədrliyi, Almasova Aytən Asəf qızının katibliyi, İddiaçı Azərbaycan Respublikası Müdafiə Nazirliyinin nümayəndəsi X1, Cavabdeh1 nümayəndəsi və vəkili Nümayəndə iştirakları ilə, İddiaçı Azərbaycan Respublikası Müdafiə Nazirliyinin cavabdehlər Cavabdeh1 və Cavabdeh2 qarşı “xüsusi təyinatlı yaşayış sahəsindən məcburi çıxarma” tələbinə dair iddiası üzrə mülki işə açıq məhkəmə iclasında baxaraq, məhkəmə MÜƏYYƏN ETDİ: İddiaçı Azərbaycan Respublikası Müdafiə Nazirliyi cavabdehlər Cavabdeh1 və Cavabdeh2 qarşı “xüsusi təyinatlı yaşayış sahəsindən məcburi çıxarma” tələbinə dair iddia ərizəsi ilə məhkəməyə müraciət edərək, Cavabdeh1 və həyat yoldaşı Cavabdeh2 Bakı şəhəri, Yasamal rayonu, Hüseyn Cavid prospekti 182 ünvanında yerləşən və Müdafiə Nazirliyinin mənzil fonduna aid olan xidməti yaşayış sahəsindən məcburi çıxarılması üçün iddia ərizəsinin təmin olunması barədə qətnamə çıxarılmasını xahiş etmişdir. İddiaçı iddia tələbini onunla əsaslandırmışdır ki, Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxanası 4 avqust 1989-cu il tarixli 386 nömrəli dövlət aktından da göründüyü kimi “xüsusi təyinatlı yaşayış sahəsi” olmaqla Azərbaycan Respublikasının Müdafiə Nazirliyinin mənzil fonduna aiddir. Bakı Qarnizonu Mənzil-İstismar hissəsinin rəisi mayor Nail Ağayevin xx.xx.2024-cü il tarixli 433saylı məktubu əsasında vətəndaş Cavabdeh1 ailə üzvləri ilə birlikdə Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxanasının 404, 420 nömrəli otağa müvəqqəti yerləşdirilmişdir. Azərbaycan Respublikası Fövqəladə Hallar Nazirliyindən Müdafiə Nazirliyinə daxil daxil olan xx.xx.2025-ci il tarixli 0039/25 №-li rəyindən görünür ki, Azərbaycan Respublikası Fövqəladə Hallar Nazirliyi Tikintidə X3 Agentliyinin və “Azərinşaatlayihə” Dövlət Baş Layihə-Konstruktor və Texnoloji İnstitutunun “Bina və qurğuların yükdaşıyan inşaat konstruksiyalarının müayinəsi” qaydalarına əsaslanan sözügedən rəyində Müdafiə Nazirliyinin balansında olan Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxana binasında halhazırda insanların yaşaması (olması) üçün təhlükənin mövcud olması barədə nəticəyə gəlməklə, tikinti konstruksiyalarının yükgötürmə qabiliyyətinin və istismar göstəricilərinin zəifləməsi səbəbindən, bina texniki cəhətdən yolverilməz kimi qiymətləndirilmiş, binada təhlükəsizliyin təmin olunması üçün müvafiq layihə əsasında bərpa və gücləndirmə işlərinin aparılmasının zəruri olduğu bildirilmişdir. Yuxarıda qeyd edilənləri nəzərə alaraq, Müdafiə Nazirliyinin Əsaslı Tikinti İdarəsi tərəfindən Cavabdeh1 oğluna müxtəlif tarixlərdə xəbərdarlıq məktubu ünvanlanaraq Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxana binasında olan 404, 420 nömrəli xidməti otaqları Müdafiə Nazirliyinin mənzil fonduna təhvil verməsinin zərurəti bildirilmiş, lakin edilmiş xəbərdarlıqlara baxmayaraq sözügedən xidməti yaşayış sahəsini hazırkı tarixədək təhvil verməkdən imtina etmişdir. Azərbaycan Respublikası Mənzil Məcəlləsinin 4-cü bölməsində xüsusi təyinatlı mənzil fondu barədə məlumatlar əks olunmuşdur. Bu bölmənin 9-cu fəslinin 91-ci maddəsinə əsasən xüsusi təyinatlı mənzil fondunun yaşayış sahələri göstərilmişdir: 1. xidməti yaşayış sahələri; 2. yataqxanalarda yaşayış sahələri; 3. manevr fondu yaşayış sahələri; 4. əhaliyə sosial xidmət sisteminə daxil olan binalarda yaşayış sahələri; 5. məcburi köçkünlərin müvəqqəti yerləşdirilməsi fondunun yaşayış sahələri; 6. qaçqın statusuna malik olan şəxslərin müvəqqəti yerləşdirilməsi fondunun yaşayış sahələri; 7. ayrı-ayrı kateqoriyalardan olan vətəndaşların sosial müdafiəsi üçün yaşayış sahələri. Mənzil Məcəlləsinin 10-cu fəslinin 98.1-ci maddəsində qeyd olunmuşdur ki, xüsusi təyinatlı yaşayış sahələri onların mülkiyyətçilərinin (mülkiyyətçilərin adından çıxış edən səlahiyyətli dövlət orqanı və ya bələdiyyələrin) və ya onların səlahiyyətli şəxslərinin qərarları ilə xüsusi təyinatlı yaşayış sahələrinin kirayə müqavilələri əsasında verilir. Həmçinin, Azərbaycan Respublikası Müdafiə nazirinin “Azərbaycan Respublikası Silahlı Qüvvələrində xüsusi təyinatlı yaşayış sahəsi ilə təmin olunma qaydaları haqqında Əsasnamə”nin təsdiq edilməsi barədə 2 nömrəli qərarının 6-cı maddəsində də Azərbaycan Respublikası Silahlı Qüvvələrinin hərbi qulluqçuları və mülki işçilərinin xüsusi təyinatlı mənzil fondunun xüsusi təyinatlı yaşayış sahəsi ilə “Xüsusi təyinatlı yaşayış sahəsinin kirayə müqaviləsi” (17 nömrəli əlavə) əsasında təmin edildiyi göstərilmişdir. Nəzərə alınmalıdır ki, Cavabdeh1 oğlu və ailə üzvləri həmin yataqxanada olan yaşayış sahəsində müqavilə əsasında yox, Bakı Qarnizonu Mənzil-İstismar hissəsinin rəisi mayor Nail Ağayevin xx.xx.2024-cü il tarixli 433 saylı məktubu əsasında yerləşdirilmişlər. Həmçinin nəzərinizə çatdırılır ki, Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinə verilmiş xx.xx.2025-ci il tarixli 4/2-3503/25 saylı sorğuya cavab olaraq xx.xx.2025-ci il tarixli 3-21-3-02/2-7333/2025 saylı məktubla daxil olmuş siyahıda vətəndaş Cavabdeh1 və Cavabdeh2 adına Beyləqan rayonu, Bünyadlı kəndində yerləşən 0,5846 hektar kənd təsərrüfatı təyinatlı torpaq sahəsi, həmçinin Bərdə rayonu, Nazırlı kəndində yerləşən ümumi birgə mülkiyyət hüququ ilə 1,98 və 1,65 hektar kənd təsərrüfatı təyinatlı torpaq sahəsinin olması müəyyən edilmişdir. Yuxarıda göstərilənlər nəzərə alınaraq, onun digər ailə üzvləri ilə birlikdə həmin yaşayış sahəsini boşaltması və aidiyyəti üzrə təhvil verməsinə dair qətnamə qəbul edilməldir. Daha sonra, Cavabdeh1 nümayəndəsi və vəkili Nümayəndə iddia ərizəsinə etiraz ünvanlayaraq iddiaçı Azərbaycan Respublikası Müdafiə Nazirliyinin iddia tələbinin təmin olunmaması barədə qətnamə çıxarılmasını xahiş etmişdir. Etiraz ərizəsi onunla əsaslandırılmışdır ki, Cavabdeh1 Cavabdeh2 ilə 2011-ci ildə ailə həyatı qurmuşdur və nikah dövründə xx.xx.2011-ci il təvəllüdlü X7 və xx.xx.2013-cü il təvəllüdlü X5 anadan olmuşdur. Cavabdeh1 uzun müddət Azərbaycan Respublikası Müdafiə Nazirliyinin müxtəlif hərbi hissələrində müəyyən vəzifələrdə xidmət etmişdir. Belə ki, 09 iyun 2014-cü il tarixli, N nömrəli N saylı hərbi hissənin komandirinin əmrindən çıxarışa əsasən, 3cü motoatıcı taborun 9-cu motoatıcı bölüyün 3-cü motoatıcı manqa komandiri 3-cü Ordu Korpusu komandirinin 29 may 2014-cü il tarixli 0102əç nömrəli əmri ilə "Hərbi xidmətkeçmə haqqında” Əsasnamənin 156-cı maddəsinin “v” bəndinə (xəstəliyə görə) əsasən hərbi xidmətdən ehtiyata buraxılmışdır. Belə ki, 07 may 2014-cü il tarixli, 952 nömrəli “Xəstəlik haqqında şəhadətnamə”yə əsasən, diaqnoz və xəsarətin (yaralanmanın, travmanın, kontuziyanın), xəstəliyin əlaqəsi haqqında hospital HHK-nın qərarı “sağ gözün üst qapağının ptozu, görmə sinirinin hissəvi atrofiyası nəticəsində görmə itiliyinin 0,03-ə qədər azalması; korreksiya olunmur. Sol gözün görmə itiliyi 1,0 olmaqla xəstəlikdir, hərbi xidmət dövründə alınmışdır" və “sülh dövründə hərbi xidmətə yararsız, müharibə dövründə məhdud yararlıdır” kimi olmuşdur. Əlavə olaraq bildirilir ki, 18 ildən çox Azərbaycan Respublikası Silahlı Qüvvələrində xidmət etdiyi müddətdə yüksək səviyyədə öz vəzifəsini icra etmiş, yuxarı komandanlıq tərəfindən dəfələrlə dövlət təltifləri (medalları) ilə təltif olunmuşdur. Belə ki, Cavabdeh1 Azərbaycan Respublikası Müdafiə nazirinin müvafiq əmrləri ilə “Qüsursuz xidmətə görə” 3-cü dərəcəli, “Azərbaycan Respublikası Silahlı Qüvvələrinin 95 illiyi” yubiley medalı və “Azərbaycan Respublikası Silahlı Qüvvələrinin 100 illiyi (1918-2018)” yubiley medallarına layiq görülmüşdür. Bildirir ki, hərbi təqaüddə olduğu müddətdə 01 oktyabr 2005ci ildə ildə ailəsi ilə birgə yaşamağı üçün Müdafiə Nazirliyinin nəzdində olan "Turan" Hərbi yataqxanasında, 404 (ümumi sahəsi 16 kv. metr) və 420 (ümumi sahəsi 11 kv. metr) nömrəli otaqlarla təmin olunmuşdur. Ailə üzvlərinin sayı onunla birgə 4 nəfər olsa da, onlara mənzil qanunvericiliyinin müəyyən edilən normadan (bir nəfər üçün 16 kv. metr) az yaşayış sahəsi verilmişdir. Yəni istər cavabdehin, istərsə də həyat yoldaşının adına, mülkiyyətlərində yaşayış və yaxud fərdi evlərin tikintisi üçün hər hansı bir torpaq sahəsi, fərdi ev və yaxud mənzil olmadığından qanunvericiliyin tələblərinə uyğun olaraq yaşayış yeri kimi ailəsi ilə birgə həmin xidməti mənzillə təmin olunmuşlar. Həmin vaxtdan qeyd olunan otaqda yaşamaqdadırlar. İddiaçı öz iddia ərizəsində bildirmişdir ki, hazırda “Turan” hərbi yataqxanasında bərpa və cari təmir işləri aparılmalıdır və bu səbəbdən mənzil tərəfimizdən təhvil verilməlidir. Lakin cavabdeh bildirir ki, onun və ailəsinin adına yaşayış üçün hər hansı mənzil və ya torpaq sahəsi olmadığından qeyd olunan otaqdan başqa yaşaya biləcəkləri hər hansı bir yer, yaşayış sahəsi yoxdur. Həmçinin iddia ərizəsində qeyd olunur ki, Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinə verilmiş xx.xx.2025-ci il tarixli 4/2- 3503/25 saylı sorğuya cavab olaraq xx.xx.2025-ci il tarixli 3-21-3-02/2-7333/2025 saylı məktubla daxil olmuş siyahıda vətəndaş Cavabdeh1 və Cavabdeh2 adına Beyləqan rayonu, Bünyadlı kəndində yerləşən 0,5846 hektar kənd təsərrüfatı təyinatlı torpaq sahəsi, həmçinin Bərdə rayonu, Nazirli kəndində yerləşən ümumi birgə mülkiyyət hüququ ilə 1,98 və 1,65 hektar kənd təsərrüfatı təyinatlı torpaq sahəsinin olması müəyyən edilmişdir. Cavabdeh bu hal ilə bağlı qeyd etmək istəyir ki, sorğuya cavab olaraq göndərilmiş xx.xx.2025-ci il tarixli 3-21-3-02/2-7333/2025 saylı məktubda da göstərilir ki, həmin torpaq sahələri - Beyləqan rayonu, Bünyadlı kəndində yerləşən 0,5846 hektar kənd təsərrüfatı təyinatlı torpaq sahəsi, həmçinin Bərdə rayonu, Nazirli kəndində yerləşən ümumi birgə mülkiyyət hüququ ilə 1,98 və 1,65 hektar kənd təsərrüfatı təyinatlı torpaq sahəsinin təyinatı kənd təsərrüfatı məqsədlidir. Yəni həmin torpaq sahələri üzərində mənzil tikilməsi qanunvericiliyin tələblərinə uyğun və faktiki olaraq mümkün deyildir. Etiraza əlavə edilən Bakı Qarnizonu Mənzil-İstismar Hissəsinin rəisi tərəfindən verilmiş 433 nömrəli, 27 fevral 2024-cü il tarixli məktubda qeyd olunmuşdur ki, cavabdeh hərbi təqaüdçü kimi ailə üzvləri ilə birgə uzun müddət yaşadıqları üçün Bakı şəhəri, Yasamal rayonu, “Turan” Yataqxanasında yerləşən 404, 420 nömrəli otaqlarla işlədiyi dövr ərzində müvəqqəti təmin edilməlidir. Bununla da, Müdafiə Nazirliyinin hazırki tələbinin təmin olunması Azərbaycan Respublikası Silahlı Qüvvələrində uzun müddət xidmət etmiş və xəstəliyə görə təxris olunan hərbi təqaüdçünün və ailəsinin küçədə qalması ilə nəticələnməsi deməkdir. Əlavə olaraq cavabdeh qeyd etmək istəyir ki, hazırda yaşadıqları yaşayış sahəsi üzrə kommunal xidmətlər onun adınadır. Bu halı təsdiq edən qəbzlər ərizəyə əlavə olunur. “Hərbi qulluqçuların statusu haqqında” Azərbaycan Respublikası Qanunun 12ci maddəsinin 2-ci bəndinə əsasən, Azərbaycan Respublikası Silahlı Qüvvələrində 15 təqvim ili və daha çox xidmət etmiş xidməti mənzillərdə yaşayan və ya yaşayış sahəsi olmayan hərbi qulluqçuların (müddətli həqiqi hərbi xidmət hərbi qulluqçularından başqa), ehtiyata və ya istefaya buraxılmış hərbi qulluqçuların qanunvericilikdə nəzərdə tutulmuş qaydada 6 ay müddətinə yerli icra hakimiyyəti orqanı tərəfindən yaşayış sahəsi və ya fərdi yaşayış evinin tikintisi üçün müəyyən olunmuş qaydada bələdiyyələrdən pulsuz torpaq sahəsi almaq hüququ vardır. Lakin cavabdeh bildirir ki, qanunda tələblərini ödədiyi bu müddəanın olmasına baxmayaraq, ona hər hansı yaşayış sahəsi və ya fərdi yaşayış evinin tikilməsi üçün pulsuz torpaq sahəsi verilməmişdir. Həmin Qanunun 12-ci maddəsinin 2-ci bəndində əlavə olaraq qeyd olunmuşdur ki, bu hüququ həyata keçirdikdən sonra xidməti mənzil sahəsinə malik olan hərbi qulluqçular mənzili müəyyən edilmiş qaydada təhvil verməyə borcludurlar. Qanunvericiliyin tələbinə əsasən, icra hakimiyyəti orqanı müvafiq hüququnu həyata keçirdikdən sonra xidməti mənzil sahəsi tərəfindən müəyyən edilmiş qaydada təhvil verilməlidir. Cavabdeh bildirir ki, ona alternativ olaraq hər hansı xidməti mənzil sahəsi təqdim olunmadığından, “Turan” hərbi yataqxanasında yaşadıqları 404, 420 nömrəli otaqları təhvil verəcəyi təqdirdə ailəsi ilə yaşamağa yerləri olmadığından, sözün əsl mənasında küçədə qalmalı olacaqları üçün hazırda yaşadığı mənzili təhvil verməyi qeyri-mümkündür. Beləliklə, cavabdehin qeyd etdiklərindən də görünür ki, Azərbaycan Respublikası Müdafiə Nazirliyi qanunsuz şəkildə, yəni qanunun müddəasının ziddinə olaraq qanunla nəzərdə tutulmuş torpaq sahəsinin ona ayrılmağı hüququ təmin olunmadan, yaşamaq üçün hər hansı mənzillərinin, torpaqlarının olmamasını nəzərə almadan, cavabdehi və ailəsini məcburi şəkildə hazırda yaşadıqları xidməti mənzil sahəsindən çıxarmağa çalışır. Bu səbəbdən hazırda ailəsi ilə birgə yaşayış yeri ilə təmin olunmağına, ona məxsus hüququn (Azərbaycan Respublikası Silahlı Qüvvələrində 15 təqvim ili və daha çox xidmət etmiş xidməti mənzillərdə yaşayan və ya yaşayış sahəsi olmayan hərbi qulluqçuların ehtiyata buraxılmış hərbi qulluqçuların qanunvericilikdə nəzərdə tutulmuş qaydada 6 ay müddətinə yerli icra hakimiyyəti orqanı tərəfindən yaşayış sahəsi və ya fərdi yaşayış evinin tikintisi üçün müəyyən olunmuş qaydada bələdiyyələrdən pulsuz torpaq sahəsi almaq hüququ vardır) həyata keçirilməsinə, Azərbaycan Respublikası Müdafiə Nazirliyinin qanunsuz tələbinə son qoyulmasına ehtiyac vardır. Məhkəmə iclasında iştirak edən iddiaçı Azərbaycan Respublikası Müdafiə Nazirliyinin nümayəndəsi X4 iddia ərizəsinin məzmununa uyğun izahat verərək, iddianı müdafiə edərək iddianın təmin edilməsini məhkəmədən xahiş etmişdir. Məhkəmə iclasında iştirak edən Cavabdeh1 nümayəndəsi və vəkili Nümayəndə etiraz ərizəsinin məzmununa uyğun izahat verərək, iddianın təmin olunmamasını məhkəmədən xahiş etmişdir. Məhkəmə tərəflərin izahatını dinləyib, təqdim olunmuş sübutlara qiymət verərək hesab edir ki, iddia təmin olunmalıdır. Belə ki, iş materiallarında olan “AZƏRİNŞAATLAYİHƏ” Dövlət Baş Layihə-Konstruktor və X2 Nazirliyinin balansında olan Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxana binasının texniki vəziyyəti haqqında xx.xx.2025ci il tarixli rəyindən görünür ki, binada təhlükəsizliyin təmin olunması üçün müvafiq layihə əsasında bərpa və gücləndirmə işləri aparılmalıdır. İş materiallarında olan Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidmətinə verilmiş xx.xx.2025-ci il tarixli 4/2-3503/25 saylı sorğuya cavab olaraq xx.xx.2025-ci il tarixli 3-21-3-02/2-7333/2025 saylı məktubla daxil olmuş siyahıdan görünür ki, vətəndaş Cavabdeh1 və Behbu dova Sevinc Çingiz qızının adına Beyləqan rayonu, Bünyadlı kəndində yerləşən 0,5846 hektar kənd təsərrüfatı təyinatlı torpaq sahəsi, həmçinin Bərdə rayonu, Nazırlı kəndində yerləşən ümumi birgə mülkiyyət hüququ ilə 1,98 və 1,65 hektar kənd təsərrüfatı təyinatlı torpaq sahəsinin olması müəyyən edilmişdir. İş materiallarında olan Müdafiə Nazirliyinin Mənzil-İstismar İdarəsinin Rəisi mayor Nail Ağayev tərəfindən “Turan” hərbi yataqxanasının komendantına təqdim etmək üçün verilmiş 433 nömrəli, xx.xx.2024-cü il tarixli məktubdan görünür ki, hərbi təqaüdçü Cavabdeh1 və onun ailə üzvləri uzun müddət yaşadıqları üçün Bakı şəhəri, Yasamal rayonu “Turan” hərbi yataqxanasında yerləşən 404,420 nömrəli otaqlarla işlədiyi dövr ərzində müvəqqəti təmin edilməsi tələb olunmuşdur. İş materiallarında olan Bakı Qarnizonu Mənzil-İstismar hisəsi tərəfindən Cavabdeh1 ünvanlanmış 1796 nömrəli, xx.xx.2025-ci il tarixli xəbərdarlıqdan görünür ki, Müdafiə Nazirliyinin Mənzil-istismar xidməti rəisinin xx.xx.2025-ci il tarixli 381 nömrəli Bakı Qarnizonu Mənzil-İstismar hissəsi rəisinin xx.xx.2025-ci il tarixli 24 nömrəli telefonoqrammalarına əsasən Turan yataqxanasında əsaslı təmir işləri aparılacaq. Qeyd olunanları nəzərə alaraq, Turan yataqxanasında yaşadığı 404 və 420 nömrəli otaqların 30 iyul 2025-ci il tarixədək təhvil verilməsi tələb olunmuşdur. İş materiallarında olan Beyləqan rayonu Bünyadlı kənd ərazi nümayəndəliyi tərəfindən verilmiş xx.xx.2011-ci il tarixli, AZ-İ seriyalı 626718 nömrəli Nikah haqqında Şəhadətnamənin surətindən görünür ki, Cavabdeh1 və X6 xx.xx.2011-ci il tarixdə Beyləqan rayonu Bünyadlı kənd ərazi nümayəndəliyində nikaha daxil olmuşdur. Bu barədə nikahın bağlanması haqqında akt qeydləri kitabında 05 nömrəli qeydiyyat aparılmışdır. Nikah bağlandıqdan sonra ərə “Behbudov”, arvada “Behbudova” soyadı verilmişdir. İş materiallarında olan AA seriyalı ******* nömrəli şəxsiyyət vəsiqəsinin surətindən görünür ki, X5 xx.xx.2013-cü il tarixdə doğulmuşdur. İş materiallarında olan AA seriyalı ******* nömrəli şəxsiyyət vəsiqəsinin surətindən görünür ki, X7 xx.xx.2011-ci il tarixdə doğulmuşdur. İş materiallarında olan xx.xx.2023-cü il tarixli vətəndaşın həqiqi hərbi xidmət keçməsinə dair elektron arayışdan görünür ki, çavuş Cavabdeh1 həqiqətən xx.xx.1994-xx.xx.1999, xx.xx.2001-xx.xx.2014 tarixlərində həqiqi hərbi xidmət keçmişdir. Xəstəliyə görə HHK-nın rəyinə əsasən ehtiyata buraxılmışdır. İş materiallarında olan Tibbi-Sosial Ekspert Komissiyasında sonuncu müayinəyə dair məlumatdan görünür ki, Cavabdeh1 “OD-üst göz qapağının ptozu. Görmə sinirinin hissəvi atrofiyası. VİS OD=0.03, OS=1.0” diaqnozu qoyulmuşdur. Hərbi xidmət dövrü ilə əlaqədar üçüncü dərəcə əlilliyi müəyyən olunmuşdur. İş materiallarında olan Cavabdeh1 verilmiş 07 may 2014-cü il tarixli, 952 nömrəli “Xəstəlik haqqında şəhadətnamə”yə əsasən, diaqnoz və xəsarətin (yaralanmanın, travmanın, kontuziyanın), xəstəliyin səbəb əlaqəsi haqqında hospital HHK-nın qərarı: “sağ gözün üst qapağının ptozu, görmə sinirinin hissəvi atrofiyası nəticəsində görmə itiliyinin 0,03ə qədər azalması; korreksiya olunmur. Sol gözün görmə itiliyi 1,0 olmaqla xəstəlikdir, hərbi xidmət dövründə alınmışdır" və “sülh dövründə hərbi xidmətə yararsız, müharibə dövründə məhdud yararlıdır” kimi olmuşdur. İş materiallarında olan 09 iyun 2014-cü il tarixli, N nömrəli N saylı hərbi hissənin komandirinin əmrindən çıxarışa əsasən, Cavabdeh1 3-cü motoatıcı taborun 9-cu motoatıcı bölüyün 3-cü motoatıcı manqa komandiri 3-cü Ordu Korpusu komandirinin 29 may 2014-cü il tarixli 0102əç nömrəli əmri ilə "Hərbi xidmətkeçmə haqqında” Əsasnamənin 156-cı maddəsinin “v” bəndinə (xəstəliyə görə) əsasən hərbi xidmətdən ehtiyata buraxılmışdır. İş materiallarında olan 133 nömrəli 2025-ci il tarixli arayışdan görünür ki, Cavabdeh1 həqiqətən xx.xx.2055-ci il tarixdən ünvan 3 ünvanında yerləşən “Turan” yataqxanasının 404,420 nömrəli otağında yaşayır. İş materiallarında olan vəsiqədən görünür ki, Cavabdeh1 Azərbaycan Respublikası Müdafiə nazirinin 19 iyul 2008-ci il tarixli əmri ilə “Azərbaycan Respublikası Silahlı Qüvvələrinin 90 illiyi (1918-2018)” yubiley medalı ilə təltif olunmuşdur. İş materiallarında olan vəsiqədən görünür ki, Cavabdeh1 Azərbaycan Respublikası Müdafiə nazirinin 24 iyun 2013-cü il tarixli əmri ilə “Azərbaycan Respublikası Silahlı Qüvvələrinin 95 illiyi” yubiley medalı ilə təltif olunmuşdur. İş materiallarında olan vəsiqədən görünür ki, Cavabdeh1 Azərbaycan Respublikası Müdafiə nazirinin 26 iyun 2007-ci il tarixli əmri ilə “Qüsursuz xidmətə görə” 3-cü dərəcəli medalı ilə təltif olunmuşdur. İş materiallarında olan Azərbaycan Respublikası Müdafiə Nazirliyinin Daxili Təhlükəsizlik və Təhqiqat Baş İdarəsi tərəfindən Əsaslı Tikinti İdarəsinə ünvanlanmış xx.xx.2025-ci il tarixli məktubundan görünür ki, aparılmış araşdırma zamanı “Turan” yataqxanasının 91 birotaqlı və 5 ikiotaqlı mənzillərdən ibarət olması, onlardan 2 mənzilin inzibati otaq kimi istifadə olunduğu, 82 mənzildə 54 ailənin yerləşdirildiyi, 12 mənzilin isə boş olduğu məlum olmuşdur. Həmçinin müəyyən edilmişdir ki, yalnız 5 mənzil kirayə müqaviləsi bağlanılmaqla verilsə də, Mənzil Məcəlləsinin 98-ci maddəsinin (Xüsusi təyinatlı yaşayış sahəsinin verilməsi üçün əsaslar), eləcə də sözügedən Əsasnamənin 6-cı bəndinin tələbləri kobud şəkildə pozularaq 72 mənzil kirayə müqaviləsi bağlanmadan əsassız olaraq Mil və BQ MİH-in məktubları ilə, digər 5 mənzil isə ümumiyyətlə heç bir sənədləşmə aparılmadan müddətsiz istifadəyə verilmişdir. Göstərilənlərə əsasən, aşkar olunmuş qanunsuz halların aradan qaldırılması üçün zəruri tədbirlər görülməsi və nəticəsi barədə DTTBİ-yə məlumat göndərilməsinə dair göstəriş verilməsi xahiş olunmuşdur. Azərbaycan Respublikası Mənzil Məcəlləsinin: 92-ci maddəsinə əsasən Xidməti yaşayış sahələri əmək münasibətlərinin xarakterinə görə müvafiq icra hakimiyyəti orqanının müəyyən etdiyi hallarda və qaydada dövlət orqanına və bələdiyyələrə seçilmə və ya vəzifəyə təyin edilmə, dövlət qulluğunda qulluqkeçmə, hüquqmühafizə və hərbi orqanlarda xidmətkeçmə, habelə dövlət müəssisələrində əmək fəaliyyəti ilə əlaqədar və qanunvericiliklə müəyyən edilmiş digər kateqoriyalardan olan şəxslərə verilir. 98.1-ci maddəsinə əsasən, ayrı-ayrı kateqoriyalardan olan vətəndaşların sosial müdafiəsi üçün əvəzsiz istifadə müqavilələri əsasında verilən yaşayış sahələri istisna olmaqla, xüsusi təyinatlı yaşayış sahələri onların mülkiyyətçilərinin (mülkiyyətçilərin adından çıxış edən səlahiyyətli dövlət orqanı və ya bələdiyyələrin) və ya onların səlahiyyətli şəxslərinin qərarları ilə xüsusi təyinatlı yaşayış sahələrinin kirayə müqavilələri əsasında verilir. 98.2-ci maddəsinə əsasən xüsusi təyinatlı yaşayış sahələri bu Məcəllədə müəyyən edilmiş əsaslarla müvafiq yaşayış məntəqəsində yaşayış sahəsi ilə təmin olunmayan vətəndaşlara verilir. 99.1-99.2-ci maddələrinə əsasən, xüsusi təyinatlı yaşayış sahəsinin kirayə müqaviləsinə görə bir tərəf xüsusi təyinatlı yaşayış sahəsinin mülkiyyətçisi (mülkiyyətçinin adından çıxış edən səlahiyyətli dövlət və ya bələdiyyə orqanı) və ya onun səlahiyyətli şəxsi (kirayəyə verən) həmin yaşayış sahəsini haqqı ödənilməklə müvəqqəti yaşamaq üçün digər tərəfə vətəndaşın (kirayəçinin) sahibliyinə və istifadəsinə verir. Xüsusi təyinatlı yaşayış sahəsinin kirayə müqaviləsi həmin sahənin verilməsi haqqında qərar əsasında bağlanılır. 101.1-ci maddəsinə görə, xüsusi təyinatlı yaşayış sahəsinin kirayə müqaviləsinə həmin yaşayış sahəsinin məhv olması ilə əlaqədar və ya bu Məcəllədə nəzərdə tutulmuş digər əsaslar olduqda xitam verilir. 101.2-ci maddəsinə əsasən xidməti yaşayış sahəsinə və ya yataqxanada yaşayış sahəsinə mülkiyyət hüququnun başqasına keçməsi, habelə həmin yaşayış sahəsinin digər dövlət (bələdiyyə) orqanının təsərrüfat idarəçiliyinə və ya operativ idarəçiliyinə verilməsi həmin yaşayış sahəsinin kirayə müqaviləsinin xitamına səbəb olur. Bu müddəa yaşayış sahəsinin yeni mülkiyyətçisinin və ya təsərrüfat idarəçiliyinə və ya operativ idarəçiliyinə yaşayış sahəsi verilmiş dövlət (bələdiyyə) orqanının həmin xüsusi təyinatlı yaşayış sahəsinin kirayəçisi ilə əmək müqaviləsinin tərəfi olduğu hallara şamil edilmir. 102.1-ci maddəsinə əsasən, Xüsusi təyinatlı yaşayış sahəsinin kirayə müqavilələri ləğv edildikdə və ya onlara xitam verildikdə, vətəndaşlar həmin müqavilələr əsasında kirayəyə götürdükləri yaşayış sahələrini boşaltmalıdır. Həmin yaşayış sahələrini boşaltmaqdan imtina edildikdə, bu Məcəllənin 101.2-ci və 102.2-ci maddələrində nəzərdə tutulmuş hallar istisna olmaqla, vətəndaşlar başqa yaşayış sahəsi verilmədən məhkəmə qaydasında yaşayış sahəsindən çıxarılır. 102.2-ci maddəsinə əsasən, Sosial kirayə müqavilələri əsasında yaşayış sahələrinin kirayəçisi və ya sosial kirayə müqavilələri əsasında yaşayış sahəsinin kirayəçisinin ailə üzvləri, yaxud yaşayış sahəsinin mülkiyyətçisi və ya yaşayış sahəsi mülkiyyətçisinin ailə üzvləri olmayan və yaşayış sahəsinə ehtiyacı olan qismində uçota alınmış aşağıdakı şəxslər xidməti yaşayış sahələrindən və yataqxanalarda yaşayış sahələrindən digər yaşayış sahəsi verilmədən çıxarıla bilməz: 102.2.1. hərbi xidmət vəzifələrinin və ya xidməti vəzifələrin icrası zamanı həlak olmuş (ölmüş) və ya itkin düşmüş hərbi qulluqçuların, müvafiq icra hakimiyyəti orqanlarının vəzifəli şəxslərinin, əməkdaşlarının ailə üzvləri; 102.2.2. yaşa görə pensiyaçılar; 102.2.3. xidməti yaşayış sahəsi və ya yataqxanada yaşayış sahəsi verilmiş ölmüş işçinin ailə üzvləri; 102.2.4. işəgötürənin təqsiri üzündən baş vermiş istehsalat qəzası nəticəsində orqanizmin funksiyalarının 61-100 faiz pozulmasına görə əlilliyi müəyyən edilmiş, peşə xəstəliyinə tutulma nəticəsində orqanizmin funksiyalarının 61-100 faiz pozulmasına görə əlilliyi müəyyən edilmiş şəxslər, hərbi xidmət vəzifələrinin yerinə yetirilməsi zamanı yaralanmış, kontuziya nəticəsində və ya hərbi xidmət vəzifələrinin yerinə yetirilməsi ilə əlaqədar xəstəlik nəticəsində orqanizmin funksiyalarının 61-100 faiz pozulmasına görə əlilliyi müəyyən edilmiş hərbi qulluqçular. 102.3-cü maddəsinə əsasən, Bu Məcəllənin 102.2-ci maddəsində göstərilən vətəndaşlara müvafiq yaşayış məntəqəsinin hüdudları daxilində və ya onların yazılı razılığına əsasən digər yaşayış məntəqəsində yerləşən yaşayış sahələri verilir. 103.3-cü maddəsinə əsasən Xidməti yaşayış sahəsinin kirayə müqaviləsi bu Məcəllənin 92-ci maddəsində göstərilən əmək, qulluq və ya seçkili vəzifədə qalma müddətlərini əhatə edir. Həmin əmək və ya qulluq münasibətlərinin, habelə seçkili vəzifədə qalmanın xitamı xidməti yaşayış sahəsinin kirayə müqaviləsinə xitam verilməsi üçün əsasdır. “Azərbaycan Respublikası Silahlı Qüvvələrində xüsusi təyinatlı yaşayış sahəsi ilə təmin olunma qaydaları haqqında” Əsasnamənin 1.1-ci bəndinə əsasən, həqiqi hərbi xidmətdə olan generallar, admirallar, zabitlər, gizirlər, miçmanlar və müddətdən artıq həqiqi hərbi xidmət hərbi qulluqçuları (mülki işçilər) və onlarla birlikdə yaşayan ailə üzvləri (əri və ya arvadı, uşaqları, valideynləri, eyni zamanda hərbi qulluqçuların (mülki işçilərin) himayəsində olan digər şəxslər) bu əsasnamənin 1.6-cı bəndinə əsasən, göstərilmiş hallardan başqa Azərbaycan Respublikası Müdafiə Nazirliyinin xüsusi təyinatlı mənzil fondu hesabına xidmət yeri üzrə xüsusi təyinatlı yaşayış sahəsi ilə təmin olunurlar. Həmin əsasnamənin 1.13-cü bəndinə əsasən, Azərbaycan Respublikası Silahlı Qüvvələri ilə xidməti münasibəti olmayan şəxslərə Azərbaycan Respublikası Müdafiə Nazirliyinin mənzil fondu hesabına yaşayış sahəsinin verilməsi qadağandır. Həmin əsasnamənin 5.2-ci bəndinə əsasən, bir qarnizonda yerləşən tabeli hərbi hissələr arasında yaşayış sahələrinin bölüşdürülməsi planı qarnizon mənzil komissiyası tərəfindən tərtib edilir, müvafiq rayon, MİH, HDQ-nin Dəniz Mühəndis Xidməti, Müdafiə Nazirliyinin MİŞ rəisi ilə razılaşdırılır, qarnizon mənzil komissiyası sədri tərəfindən imzalanır və həmin qarnizonun rəisi tərəfindən təstiq edilir. Həmin əsasnamənin 5.7- 5.11-ci bəndlərinə əsasən, yaşayış sahəsinin bölüşdürülməsi üçün hərbi hissənin mənzil komissiyasının iclası keçirilir və protokol tərtib olunur. Hərbi hissənin mənzil komissiyasının tərtib etdiyi hərbi hissə üzrə yaşayış sahəsinin bölüşdürülməsi siyahısını komissiyanın sədri və üzvləri imzaladıqdan sonra hərbi hissə komandiri təstiq edir. Yaşayış sahəsinin bölüşdürülməsi siyahısı və hərbi hissənin mənzil komissiyasının protokolundan çıxarış ryonun MİH rəisinə təqdim olunmalı, digər sənədlər isə hərbi hissənin mənzil komissiyasında saxlanılmalıdır. Təqdim olunan sənədlər əsasında tərtib olunan qarnizon üzrə yaşayış sahəsinin bölüşdürülməsi siyahısı rayon MİH-nin rəisi ilə razılaşdırılır, qarnizon üzrə mənzil komissiyasında baxılır, protokollaşdırılır və təsdiq edilməsi üçün qarnizon rəisinə təqdim olunur. Qarnizon rəisi tərəfindən təstiq edilmiş siyahı xüsusi təyinatlı yaşayış sahəsinə kirayə müqaviləsi bağlanması üçün hüquqi əsasdır. İş materiallarında olan Müdafiə Nazirliyinin Mənzil-İstismar İdarəsinin Rəisi mayor Nail Ağayev tərəfindən “Turan” hərbi yataqxanasının komendantına təqdim etmək üçün verilmiş 433 nömrəli, xx.xx.2024-cü il tarixli məktubdan görünür ki, hərbi təqaüdçü Cavabdeh1 və onun ailə üzvləri uzun müddət yaşadıqları üçün Bakı şəhəri, Yasamal rayonu “Turan” hərbi yataqxanasında yerləşən 404,420 nömrəli otaqlarla işlədiyi dövr ərzində müvəqqəti təmin edilməsi tələb olunmuşdur. İş materiallarında olan Bakı Qarnizonu Mənzil-İstismar hisəsi tərəfindən Cavabdeh1 ünvanlanmış 1796 nömrəli, xx.xx.2025-ci il tarixli xəbərdarlıqdan görünür ki, Müdafiə Nazirliyinin Mənzil-istismar xidməti rəisinin xx.xx.2025-ci il tarixli 381 nömrəli Bakı Qarnizonu Mənzil-İstismar hissəsi rəisinin xx.xx.2025-ci il tarixli 24 nömrəli telefonoqrammalarına əsasən Turan yataqxanasında əsaslı təmir işləri aparılacaq. Qeyd olunanları nəzərə alaraq, Turan yataqxanasında yaşadığı 404 və 420 nömrəli otaqların 30 iyul 2025-ci il tarixədək təhvil verilməsi tələb olunmuşdur. Məhkəmə araşdırması zamanı müəyyən edilmişdir ki, Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxanası 4 avqust 1989-cu il tarixli 386 nömrəli dövlət aktından da göründüyü kimi “xüsusi təyinatlı yaşayış sahəsi” olmaqla Azərbaycan Respublikasının Müdafiə Nazirliyinin mənzil fonduna aiddir. Müdafiə Nazirliyinin Mənzil-İstismar İdarəsinin Rəisi mayor Nail Ağayevin 433 nömrəli, xx.xx.2024-cü il tarixli məktubu əsasında vətəndaş Cavabdeh1 ailə üzvləri ilə birlikdə Bakı şəhəri, Yasamal rayonu, Hüseyn Cavid prospekti 182 ünvanında yerləşən “Turan” hərbi yataqxana binasında 404 və 420 nömrəli yaşayış sahəsinə müvəqqəti yerləşdirilmişdir. Cavabdehlərin “Turan” hərbi yataqxana binasında 404 və 420 nömrəli yaşayış sahəsinə müvəqqəti yerləşdirilməsi ilə bağlı isə hər hansı bir sənədləri yoxdur. Azərbaycan Respublikası Mənzil Məcəlləsinin müddəalarına görə, xüsusi təyinatlı yaşayış sahələri kirayə müqavilələri əsasında verilməlidir. Həmçinin, kirayə müqaviləsi həmin sahənin verilməsi haqqında qərar əsasında bağlanılır. İş materiallarından isə cavabdehlərin bu sahəyə yalnız Müdafiə Nazirliyinin Mənzil-İstismar İdarəsinin 433 nömrəli, xx.xx.2024-cü il tarixli məktubu əsasında müvəqqəti yerləşdirildiyi görünür. Kirayə müqaviləsi və ya xüsusi təyinatlı yaşayış sahəsinin verilməsi haqqında qərar iş materiallarında mövcud deyil. Bundan başqa, Müdafiə Nazirliyinin Daxili Təhlükəsizlik və Təhqiqat Baş İdarəsinin xx.xx.2025-ci il tarixli məktubu ilə də təsdiqlənir ki, 72 mənzil, o cümlədən cavabdehlərin məskunlaşdığı mənzil də, Mənzil Məcəlləsinin 98-ci maddəsi və müvafiq Əsasnamənin tələbləri kobud şəkildə pozularaq, kirayə müqaviləsi bağlanmadan, əsassız olaraq məktublarla müvəqqəti istifadəyə verilmişdir. Məhkəmə onu da qeyd edir ki, Mənzil Məcəlləsinin 92-ci maddəsinə görə, xidməti yaşayış sahələri əmək münasibətləri ilə əlaqədar verilir. Cavabdeh1 hazırda Müdafiə Nazirliyi ilə heç bir əmək münasibəti qalmamışdır. Həmçinin, “Azərbaycan Respublikası Silahlı Qüvvələrində xüsusi təyinatlı yaşayış sahəsi ilə təmin olunma qaydaları haqqında” Əsasnamənin tələblərinə əsasən, Silahlı Qüvvələri ilə xidməti münasibəti olmayan şəxslərə Müdafiə Nazirliyinin mənzil fondu hesabına yaşayış sahəsinin verilməsi qadağandır. Qeyd olunanlar, cavabdehlərin yaşayış sahəsinə yerləşdirilməsinin qanuni əsasının olmadığını göstərir. Məhkəmə həmçinin onu da qeyd etməyi zəruri hesab edir ki, Fövqəladə Hallar Nazirliyi Tikintidə X3 Agentliyinin və “Azərinşaatlayihə” Dövlət Baş Layihə-Konstruktor və Texnoloji İnstitutunun xx.xx.2025-ci il tarixli rəyi ilə “Turan” hərbi yataqxana binasında insanların yaşaması üçün təhlükənin mövcud olduğu müəyyən edilmişdir. Bina texniki cəhətdən yolverilməz qiymətləndirilmiş və təhlükəsizliyin təmin olunması üçün bərpa və gücləndirmə işlərinin aparılması zəruridir. Bu təhlükə səbəbi ilə Cavabdeh1 “Turan” hərbi yataqxanasında yaşadığı 404 və 420 nömrəli otaqların təhvil verməsi barədə 1796 nömrəli, xx.xx.2025-ci il tarixli xəbərdarlıq məktubu ünvanlanmışdır. Mənzil Məcəlləsinin 102.2-102.2.4-cü maddələrində xidməti yaşayış sahəsindən digər yaşayış sahəsi verilmədən çıxarıla bilməyən şəxslərin kateqoriyaları sadalanır. Cavabdehin iddiaçı Müdafiə Nazirliyi ilə əmək münasibətləri kəsildiyindən və bu maddədə nəzərdə tutulan istisna hallara aid olmadığı üçün ona başqa yaşayış sahəsi verilmədən çıxarılması qanunla məhdudlaşdırılmır. Beləliklə, məhkəmə hesab edir ki, cavabdehlərin binada qalması həm binanın təhlükəli texniki vəziyyəti ilə bağlı vətəndaşın həyat və sağlamlığına təhlükə yaratdığı üçün və onların yaşayış sahəsinə kirayə müqaviləsi olmadan, məktub əsasında qanunsuz yerləşdirildiyi və hazırda Müdafiə Nazirliyi ilə heç bir əmək münasibəti qalmadığı üçün yolverilməzdir. Beləliklə, məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verərək, sadalanan qanunvericilik normalarını rəhbər tutaraq, işin faktiki hallarını nəzərə alaraq hesab edir ki, iddia təmin edilməli, cavabdehlər Cavabdeh1 və Cavabdeh2 Bakı şəhəri, Yasamal rayonu, Hüseyn Cavid prospekti, 182 ünvanında yerləşən Azərbaycan Respublikası Müdafiə Nazirliyinin mənzil fonduna daxil olan “Turan” Hərbi yataqxanasının 404 və 420 nömrəli otaqlarından (xidməti yaşayış sahəsindən) çıxarılmalıdırlar. Azərbaycan Respublikası Mülki Prosessual Məcəllənin 14.2-ci maddəsinə görə məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə görə isə hər bir tərəf öz tələblərinin və etirazlarının əsası kimi istinad etdiyi halları sübut etməlidir. Məhkəmə iş üzrə sübutlara Azərbaycan Respublikası Mülki Prosessual Məcəllənin 88-ci maddəsinin tələblərinə uyğun olaraq obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət vermiş, iddia ərizəsində qoyulmuş tələb üzrə nəticəyə gələrkən isə Mülki Prosessual Məcəllənin 217.4-cü maddəsində təsbit edilmiş bilavasitəlilik prinsipinə uyğun olaraq yalnız məhkəmə iclasında tədqiq olunmuş sübutlara əsaslanmışdır. Azərbaycan Respublikasının Mülki Prosessual Məcəllənin 119.1-ci maddəsinə əsasən məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. “Dövlət rüsumu haqqında” Azərbaycan Respublikasının Qanununun 9.1.14-cu maddəsinə əsasən məhkəmələrə verilən iddia ərizələri, digər ərizələr və ya şikayətlər üzrə büdcə təşkilatları, bələdiyyələr dövlət rüsumu ödəməkdən azad olunurlar. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 216-220, 227, 358, 360 və 362-ci maddələrini rəhbər tutaraq, məhkəmə QƏT ETDİ: İddia təmin edilsin. Cavabdehlər Cavabdeh1 və Cavabdeh2 Bakı şəhəri, Yasamal rayonu, Hüseyn Cavid prospekti, 182 ünvanında yerləşən Azərbaycan Respublikası Müdafiə Nazirliyinin mənzil fonduna daxil olan “Turan” Hərbi yataqxanasının 404 və 420 nömrəli otaqlarından (xidməti yaşayış sahəsindən) çıxarılsınlar. Qətnamədən, qətnamə işdə iştirak edən şəxslərə rəsmi qaydada verildiyi gündən bir ay müddətində “Elektron məhkəmə” informasiya sistemində yaradılan elektron kabinetdən Bakı şəhəri Yasamal Rayon Məhkəməsi vasitəsilə Bakı Apelyasiya Məhkəməsinin Mülki Kollegiyasına apelyasiya şikayəti verilə bilər. Sədrlik edən: Kərim Xudayev