Bakı Şəhəri Yasamal Rayon Məhkəməsi Qərardad — İş №e-2(004)-7098/2025

Azərbaycan Respublikası adından QƏRARDAD Bakı şəhəri İş № e-2(004)-7098/2025 11.12.2025 BAKI ŞƏHƏRİ YASAMAL RAYON MƏHKƏMƏSİ Mən, Bakı şəhəri Yasamal Rayon Məhkəməsinin hakimi Babazadə Gülnar Vidadi qızı, İddiaçı Cavabdeh ASC-yə qarşı “icra sənədinin icraasının dayandırılması” tələbinə dair iddia ərizəsini və ona əlavə edilmiş sənədləri nəzərdən keçirərək, MÜƏYYƏN ETDİM: İddiaçı Cavabdeh ASC-yə qarşı “icra sənədinin icraasının dayandırılması” tələbinə dair iddia ərizəsi ilə məhkəməyə müraciət edərək, 37236 manat məbləğində əsas kredit borcu, 7489 manat məbləğində faiz borcu, 1091 manat məbləğində dəbbə borcu, 30 manat məbləğində dövlət rüsumu və 30 manat digər xərclər tutularaq iddiaçı Cavabdeh ASC-nin xeyrinə ödənilməklə Bakı şəhəri, Sabunçu rayonu, Ramana qəsəbəsi yeni yaşayış massivi, ev 123 saylı fərdi yaşayış evinin geri qaytarılması, /2016 saylı, xx.xx.2016-cı il tarixli icra sənədinin icraatının dayandırılması barədə qətnamə qəbul edilməsini xahiş etmişdir. Azərbaycan Respublikasının MPM-nin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. İddia ərizəsini və ona əlavə olunmuş sənədləri nəzərdən keçirərək hesab edirəm ki, iddianın yolverilməzliyinə görə ərizəni qəbul etməkdən imtina edilməlidir. Azərbaycan Respublikasının MPM-nin 153.2.1-ci maddəsinə əsasən ərizəyə məhkəmə qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir. Həmin Məcəllənin 153.3-cü maddəsinə əsasən hakim ərizəni qəbul etməkdən imtina barədə əsaslandırılmış qərardad çıxarır. İşə məhkəmə qaydasında baxılmalı deyildirsə, iddiaçının hansı orqana müraciət etməli olmasını orada göstərir. İş materiallarından göründüyü kimi iddiaçı Bakı şəhəri Sabunçu Rayon Məhkəməsinin 2(008)-110/2016 saylı, xx.xx.2016-cı il tarixli icra sənədinin icraatının dayandırılmasını xahiş etməklə, iddia tələbinin əsasını, həmin icra sənədinin verilməsinə əsas olmuş məhkəmə qətnaməsinin və icra məmurunun hərəkətlərinin mübahisələndirməsi təşkil etmişdir. Məhkəmə hesab edir ki, iddiaçı hazırki tələblə bağlı iddia ərizəsi ilə iddia icraatı qaydasında Bakı şəhəri Yasamal Rayon Məhkəməsinə müraciət etməklə haqlı olmamışdır. Belə ki, iddiaçı icra məmurunun hərəkətlərini mübahisələndirdiyindən və iş hazırda icra mərhələsində olduğundan, məhkəmə nəzarəti qaydasında (məhkəmə qətnamələrinin (qərarlarının) icrası haqqında) icra məmurunun hərəkətlərindən şikayətlə 8 indeksi ilə müvafiq məhkəməyə müraciət etməli idi. Bundan başqa məhkəmə qeyd edir ki, eyni zamanda iddiaçı Bakı şəhəri Sabunçu Rayon Məhkəməsinin 2(008)-110/2016 saylı, xx.xx.2016-cı il tarixli qətnaməsindən narazı olduğu halda, həmin qətnamədən üzrlü səbəbdən müddət ötürüldüyü təqdirdə apellyasiya şikayəti vermək üçün müddətin bərpası barədə ərizə ilə birlikdə həmin qətnaməni qəbul etmiş müvafiq məhkəməyə apellyasiya şikayəti ilə müraciət etmək hüququnun olması izah olunur. Beləliklə, qeyd olunanlara əsasən məhkəmə hesab edir ki, iddia ərizəsinə Bakı şəhəri Yasamal Rayon Məhkəməsində iddia icraatı qaydasında baxılmalı olmadığından, iddianın yolverilməzliyinə görə iddia ərizəsini qəbul etməkdən imtina edilməli, iddia ərizəsi və ona əlavə edilmiş sənədlər geri qaytarılmalı, iddiaçıya Azərbaycan Respublikasının MPM-nin 153.5-ci maddəsinin tələbləri izah olunmalıdır. Məhkəmə həmçinin qeyd edir ki, iddiaçının işin baxılması üçün ödədiyi dövlət rüsumu özünə qaytarılmalıdır. Azərbaycan Respublikası Mülki-Prosessual Məcəlləsinin 114.1.2-ci maddəsinə əsasən bu Məcəllə ilə nəzərdə tutulmuş əsaslarla ərizəni baxılmaq üçün qəbul etməkdən imtina edilərsə, ödənilmiş dövlət rüsumu qaytarılır. Göstərilənlərə əsasən və Azərbaycan Respublikasının MPM-nin 153, 263-264, 268ci maddələrini rəhbər tutaraq, QƏRARA ALDİM: İddiaçı Cavabdeh ASC-yə qarşı fərdi yaşayış evinin geri qaytarılması və icra sənədinin icraatına xitam verilməsi tələbinə dair iddia ərizəsinin iddianın yolverilməzliyinə görə qəbul edilməsindən imtina edilsin. İddiaçıya izah olunsun ki, ərizəni qəbul etməkdən imtina edilməsi iddiaçıya həmin cavabdehə qarşı, həmin predmet barəsində və həmin əsaslarla yenidən iddia qaldırmağa mane olur. xx.xx.2025-ci il tarixli (Qəbz nömrəsi: **********) qəbzi üzrə dövlət rüsumu kimi ödənilmiş 100 (yüz) manat məbləğində pul Bakı şəhəri üzrə Baş Maliyyə İdarəsi tərəfindən İddiaçı qaytarılsın. Qərardaddan qərardadın rəsmi qaydada verildiyi gündən 10 (on) gün müddətində (“Elektron məhkəmə” informasiya sistemində yaradılan elektron kabinet vasitəsilə) Bakı şəhəri Yasamal Rayon Məhkəməsinə şikayət verilə bilər. Sərdlik edən: Gülnar Babazadə