Bakı Şəhəri Nizami Rayon Məhkəməsi Qətnamə — İş №e-2(007)-2917/2023

Azərbaycan Respublikası adından QƏTNAMƏ Bakı şəhəri İş № e-2(007)-2917/2023 20.10.2023 BAKI ŞƏHƏRİ NİZAMİ RAYON MƏHKƏMƏSİ Mən, Bakı şəhəri Nizami Rayon Məhkəməsinin hakimi Əhmədov Rauf Tağı oğlu, İddiaçı "xxxx" MMC-nin Cavabdeh qarşı “borc” tələbinə dair kiçik iddiası üzrə mülki işə sadələşdirilmiş icraat qaydasında baxaraq, MÜƏYYƏN ETDİM: İddiaçı- "xxxx" MMC. Cavabdeh- Cavabdeh. Tərəflər arasında bağlanmış müqavilə- 13 dekabr 2017-ci il tarixli müqavilə. Müqavilənin predmeti- alqı-satqı və kommunal xidmət haqqının ödənilməsi. Tələb olunan məbləğ: 2176 manat xidmət haqqı, 41.76 manat dövlət rüsumu, 0.40 manat bank xidmət haqqı və 1.80 manat məhkəmə məsrəfi (bildirişlərin göndərilməsi ilə bağlı). Sübutlar: Alqı-satqı və kommunal xidmət haqqının ödənilməsi, maliyyə arayışı, dövlət rüsumunun ödənilməsi barədə qəbz, qaimə, pretenziya qaydasına əməl olunmasına dəlalət edən bildiriş. Tətbiq olunmalı maddi və prosessual hüquq normaları. Azərbaycan Respublikası Mülki Məcəlləsinin 567-ci, 600.1-ci, 601.1-ci və 443.1-ci, 449.1-ci, 462.1-ci, 465.2-ci maddələri; Azərbaycan Respublikası Mənzil Məcəlləsinin 135.2.3 və 136.2-ci maddələri. Qeyd edilənlərlə müəyyən olundu ki, "xxxx" MMC ilə satıcı X1 və alıcı olaraq Cavabdeh arasında bağlanan 13 dekabr 2017-ci il tarixli müqavilənin 3.5-ci bəndinə əsasən Bakı şəhəri, Nizami rayonu, Ə.Hacıyev küçəsi, 40A, bina 1, 26 nömrəli mənzilə dair kommunal, istismar və xidməti xərclərin vaxtlı-vaxtında ödənilməsini cavabdeh üzərinə götürmüş, lakin, müqavilə üzrə ödənişləri həyata keçirməmişdir. Göründüyü kimi, Cavabdeh alqı-satqı və kommunal xidmət haqqının ödənilməsi müqaviləsi üzrə götürdüyü öhdəlikləri vaxtında icra etməmiş, iddiaçıya olan borcunu müqavilə ilə nəzərdə tutulan vaxtda və qaydada ödəməmişdir. Məhkəmə qeyd olunan maddi hüquq normalarının tələblərinə və işin faktiki hallarına əsasən hesab edir ki, məhkəmədə müəyyən olunmuş faktiki hallar tərəflər arasındakı hüquqi münasibətlərə uyğun gəldiyindən, cavabdeh onun risk dairəsinə daxil olan öhdəliklərin icra edilmədiyi bütün hallar üçün məsuliyyət daşıdığından, yaranmış borc məbləğini və digər xərcləri ödəməlidir. Beləliklə, təqdim edilən sənədlərin iş üzrə yekun qərarın çıxarılması üçün kifayət etdiyi, iş üzrə əlavə araşdırmanın, o cümlədən tərəfləri çağıraraq izahatların alınması, yaxud şahidlərdən ifadələrin və ya ekspertlərdən rəyin alınması zərurətinin olmadığı qənaətinə gələrək, hesab edirəm ki, kiçik iddia təmin edilərək yaranmış borc məbləği cavabdehdən iddiaçının xeyrinə tutulmalıdır. Şərh olunanlara əsaslanaraq və Azərbaycan Respublikası MPM-nin 284-5, 284-6, 216-220-ci maddələrini rəhbər tutaraq, QƏT ETDİM: İddia tələbi təmin edilsin. Cavabdeh 13 dekabr 2017-ci il tarixli müqavilə üzrə 2176 manat xidmət haqqı, 41.76 manat dövlət rüsumu, 0.40 manat bank xidmət haqqı və 1.80 manat məhkəmə məsrəfi "xxxx" MMC-nin xeyrinə tutulsun. Qətnamədən rəsmi qaydada verildiyi gündən 1 (bir) ay müddətində Bakı şəhəri Nizami Rayon Məhkəməsi vasitəsi ilə Bakı Apellyasiya Məhkəməsinə apellyasiya şikayəti verilə bilər. Qətnamədən şikayət verilmədikdə, qəbul edildiyi gündən 1 (bir) ay keçdikdən sonra qanuni qüvvəyə minir. Hakim: Rauf Əhmədov