Bakı Şəhəri Xətai Rayon Məhkəməsi Qərardad — İş №e-2(011)-4470/2025

Azərbaycan Respublikası adından QƏRARDAD Bakı şəhəri İş № e-2(011)-4470/2025 06.05.2025 BAKI ŞƏHƏRİ XƏTAİ RAYON MƏHKƏMƏSİ Mən, Bakı şəhəri Xətai Rayon Məhkəməsinin hakimi Abbasova X1, İddiaçı Cavabdeh MMC-yə qarşı “müqavilənin ləğvi, qeyri-yaşayış sahəsinin təhvil verilməsi və icarə haqqının ödənilməsi” tələbinə dair iddia ərizəsinə baxaraq, M Ü Ə Y Y Ə N E T D İ M: İddiaçı Cavabdeh MMC-yə qarşı “müqavilənin ləğvi, qeyri-yaşayış sahəsinin təhvil verilməsi və icarə haqqının ödənilməsi” tələbinə dair iddia ərizə ilə məhkəməyə müraciət edərək, onunla Cavabdeh MMC (əvvəlki adı "xxxx" Məhdud Məsuliyyətli Cəmiyyəti) arasındakı 30 avqust 2024-cü il tarixində O-177 saylı icarə müqaviləsinin ləğv edilməsi, iddiaçının mülkiyyətindəki Bakı şəhəri, Xətai rayonu, 8 Noyabr prospekti 15, “Azure” Biznes Mərkəzinin 11-ci mərtəbəsində yerləşən, ümumi sahəsi 85.2 kv/m olan 67 saylı qeyri-yaşayış sahəsinin Cavabdeh MMC-nin (əvvəlki adı "xxxx" Məhdud Məsuliyyətli Cəmiyyəti) “hesabına boşaldılaraq təhvil alındığı vəziyyətə uyğun (təbii köhnəlmə nəzərə alınmaqla) iddiaçıya təhvil verilməsi, müqavilə üzrə ödənilməmiş 10400,00 manat icarə haqqı borcunun, həmçinin 01 may 2025-ci il tarixindən etibarən icarə sahəsinin iddiaçıya təhvil verilənədək hər ay üçün 1300 manat icarə haqqının və ödənilmiş 221,20 manat dövlət rüsumunun Cavabdeh MMC-dən (əvvəlki adı "xxxx" Məhdud Məsuliyyətli Cəmiyyətindən) tutulub İddiaçı ödənilməsi barədə qətnamə qəbul edilməsini məhkəmədən xahiş etmişdir. İddiaçı iddia ərizəsini və ona əlavə edilmiş sənədləri nəzərdən keçirərək hesab edirəm ki, iddia ərizəsi ona əlavə edilmiş sənədlərlə birlikdə iddiaçıya geri qaytarılmalıdır. Belə ki, Azərbaycan Respublikası Mülki Prosessual Məcəlləsinin 151.1-ci maddəsinə əsasən ərizə bu Məcəllənin tələblərinə riayət edilməklə verildikdə onun məhkəmə icraatı mümkündür. İş materiallarında olan “Elektron məhkəmə” informasiya sistemindən olan çıxarışdan görünür ki, İddiaçı fərdi sahibkarlıqla məşğul olan şəxsdir, (VÖEN: **********) fəaliyyət istiqaməti ticarət mərkəzinin icarəyə verilməsi üzrə fəaliyyətdən ibarətdir. İddia ərizəsinin məzmunundan və iş materiallarında olan İddiaçı (icarəyə verən) ilə "xxxx" Məhdud Məsuliyyətli Cəmiyyəti (icarəçi) arasında bağlanmış 30 avqust 2024-cü il tarixli, O-177 nömrəli qeyri-yaşayış sahəsinin icarəyə verilməsi haqqında müqavilənin surətindən görünür ki, icarəyə verən Bakı şəhəri, Nobel prospekti, 15 ünvanında yerləşən Biznes Mərkəzinin 11-ci mərtəbəsində, ümumi sahəsi 85,2 m2 olan 67 saylı qeyri-yaşayış sahəsini icarəçiyə 12 ay müddətinə, aylıq icarə haqqı 1300 manat olmaqla icarəçinin müvəqqəti istifadəsinə vermişdir. Azərbaycan Respublikası MPM-nin məhkəmə aidiyyətini müəyyən edən norması olaraq 26-ci maddəsi təsbit edir ki, sahibkarlıq fəaliyyətinin həyata keçirilməsi ilə əlaqədar olan mübahisələrə (kommersiya mübahisələrinə) dair işlərə mülki məhkəmə icraatı qaydasında kommersiya məhkəmələri baxır. Həmin Məcəllənin 26.2-ci maddəsinə əsasən Kommersiya məhkəmələri bu Məcəllənin 40-5-ci fəslində nəzərdə tutulmuş işlərə, habelə sahibkarlıq fəaliyyəti ilə əlaqədar olduqda bu Məcəllənin 35-ci və 40-2-ci fəsillərində nəzərdə tutulmuş işlərə və qanunla onların səlahiyyətlərinə aid edilən digər işlərə də baxırlar. Hesab edirəm ki, ərizədə irəli sürülən tələblə bağlı qanunvericilik başqa halı nəzərdə tutmadığı üçün mübahisə sahibkarlıq fəaliyyətinin həyata keçirilməsi ilə əlaqədar olduğundan, hazırki ərizə Bakı Kommersiya Məhkəməsinə verilməli olduğu halda iddiaçı tərəfindən məhkəməyə ərizə verilərkən prosessual qanunvericiliyin məhkəmə aidiyyəti ilə bağlı imperativ tələbinə əməl edilməmişdir. Azərbaycan Respublikası MPM-nin 152.1.3-cü maddəsinə əsasən əgər iş ərazi və ya məhkəmə aidiyyəti üzrə həmin məhkəmədə baxılmalı deyildirsə hakim iddia ərizəsini və ona əlavə edilmiş sənədləri geri qaytarır. Həmin Məcəllənin 114.1.3-cü maddəsinə əsasən bu Məcəllə ilə nəzərdə tutulmuş əsaslarla ərizə geri qaytarılarsa ödənilmiş dövlət rüsumu qaytarılır. Hesab edirəm ki, iddia ərizəsi geri qaytarıldığından 142211 təsnifat kodlu dövlət büdcəsinə Bakı şəhəri Xətai Rayon Məhkəməsinin hesabına 01 may 2025-ci il tarixdə ödənilmiş **********29 qəbz nömrəli 121,20 manat dövlət rüsumu geri qaytarılmalıdır. Yuxarıdakılara əsasən və Azərbaycan Respublikası Mülki Prosessual Məcəlləsinin 149,153, 263, 264, 267 və 268-ci maddələrini rəhbər tutaraq, Qərara aldım: İddiaçı Cavabdeh MMC-yə qarşı “müqavilənin ləğvi, qeyri-yaşayış sahəsinin təhvil verilməsi və icarə haqqının ödənilməsi” tələbinə dair iddia ərizəsi və ona əlavə olunmuş sənədlər geri qaytarılsın. İddiaçı tərəfindən Elektron hökümət ödəniş portalı vasitəsilə 142211 təsnifat kodlu dövlət büdcəsinə Bakı şəhəri Xətai Rayon Məhkəməsinin hesabına 01 may 2025-ci il tarixdə ödənilmiş **********29 qəbz nömrəli 121,20 manat dövlət rüsumu iddiaçıya geri qaytarılsın. İddiaçıya iddia ərizəsini Bakı Kommersiya Məhkəməsinə vermək hüququ izah olunsun. Qərardad tərəflərə rəsmi qaydada verildikdən sonra 10 gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən: İlahə Abbasova