Göyçay Rayon Məhkəməsi Qətnamə — İş №e-2(046)-1315/2025

Azərbaycan Respublikası adından QƏTNAMƏ Göyçay rayonu İş № e-2(046)-1315/2025 03.06.2025 GÖYÇAY RAYON MƏHKƏMƏSİ Hakim Qurbanova Gülnaz İntiqam qızı, İddiaçı İB-nin Cavabdeh qarşı “borc” tələbinə dair mülki işə kiçik iddia üzrə (sadələşdirilmiş icraat üzrə) icraat qaydasında baxaraq, MÜƏYYƏN ETDİ: İddiaçı İB Cavabdeh qarşı “borc” tələbinə dair sadələşdirilmiş icraat üzrə iddia ərizəsi ilə xx.xx.2025-ci il tarixdə məhkəməyə müraciət edərək, cavabdehdən təbii qazdan istifadəyə görə yaranmış 1474 manat 64 qəpik məbləğində debitor borcun və 34 manat 75 qəpik dövlət rüsumunun tutularaq İddiaçı İB-nin hesabına ödənilməsi barədə qətnamə çıxarılmasını xahiş etmişdir. Məhkəmə Azərbaycan Respublikası Mülki Prosessual Məcəlləsinin 23-1-ci fəslində təsbit edilmiş müddəaları rəhbər tutaraq, iddianın qiymətini nəzərə alıb, ərizəyə kiçik iddialara dair işlər üzrə sadələşdirilmiş icraat qaydasında tərəflərin təqdim etdiyi sənədlər əsasında, məhkəmə baxışı keçirilmədən və tərəflər izahatları dinlənilmək üçün çağırılmadan baxmışdır. Məhkəmə iddia ərizəsini iş materialları ilə birlikdə araşdıraraq, işdə olan sənədləri tədqiq edərək və sübutları qiymətləndirərək qeyd edir ki, işdə olan sənədlər iş üzrə yekun qərarın çıxarılması üçün kifayət edir və iş üzrə əlavə araşdırmanın, o cümlədən tərəfləri çağıraraq izahatlarının alınması, yaxud şahidlərdən ifadələrin və ya ekspertlərdən rəyin alınması zərurəti yoxdur. İş materiallarına əlavə edilmiş: Cavabdeh ilə İddiaçı İB arasında bağlanmış xx.xx.2024-cü il tarixli, XS-23-02245/24 nömrəli “Qaz paylayıcısı ilə məişət qaz qurğusu istifadəçisi arasında qazın alqı-satqısı” müqaviləsindən görünür ki, Cavabdeh faktiki yaşadığı Göyçay rayonu, 2-ci Ərəbcəbirli kəndində təbii qazdan istifadə xidmətləri ilə təmin edilmişdir. İddiaçı Göyçay Xidmət Sahəsi tərəfindən Cavabdeh ünvanlanmış məktubdan görünür ki, yaranmış borcun 5 gün ərzində ödənilməsi tələb edilmişdir. Abonent saldosundan görünür ki, **********00000 saylı abonent koduna 2025-ci ilin mart ayına hesablanmış təbii qazdan istifadəyə görə borc 1474 manat 64 qəpik təşkil etmişdir. ********** saylı mədaxil qəbzinə əsasən iddia ərizəsinin verilməsi üçün 34 manat 75 qəpik məbləğində dövlət rüsumu odənilmişdir. Cavabdeh X1 xx.xx.2025-ci il tarixdə məhkəməyə müraciət edərək İddiaçı İB istifadə etdiyi yanacağın pulunun ödənilməsi barədə qaldırdığı iddia tələbi ilə əlaqədar bildirir ki, həqiqətən istifadə etdiyi qaz yanacağının pulunu vaxtı vaxtında ödəyə bilməmiş, onun cavabdehə 1474 manat borcu vardır. Borcunun ödənilməməsinin səbəbi özünün uzun müddət xəstə olmağı, oğlunun 1-ci dərəcəli dializ xəstəsi olmağı olmuşdur. Aldıqları pensiya onların müalicə xərclərini qarşılamır. Maddi vəziyyətləri çox ağırdır. İstifadə etdikləri qaz məsrəflərindən yayınmaq deyil. O, cavabdehə olan borcundan az miqdarda hər ay ödəməklə aylıq ödənişi öhdəsinə götürmüşdür. xx.xx.2025-ci il tarixdə 1474 manat məbləğdən cavabdehə 800 manat ödəmişdir. Qalan məbləğin aylıq ödənəşlə az-az ödəmək məqsədilə məhkəməyə müraciət etmişdir. Odur ki, bununla əlaqədar icraatınızda olan mülki işə baxarkən onun vəziyyətini nəzərə alaraq hər ay aylıq istifadə etdiyi qaz pulundan əlavə 40 manat ödəmək imkanının olduğunu nəzərə almağı və humanist qərar çıxarılmasını xahiş etmişdir. Azərbaycan Respublikası Mülki Məcəlləsi 21.1 Zərərin əvəzinin ödənilməsini tələb etmək hüququna malik olan şəxs ona vurulmuş zərərin əvəzinin tam ödənilməsini tələb edə bilər, bu şərtlə ki, qanunda və ya müqavilədə zərərin əvəzinin daha az miqdarda ödənilməsi nəzərdə tutulmasın. Azərbaycan Respublikasının Mülki Prosessual Məcəlləsinin: 231-ci maddəsinə əsasən işə baxmış hakim, işdə iştirak edən şəxslərin ərizəsi üzrə tərəflərin əmlak vəziyyətinə və digər hallara əsasən qətnamənin icrasına möhlət verməyə və ya qətnaməni hissə-hissə icra etdirməyə, habelə onun icra üsulunu və qaydasını dəyişdirməyə haqlıdır. Cavabdeh hissə-hissə borcun ödənilməsi ilə bağlı vəsatətinə münasibətdə məhkəmə qeyd edir ki, İddiaçı İB-nə qarşı olan debitor borcun hissə-hissə ödənilməsi ilə bağlı qanuni qüvvəsin almış yekun məhkəmə aktı mövcüd olmadığından, cavabdeh İddiaçı İB isə debitor borcunu hissə-hissə deyil, tam şəkildə tələb etməsi vəsatətin təmin edilməsini mümkünsüz edir. Məhkəmə iş materiallarında olan sənədləri nəzərdən keçirib, sübutlara obyektiv, qərəzsiz, hərtərəfli və tam baxdıqdan sonra hesab edir ki, iddia əsaslı olduğundan qismən təmin edilməlidir. Azərbaycan Respublikası Nazirlər Kabinetinin 12 may 2011-ci il tarixli 80 saylı qərarı ilə təsdiq edilmiş “Qazdan istifadə qaydaları”nın 3.2.1 -ci bəndinə əsasən Qazdan istifadə edən istehlakçılar qazdan istifadə və texniki təhlükəsizlik üzrə qanunvericiliyin tələblərinə əməl etməlidir. Həmin qaydaların 5.5-ci bəndinə əsasən qaz paylayıcısının istehlakçıya verdiyi qazın sayğacla müəyyənləşdirilən hesabı istehlakçıya paylayıcı tərəfindən təqdim edildikdən (göndərildikdən) sonra bir ay müddətində tam ödənilməlidir. “Qaz təchizatı haqqında” Azərbaycan Respublikası Qanununun 13.6-cı maddəsinə əsasən paylayıcının istehlakçıya verdiyi qazın sayğacla müəyyənləşdirilən hesabı istehlakçıya paylayıcı tərəfindən təqdim edildikdən sonra 1 ay müddətində tam həcmdə ödəniməzsə, məhkəmə qərarı ilə dayandırıla bilər. Həmin qanunun 13.10-cu bəndinə əsasən qaz paylayıcısının səlahiyyətli şəxsinin bu qanunun tələblərinin pozulmasının qarşısını almağa istehlakçı tərəfindən mane olma qanunla müəyyən edilmiş məsuliyyətə səbəb olur. Azərbaycan Respublikası Mənzil Məcəlləsinin 135.1-ci maddəsinə əsasən fiziki və hüquqi şəxslər, həmçinin belə xidmətlərdən istifadə edən dövlət orqanları, bələdiyyələr və digər təşkilatlar yaşayış sahəsinə və kommunal xidmətlərə görə haqqı vaxtında və tam məbləğdə ödəməyə borcludurlar. Həmin Məcəllənin 136.4-cü maddəsinə əsasən kommunal xidmətlərə görə haqqa soyuq və isti su təminatı, kanalizasiya, elektrik təminatı, qaz təminatı və istilik təchizatına görə ödənilən haqlar daxildir. Həmin Məcəllənin 139.1-ci maddəsinə əsasən kommunal xidmətlərə görə haqqın miqdarı qanunvericiliyə əsasən müəyyənləşdirilmiş taariflər əsasında müvafiq fəaliyyət növünü həyata keçirən şəxslərlə bağlanan müqavilələrədə müəyyən edilir. Azərbaycan Respublikası Mülki Məcəlləsinin 427.3-cü maddəsinə əsasən əgər öhdəlik onun icrası gününü və ya icra edilməli olduğu vaxt dövrünü nəzərdə tutursa və ya müəyyənləşdirməyə imkan verirsə, öhdəlik həmin gün və ya bu cür dövr ərzində istənilən an icra edilməlidir. Həmin Məcəllənin 448.1-ci maddəsinə əsasən əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir. Həmin Məcəllənin 385.1-ci maddəsinə əsasən öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn pul ödəməli, əmlak verməli, iş görməli, xidmətlər göstərməli və i.a və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Azərbaycan Respublikasının MPM-in 119.1-ci maddəsinə əsasən, məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. Məhkəməyə təqdim edilmiş xx.xx.2025-ci il tarixli ödəniş qəbzindən göründüyü kimi Cavabdeh təbii qazdan istifadəsi nəticəsində yaranmış 1474 manat 64 qəpik borcundan 800 manat ödəniş etmişdir. Məhkəmə hesab edir ki, Cavabdeh 800 manat ödəniş etdiyindən, həmin məbləğ 1474 manat 64 qəpik debitor borcdan çıxılmaqla (1474.64-800=674.64), Cavabdeh debitor borcu 674 manat 64 qəpik müəyyən olunmalıdır. Məhkəmə qeyd olunanları nəzərə alıb, hesab edir ki, ödənilmiş dövlət rüsumunun əvəzi olan 34.75 (otuz dörd manat yetmiş beş qəpik) dövlət rüsumu cavabdehdən tutularaq İddiaçı İBnin xeyrinə ödənilməlidir. Yuxarıda şərh olunanlara əsasən və Azərbaycan Respublikası MPM-in 119, 284-5, 284-6, 357, 358, 360, 362-ci maddələrini rəhbər tutaraq, QƏT ETDİ: İddia tələbi qismən təmin edilsin. Cavabdeh 674.64 (altı yüz yetmiş dörd manat, altmış dörd qəpik) borc və 34.75 (otuz dörd manat, yetmiş beş qəpik) dövlət rüsumu İddiaçı İB-nin xeyrinə tutulsun. İddia tələbi qalan hissədə təmin edilməsin. Qətnamədən, məhkəmə qətnaməsi işdə iştirak edən şəxslərə rəsmi qaydada verildiyi gündən 1 (bir) ay müddətində “Elektron məhkəmə” informasiya sistemində yaradılan elektron kabinetlə Göyçay rayon Məhkəməsi vasitəsilə Şəki Apellyasiya Məhkəməsinə apellyasiya şikayəti verilə bilər. Qətnamədən şikayət verilməmişdirsə, işdə iştirak edən şəxslərə rəsmi qaydada verildiyi gündən 1 (bir) ay keçdikdən sonra qanuni qüvvəyə minir. Hakim: Gülnaz Qurbanova