Bakı Kommersiya Məhkəməsi Qərardad — İş №e-2-2(113)-3133/2022

Azərbaycan Respublikası adından QƏRARDAD Bakı şəhəri İş № e-2-2(113)-3133/2022 01.06.2022 BAKİ KOMMERSİYA MƏHKƏMƏSİ Bakı Kommersiya Məhkəməsinin hakimi Əliyev Emin Zöhrab oğlunun sədrliyi və X2 qızının katibliyi ilə, İddiaçı "xxxx" Məhdud Məsuliyyətli Cəmiyyətinin cavabdeh X1” MMC-yə qarşı müflis elan edilmə və əmlak inzibatçısının təyin edilməsi tələbinə dair iddia ərizəsinə baxaraq, məhkəmə MÜƏYYƏN ETDİ: İddiaçı "xxxx" Məhdud Məsuliyyətli Cəmiyyəti iddia ərizəsi ilə məhkəməyə müraciət edərək, borclu Cavabdeh Məhdud Məsuliyyət Cəmiyyətinin müflis elan edilməsi və borclarının ödənilməsi məqsədilə aktivlərinin müəyyən edilməsi üçün əmlak inzibatçısının təyin edilməsi barədə qətnamə qəbul edilməsini xahiş etmişdir. Müflisləşmə və iflas haqqında Azərbaycan Respublikası Qanunun: 2-ci maddəsinin 1-ci bəndinə əsasən iflas haqqında işlərə başlanması və həmin işlərə baxılması qaydası bu Qanunun spesifik tələbləri nəzərə alınmaqla, qüvvədə olan prosessual qanunvericiliklə tənzimlənir. Azərbaycan Respublikası MPM-nin: 150.1. İddia ərizəsinə aşağıdakı sənədlər əlavə edilir: 150.1.4-cü maddəsinə əsasən bu Məcəllənin 150.2-ci maddəsinə uyğun olaraq kommersiya mübahisələri üzrə işdə iştirak edən digər şəxslər tərəfindən iddia ərizəsinin surətinin və ona əlavə edilmiş sənədlərin alınması haqqında sənəd əlavə olunmalıdır. 150.2-ci maddəsinə əsasən kommersiya mübahisələri üzrə elektron qaydada verilən iddia ərizəsi və ona əlavə edilmiş sənədlər işdə iştirak edən digər şəxslərin “Elektron məhkəmə” informasiya sistemində yaradılmış elektron kabinetinə göndərilir və bu barədə məlumat elektron qaydada (elektron poçt və SMS vasitəsilə) onlara çatdırılır. Əgər sahibkar olan cavabdeh “Elektron məhkəmə” informasiya sistemində qeydiyyatdan keçməmişsə, bu halda kommersiya mübahisələri üzrə elektron qaydada verilən iddia ərizəsi barədə bildiriş və “Elektron məhkəmə” informasiya sistemində qeydiyyatdan keçmə qaydasına dair məlumat həmin şəxsin müvafiq icra hakimiyyəti orqanının müəyyən etdiyi orqanın (qurumun) informasiya sistemində yaradılmış elektron kabinetinə göndərilir və bu barədə məlumat elektron qaydada (elektron poçt və SMS vasitəsilə) ona çatdırılır. Cavabdeh qeyri-rezident olduğu halda iddia ərizəsi və ona əlavə edilmiş sənədlər onun nümayəndəsinin “Elektron məhkəmə” informasiya sistemində yaradılmış elektron kabinetinə göndərilir. 152.1.4-ci maddəsinə əsasən kommersiya mübahisələri üzrə işdə iştirak edən digər şəxslər tərəfindən iddia ərizəsinin alınmasına dair sübut təqdim edilmədikdə hakim iddia ərizəsini və ona əlavə edilmiş sənədləri geri qaytarır. 57.1-ci maddəsinə əsasən mübahisə predmeti barəsində müstəqil tələblər irəli sürməyən üçüncü şəxslər qətnamə çıxarılana qədər, bu qətnamə tərəflərdən birinə münasibətdə onların hüquq və vəzifələrinə təsir edə biləcəyi təqdirdə, prosesdə iddiaçının və ya cavabdehin tərəfində iştirak edə bilərlər. Onlar işdə iştirak edən şəxslərin vəsatəti üzrə və ya məhkəmənin təşəbbüsü ilə işdə iştirak etməyə cəlb oluna bilərlər. 306.2-ci maddəsinə əsasən xüsusi icraat işləri ərizəçilər tərəfindən qaldırılır, ərizəçinin və maraqlı şəxsin iştirakı ilə məhkəmədə baxılır. Məhkəmə iddiaçının diqqətinə çatdırır ki, cəmiyyətin müflis elan edilməsi barədə işlərə iddia icraatında baxılmaqla “Müflisləşmə və iflas haqqında” qanunda tərəflərin adları kreditor və borclu kimi göstərilsə də, MPM-nin tələblərinə görə tərəflərin prosessual adları iddiaçı və cavabdeh kimi qeyd edilməlidir. Bununla yanaşı məhkəmə bildirir ki, hazırki tələb üzrə çıxarılacaq qətnamə üçüncü şəxslərə münasibətdə onların hüquq və vəzifələrinə təsir edəcəyi təqdirdə həmin şəxslər “AZEMİS” məhkəmə elektron sistemində maraqlı şəxs kimi deyil (maraqlı şəxslər xüsusi icraat qaydasında baxılan işlər üzrə tərəf kimi çıxış edirlər), mübahisə predmeti barədə müstəqil tələblər irəli sürməyən üçüncü şəxslər kimi qeydə alınmalıdırlar. Odur ki, qeyd olunanları nəzərə alaraq iddiaçı tərəfindən məhkəmə elektron sistemində qeyd olunan kreditorlar məhkəmə elektron sistemində mübahisə predmeti barədə müstəqil tələb irəli sürməyən üçünçü şəxs kimi işə əlavə edilməli və onlara da iddia ərizəsi, həmçinin ona əlavə edilmiş sənədlər MPM-in 150.2-ci maddəsində nəzərdə tutulmuş qaydada çatdırılmalıdır. Məhkəmə qeyd olunanları nəzərə alaraq hesab edir ki, iddia ərizəsi və ona əlavə olunmuş sənədlər, həmçinin 50 manat məbləğində dövlət rüsumunun ödənilməsini təsdiq edən ********* nömrəli, 19.05.2022-ci il tarixli qəbz iddiaçıya geri qaytarılmalıdır. Azərbaycan Respublikası MPM-nin 263 və 264-cü maddələrinə əsasən, məhkəmə QƏRARA ALDİ: İddiaçı "xxxx" Məhdud Məsuliyyətli Cəmiyyətinin cavabdeh X1” MMC-yə qarşı müflis elan edilmə və əmlak inzibatçısının təyin edilməsi tələbinə dair iddia ərizəsi və ona əlavə olunmuş sənədlər, həmçinin 50 manat məbləğində dövlət rüsumunun ödənilməsini təsdiq edən ********* nömrəli, 19.05.2022-ci il tarixli qəbz geri qaytarılsın. İddiaçı "xxxx" Məhdud Məsuliyyətli Cəmiyyətinə izah edilsin ki, kreditorlar mübahisə predmeti barədə müstəqil tələb irəli sürməyən üçüncü şəxslər adı altında işə əlavə edilməklə, onlara iddia ərizəsi ona əlavə edilmiş sənədlər MPM-in 150.2-ci maddəsində nəzərdə tutulmuş qaydada çatdırılmaqla yenidən məhkəməyə müraciət edə bilər. Qərardad tərəfə rəsmi qaydada verildikdən sonra 10 gün müddətində ondan Bakı Kommersiya Məhkəməsinə şikayət verilə bilər. Hakim:Emin Əliyev