Bakı Şəhəri Binəqədi Rayon Məhkəməsi Qərardad — İş №2(001)-7079/2023

Azərbaycan Respublikası adından QƏRARDAD Bakı şəhəri İş № 2(001)-7079/2023 15.11.2023 BAKI ŞƏHƏRİ BİNƏQƏDİ RAYON MƏHKƏMƏSİ Mən, Bakı şəhəri Binəqədi Rayon Məhkəməsinin hakimi Mustafayev Etibar Mustafa oğlu Ərizəçi Maraqlı şəxs qismində cəlb etdiyi “barışıq sazişinin təsdiq edilməsi” barədə ərizəsini və ona əlavə edilmiş sənədləri 15 noyabr 2023-cü il tarixdə nəzərdən keçirərək, MÜƏYYƏN ETDİM: Ərizəçi ərizə ilə məhkəməyə müraciət edərək, Maraqlı şəxs ilə aralarında bağlanmış Bakı şəhəri 16 saylı Müdiasiya təşkilatı tərəfindən təsdiq edilmiş MŞB/16/- 001131 nömrəli, 23 iyun 2023-cü il tarixli barışıq sazişinin təsdiq edilməsi barədə qətnamə çıxarılmasını xahiş etmişdir. Ərizəni və ona əlavə edilmiş sənədləri nəzərdən keçirərək hesab edirəm ki, ərizə geri qaytarılmalıdır. Belə ki, ərizənin məzmunundan və olan əlavə edilmiş sənədlərdən müəyyən edilir ki, ərizəçi Bakı şəhəri 16 saylı Müdiasiya təşkilatı tərəfindən təsdiq edilmiş MŞB/16/- 001131 nömrəli, 23 iyun 2023-cü il tarixli barışıq sazişinin təsdiq edilməsini xahiş edir. Həmin saziş üzrə tərəflərin birgə nikahdan olan övladları xx.xx.2015-ci il təvəllüdül X1 18 yaşına çatana qədər anası Ərizəçi ilə birlikdə Azərbaycan Respublikasından kənara çıxmasına və ümumvətəndaş pasportunun alınmasına Maraqlı şəxs razılıq verməsi, habelə birgə nikahdan olan övladları xx.xx.2015-ci il təvəllüdül X1 Azərbaycan Respublikasından kənara aparılarkən, hansı ölkəyə gedəcəkləri və hansı tarixdə geri qayıdacaqları barədə atası Maraqlı şəxs məlumat verməsi barədə razılıq əldə olunmuşdur. Qeyd olunmalıdır ki, “Mediasiya haqqında” Azərbaycan Respublikasının Qanununun 9.3.1-ci maddəsində barışıq sazişinin icrasını təmin etmək mediasiyada iştirak edən tərəflərin vəzifələrindən biri kimi müəyyən edilmişdir. Həmin Qanununun: - 34.1-ci maddəsinə əsasən, barışıq sazişi, əgər sazişdə ayrı şərt nəzərdə tutulmayıbsa, imzalandığı gündən tərəflər üçün məcburi xarakter daşıyır. Barışıq sazişində tərəflər arasında ayrı müddət müəyyən edilməyibsə barışıq sazişi imzalandığı gündən 10 gün müddətində könüllü şəkildə icra olunmalıdır. - 34.3-ci maddəsinə əsasən, əgər barışıq sazişinin könüllü icrasından imtina olunsa, tərəf (o cümlədən məhkəmə baxışında olan işlər üzrə tərəf) barışıq sazişinin məcburi icrası üçün məhkəməyə müraciət edə bilər. - 34.4-cü maddəsinə əsasən, barışıq sazişi məcburi icra edilməsi üçün məhkəmə tərəfindən müvafiq qaydada təsdiq olunur. Göründüyü kimi, qanunvericiliyin tələblərinə əsasən, mediasiya sessiyası zamanı əldə edilmiş barışıq sazişi yalnız könüllü icra edilmədikdə məhkəmə tərəfindən təsdiq edilir. Hazırki iddia ərizəsinin məzmunundan sazişin könüllü icrasından imtina edilməsi müəyyən edilmir. Azərbaycan Respublikası Mülki Prosessual Məcəlləsinin 191.2-1-ci maddəsinə əsasən tərəflər arasında mübahisə mediasiya vasitəsilə həll edildikdə, barışıq sazişi, həll edilmədikdə isə mediasiya prosesinin nəticələri barədə protokol məhkəməyə təqdim olunur. Tərəflərin barışıq sazişini təsdiq etdikdə məhkəmə bu barədə qərardad çıxararaq, bu qərardadla eyni zamanda iş üzrə icraata xitam verir. Məhkəmə tərəfindən təsdiq edilən barışıq sazişinin şərtləri qərardadda göstərilməlidir. Həmin Məcəllənin 355-23.1-ci maddəsinə əsasən “Mediasiya haqqında” Azərbaycan Respublikası Qanununda müəyyən edilmiş müddət ərzində mediasiya prosesi nəticəsində əldə edilən barışıq sazişi könüllü qaydada icra edilmədikdə və ya barışıq sazişinin könüllü icrasından imtina olunduqda, ərizəçi barışıq sazişinin məcburi icrası üçün barışıq sazişinin təsdiq edilməsi barədə (barışıq sazişinin bu Məcəllənin 191.2-1-ci maddəsinə uyğun olaraq təsdiq edildiyi hal istisna olmaqla) məhkəməyə müraciət edə bilər. Qeyd olunan normalardan göründüyü kimi mediasiya prosesinin iki forması müəyyən edilmişdir, məhkəmədən əvvəl həyata keçirilən mediasiya və bilavasitə məhkəmə prosesindəki mediasiya. Təqdim edilmiş iddia ərizəsində isə tələb məhkəmədən əvvəl keçirilmiş mediasiya sessiyası zamanı əldə edilmiş barışıq sazişinin təsdiq edilməsi ilə bağlıdır ki, bu tələb üzrə ərizəyə məhkəmədə baxıla bilməz. Belə ki, sazişin tərəflərindən hər hansı biri sazişin şərtlərini pozarsa, yəni sazişdə göstərilənlərin könüllü icrasından imtina edərsə, digər tərəfin həmin sazişin məhkəmə qaydasında təsdiq edilməsinə dair ərizə ilə məhkəməyə müraciət edə bilər. Digər tərəfdən xx.xx.2015-ci il təvəllüdül X1 18 yaşına çatana qədər anası Ərizəçi ilə birlikdə Azərbaycan Respublikasından kənara çıxmasına və ümumvətəndaş pasportunun alınmasına Maraqlı şəxs razılıq verməsi notarial qaydada təsdiq olunmuş ərizə ilə də mümkündür. Belə olan halda hesab edirəm ki, iddia ərizəsinin icraata qəbulundan imtina edilməli, iddiaçıya barışıq sazişində göstərilən şərtlərin icrasından tərəflərdən birinin imtina etməsi halında həmin sazişin təsdiq edilməsi üçün məhkəməyə müraciət etmək hüququ izah edilməlidir. Azərbaycan Respublikası Mülki Prosessual Məcəlləsinin 153.2-ci və 153.2.1-ci maddələrinə əsasən ərizəyə məhkəmə qaydasında və ya mülki məhkəmə icraatı qaydasında baxılmalı deyildirsə hakim iddianın yolverilməzliyinə görə iddia ərizəsini qəbul etməkdən imtina edir: Şərh olunanlara əsaslanaraq və Azərbaycan Respublikası Mülki Prosessual Məcəlləsinin 153, 263 və 264-cü maddələrini rəhbər tutaraq, QƏRARA ALDİM: Ərizəçi Maraqlı şəxs qismində cəlb etdiyi “barışıq sazişinin təsdiq edilməsi” barədə ərizəsinin icraata qəbulundan imtina edilsin, ərizə ona əlavə edilmiş sənədlərlə birlikdə geri qaytarılsın. Ərizəçi barışıq sazişində göstərilən şərtlərin icrasından tərəflərdən birinin imtina etməsi halında həmin sazişin təsdiq edilməsi üçün məhkəməyə müraciət etmək hüququ izah edilsin. Qərardaddan 10 gün müddətində Binəqədi Rayon Məhkəməsinə şikayət verilə bilər. Hakim Etibar Mustafayev