Azərbaycan Respublikası adından QƏTNAMƏ Bakı şəhəri İş № 2(004)-7278/2025 18.02.2026 BAKI ŞƏHƏRİ YASAMAL RAYON MƏHKƏMƏSİ Ərizəçi maraqlı şəxs 3 saylı Bakı “ASAN Xidmət” Mərkəzi Qeydiyyat şöbəsi olmaqla ölüm faktının müəyyən edilməsi barədə ərizəsinə dair iş üzrə (açar sözlər: ölüm faktının təsdiqi) Hakim Əsədzadə Aytəkin Aqil oğlunun sədrliyi, Ələsgərov Pərvin Asif oğlunun katibliyi, Ərizəçi iştirakı ilə, Ərizəçi maraqlı şəxs 3 saylı Bakı “ASAN Xidmət” Mərkəzi Qeydiyyat şöbəsi olmaqla ölüm faktının müəyyən edilməsi barədə ərizəsinə dair işə açıq məhkəmə iclasında baxaraq, aşağıdakı qətnaməni qəbul etdi. İşin halları
1. AZE seriyalı, 06891922 nömrəli şəxsiyyət vəsiqəsindən görünür ki, X4 xx.xx.1947-ci ildə doğulmuşdur.
2. Təcili və X3 Stansiyası tərəfindən verilmiş xx.xx.2025-ci il tarixli ölüm haqqında xəbərdarlıq vərəqəsinə əsasən X1 adına ünvan 1 ünvanda kişi meytinin olması, həkimə qədər ölüm faktı qeyd edilmişdir.
3. Azərbaycan Respublikası Bakı şəhər İcra Hakimiyyəti Mənzil-Kommunal Təsərrüfatı Departamentinin Əhaliyə Vətəndaşlıq Xidməti trestinin xx.xx.2026-cı il tarixli arayışına əsasən X4 xx.xx.2025-ci il tarixdə Bakı şəhərində vəfat etmiş və Bakı şəhəri Qaradağ rayonu, Ümumşəhər (Qurdqapısı) qəbirstanlığında dəfn olunmuşdur.
4. 7 saylı Bakı “ASAN Xidmət” Mərkəzi Qeydiyyat şöbəsinin xx.xx.2025-ci il tarixli 3-16-5/8-11-529/25 nömrəli məktuba əsasən X1 ölümü haqqında tibbi şəhadətnamə təqdim edilmədiyindən ölümün qeydə alınması imkan xaricindədir.
5. Azərbaycan Respbulikası “Tibbi Ərazi Bölmələri İdarəetmə Birliyi” publik hüquqi şəxsinin Bakı şəhər Baş Səhiyyə Mərkəzi pbulik hüquqi şəxsinin 5 nömrəli şəhər poliklinikası tərəfindən verilmiş xx.xx.2025-ci il tarixli, 18-1-1-48/2-348/2025 nömrəli arayışdan görünür ki, X4 uzun müddət şəhər poliklinikasına müraciət etmədiyinə və müalicə almadığına görə ölüm haqqında tibbi şəhadətnamə verilməsi imkan xaricindədir.
Ərizə tələbinin və ona etirazın dəlilləri, məhkəmə icraat iştirakçılarının izahatları
a) ərizə tələbi
6. Ərizəçi maraqlı şəxs 3 saylı Bakı “ASAN Xidmət” Mərkəzi Qeydiyyat şöbəsi olmaqla ərizə, sonradan tələbin dəqiqləşdirilməsi barədə ərizə ilə məhkəməyə müraciət edərək, xx.xx.1947-ci il təvəllüdlü X1 xx.xx.2025-ci il tarixdə, Bakı şəhəri, Azadlıq prospekti, ev 90, mənzil 17 ünvanında ev şəraitində ölməsi faktının müəyyən olunması barədə qətnamə çıxarılmasını xahiş etmişdir.
7. Ərizənin əsaslarına görə, ərizəçinin əmisi xx.xx.1947-ci il təvəllüdlü X4 Bakı şəhəri, Azadlıq prospekti, ev 90, mənzil 17 ünvanında rəhmətə getmişdir. Təcili yardım çatdıqda artıq əmisi ölmüşdür. Əmisi rəhmətə getdikdən sonra onu Bakı şəhəri Qaradağ rayonu, Ümumşəhər (Qurdqapısı) qəbrstanlığında dəfn etmişlər. Mərhum kimsəsiz olduğu üçün rəsmi olaraq onun himayəsində olmuş, dəfn xərclərini özü çəkmişdir.
b) ərizəyə qarşı etiraz
8. Ərizə tələbinə qarşı etiraz daxil olmamışdır.
c) məhkəmə icraat iştiakçılarının izahatları
9. Məhkəmə iclasında iştirak edən ərizəçi ərizəyə uyğun izahat verib, təmin olunmasını xahiş etdi.
10. Məhkəmə iclasının vaxtı və yeri barədə lazımi qaydada məlumat verilməsinə baxmayaraq maraqlı şəxsin nümayəndəsi məhkəmə iclasına gəlməmiş, səbəbi barədə də məlumat verməmişdir.
11. Məhkəmə iclasında şahid qismində dindirilmiş X6 ifadəsində bildirmişdir ki, ərizəçi onun yoldaşının əmisidir, X4 yaşlı idi, onu ərizəçi saxlayırdı. Oktyabrın 18-i vəfat edib, vəfat etdikdən sonra Bakı şəhəri Qaradağ rayonu, Qurdqapısı qəbrstanlığında dəfn edilmişdir. Dəfndə iştirak etmişdir.
12. Məhkəmə iclasında şahid qismində dindirilmiş X2 ifadəsində göstərmişdir ki, ərizəçi onun əridir. 20 ildir evlidirlər və evləndikdən sonra əmisinə baxırlar. Yoldaşının əmisi tək yaşayırdı. Pandemiyadan sonra evdə tək qalırdı. Gecə saatlarında vəfat etmişdir. Vəfat etdikdən sonra Bakı şəhəri Qaradağ rayonu, Qurdqapısı qəbrstanlığında dəfn edilmişdir.
Tətbiq edilən hüquq
13. Azərbaycan Respublikası Mülki Prosessual Məcəlləsi: Maddə 305.1. Məhkəmə xüsusi icraat qaydasında aşağıdakı işlərə baxır: 305.1.1. hüquqi əhəmiyyəti olan faktların müəyyən edilməsi haqqında; Maddə 307.1. Məhkəmə fiziki və hüquqi şəxslərin şəxsi və ya əmlak hüquqlarının əmələ gəlməsi, dəyişməsi, xitam verilməsinin asılı olduğu faktları müəyyən edir. Maddə 307.2. Məhkəmə aşağıdakıların müəyyən edilməsi barədə işlərə baxır: 307.2.8. müvafiq icra hakimiyyəti orqanlarının imtina etdiyi hallarda, şəxsin müəyyən vaxtda, müəyyən şəraitdə vəfat etməsi faktının; Maddə 308. Məhkəmə hüquqi əhəmiyyəti olan faktları o zaman müəyyən edə bilər ki, ərizəçi həmin faktları təsdiq edən lazımi sənədləri başqa qaydada ala bilməsin, yaxud itirilmiş sənədlərin bərpası mümkün olmasın. Maddə 311. Məhkəmənin qətnaməsi faktı təsdiq edən sənədi, qeydə alınmalı faktlar üzrə isə qeydiyyatı həyata keçirən orqanların verdiyi sənədləri əvəz etməməklə, belə qeydəalınma üçün əsasdır.
14. Azərbaycan Respublikası Ali Məhkəməsi Plenumunun “Hüquqi əhəmiyyəti olan faktların müəyyən edilməsinə dair işlər üzrə məhkəmə təcrübəsinin bəzi məsələləri haqqında” xx.xx.2019-cu il tarixli, 03 nömrəli Qərarı: -1.4. Lazımi sənədin alınmasının mümkünsüzlüyü dedikdə qanunvericilikdə bu və ya digər faktın qeydiyyatı qaydasının nəzərdə tutulmaması (məsələn, şəxsin öhdədə olması faktı), yaxud da faktın qeydiyyatı qaydasına riayət edilməməsi və mövcud şəraitdə belə qaydadan istifadə olunmasının qeyri-mümkünlüyü (məsələn, atalığın etiraf olunması faktı, müvafiq icra hakimiyyəti orqanlarının imtina etdiyi hallarda, şəxsin müəyyən vaxtda, müəyyən şəraitdə vəfat etməsi faktı) nəzərdə tutulur. - 9. Azərbaycan Respublikası MPM-nin 307.2.8-ci maddəsində şəxsin müəyyən vaxtda və müəyyən şəraitdə vəfat etməsi faktının müəyyən edilməsi haqqında işlərə baxılarkən məhkəmələr ilk növbədə nəzərə almalıdırlar ki, Azərbaycan Respublikası Nazirlər Kabinetinin 2003-ci il 31 oktyabr tarixli, 145 nömrəli Qərarı ilə təsdiq edilmiş “Vətəndaşlıq vəziyyəti aktlarının dövlət qeydiyyatı Qaydası”nın 8.5-ci bəndinə əsasən ölüm faktı tibb müəssisəsinin müvafiq sənədi ilə (ölüm haqqında həkim arayışı, ölüm haqqında feldşer arayışı ilə) təsdiq edilməlidir. Ölüm haqqında həkim şəhadətnaməsi olmadıqda, ölüm faktı məhkəmə tərəfindən müəyyən edilir. - 9.4. Şəxsin müəyyən vaxtda, müəyyən şəraitdə ölməsi faktının müəyyən edilməsinə dair ərizəni təmin edən məhkəmə qətnaməsində ölüm faktı müəyyən edilən şəxsin adı, soyadı, atasının adı, ölümün baş vermə vaxtı və hansı şəraitdə baş verməsi göstərilməlidir. Ölümün baş vermə tarixi məhkəmənin qətnaməsində ölümün baş verməsinə dair göstərilən və məhkəmənin müəyyən etdiyi tarix hesab olunur.
15. Azərbaycan Respublikası Nazirlər Kabinetinin 2003-cü il 31 oktyabr tarixli, 145 nömrəli qərarı ilə təsdiq edilmiş “Vətəndaşlıq vəziyyəti aktlarının dövlət qeydiyyatı” Qaydası: Maddə 8.5. Ölüm haqqında tibbi şəhadətnamə olmadıqda ölüm faktı məhkəmə qaydasında müəyyən edilir. Bu halda Azərbaycan Respublikası Ailə Məcəlləsinin 194.2-ci maddəsinə uyğun olaraq “Elektron məhkəmə” informasiya sistemindən Azərbaycan Respublikası Ədliyyə Nazirliyinin informasiya sisteminə daxil olmuş ölüm faktının müəyyən olunması və ya şəxsin ölmüş elan edilməsi barədə qanuni qüvvəyə minmiş məhkəmə qətnaməsindən çıxarışa əsasən ölümün qeydiyyatı aparılır.
16. Azərbaycan Respublikası Mülki Prosessual Məcəlləsi: Maddə 14.1. Məhkəmə həqiqətə nail olmaq üçün işin hərtərəfli, tam və obyektiv tədqiqinə lazımi şərait yaradır. Bunun üçün məhkəmə: işdə iştirak edən şəxslərə onların prosessual hüquq və vəzifələrini izah edir, görüləcək, yaxud görülməyəcək hərəkətlərin nəticələri barədə onları xəbərdar edir, onların prosessual hüquqlarının həyata keçməsinə kömək göstərir; Maddə 14.2. Məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir; Maddə 77.1. Hər bir tərəf öz tələblərinin və etirazlarının əsası kimi istinad etdiyi halları sübut etməlidir; Maddə 119. Məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir; Maddə 217.1. Məhkəmənin qətnaməsi qanuni və əsaslı olmalıdır.
Məhkəmə baxışının hədləri
17. Azərbaycan Respublikası Mülki Prosessual Məcəlləsinin 218.3-cü maddəsinə əsasən hakim işdə iştirak edən şəxslərin verdiyi tələblər üzrə qətnamə çıxarır. Lakin hakim qanunda göstərilən müstəsna hallarda iddia tələblərindən kənara çıxa bilər.
Məhkəmənin mövqeyi
18. Məhkəmə ərizəni iş materialları ilə birlikdə nəzərdən keçirib hesab edir ki, ərizə təmin edilməlidir.
19. Belə ki, işdəki sübutlara – müvafiq arayışlara, ərizəçinin izahatı və şahid ifadələrinə məcmu halında qiymət verilərkən müəyyən olunur ki, xx.xx.1947-ci il təvəllüdlü X4 xx.xx.2025-ci il tarixdə Bakı şəhəri, Azadlıq prospekti, ev 90, mənzil 17 ünvanında ev şəraitində vəfat etmiş, ailə üzvləri və yaxınlarının iştirakı ilə dəfn edilmiş, mərhumun qəbri mövcuddur. Ölümün hansı səbəbdən baş verdiyini təsdiq edən sənəd və həkim rəyi olmadığı üçün ölüm haqqında tibbi şəhadətnamənin verilməsi mümkün olmamış, ölüm haqqında müvafiq tibbi şəhadətnamə olmadığı üçün isə ölümün dövlət qeydiyyatının aparılması mümkün olmamışdır.
20. Beləliklə, məhkəmə hesab edir ki, ərizə təmin edilməli, xx.xx.1947-ci il təvəllüdlü X1 xx.xx.2025-ci il tarixdə, Bakı şəhəri, Azadlıq prospekti, ev 90, mənzil 17 ünvanında ev şəraitində ölməsi faktı müəyyən edilməlidir.
21. Göstərilənlərə əsasən və MPM-in 119, 216-220, 227, 233, 358, 360-cı maddələrini rəhbər tutaraq, məhkəmə
qət etdi:
Ərizə təmin edilsin. 18 mart 1947-ci il təvəllüdlü X1 18 oktyabr 2025-ci il tarixdə, Bakı şəhəri, Azadlıq prospekti, ev 90, mənzil 17 ünvanında ev şəraitində ölməsi faktı müəyyən edilsin. Qətnamədən, işdə iştirak edən şəxslərə rəsmi qaydada verildiyi gündən 1 ay müddətində “Elektron məhkəmə” informasiya sistemində yaradılan elektron kabinetdən Bakı şəhəri Yasamal Rayon Məhkəməsi vasitəsilə Bakı Apellyasiya Məhkəməsinin Mülki Kollegiyasına apellyasiya şikayəti verilə bilər. Qətnamədən şikayət verilməmişdirsə, işdə iştirak edən şəxslərə rəsmi qaydada verildiyi gündən 1 ay keçdikdən sonra qanuni qüvvəyə minir.
HAKİM Aytəkin Əsədzadə