Bakı Şəhəri Nərimanov Rayon Məhkəməsi Qərardad — İş №2(005)-3757/2021

Azərbaycan Respublikası adından QƏRARDAD Bakı şəhəri İş № 2(005)-3757/2021 30.08.2021 BAKI ŞƏHƏRİ NƏRİMANOV RAYON MƏHKƏMƏSİ Hakim Əmirxanova Kəmalə Fərman qızının sədrliyi, Eldarzadə Şirazi Elxan oğlunun katibliyi ilə, İddiaçı cavabdeh “Team İndustrial Services(UK) Limited” şirkətinin Azərbaycandakı filialına qarşı işə bərpa, məcburi işburaxma dövrü üçün əmək haqqının verilməsi, mənəvi zərərin ödənilməsi və xüsusi qərardad qəbul edilməsi tələbinə dair iddia ərizəsi üzrə mülki işə Bakı şəhəri Nərimanov Rayon Məhkəməsinin inzibati binasında açıq məhkəmə iclasında baxaraq, məhkəmə MÜƏYYƏN ETDİ: İddiaçı cavabdeh “Team İndustrial Services(UK) Limited” şirkətinin Azərbaycandakı filialına qarşı işə bərpa, məcburi işburaxma dövrü üçün əməkhaqqının verilməsi, mənəvi zərərin ödənilməsi və xüsusi qərardad qəbul edilməsi tələbinə dair iddia ərizəsi ilə məhkəməyə müraciət edərək,Cavabdeh şirkətinin Azərbaycan Respublikasındakı filialı tərəfindən verilmiş 03.06.2021-ci il tarixli 02-21X saylı əmri ləğv edərək iddiaçını əvvəlki iş yerinə bərpa və məcburi iş buraxma dövrü üçün əmək haqqının verilməsi barədə, "Team İndustrial Services (UK) Limited” şirkətinin Azərbaycan Respublikasındakı filialı tərəfindən iddiaçı ilə bağlanmış 27.05.2019-cu il tarixli müddətsiz əmək müqaviləsini birtərəfli olaraq müddətli əmək müqaviləsinə dəyişdirən səlahiyyətli şəxslər barəsində xüsusi Qərardad qəbul edilməsi, iddiaçıya vurulan mənəvi ziyana görə isə cavabdehdən 50000 manat məbləğində təzminatın ödənilməsinə dair qətnamə qəbul edilməsini xahiş etmişdir. Məhkəmə iclaslarının yeri və vaxtı barədə tərəflərə qanunla müəyyən edilmiş qaydada məhkəmə bildirişi göndərilməsinə baxmayaraq, tərəflər məhkəmə iclasına gəlməmiş, məhkəmə baxışının təxirə salınması və işə onların iştirakı olmadan baxmağı xahiş etməmişlər. Azərbaycan Respublikası MPM-in 185.4-cü maddəsinə əsasən tərəflər və yaxud iddiaçı məhkəmə baxışının vaxtı və yeri haqqında lazımi qaydada xəbərdar edilib, lakin onlar məhkəmə iclasına təkrar gəlmədikdə məhkəmə həmin işə baxmağa haqlıdır. Belə hallarda bu Məcəllənin müvafiq olaraq 259.0.6-cı və 259.0.7-ci maddələri tətbiq edilir. Bu Məcəllənin 259.0.6-cı maddəsinə əsasən işə onların iştirakı olmadan baxmağı xahiş etməmiş tərəflər məhkəməyə gəlmədikdə məhkəmə ərizəni baxılmamış saxlayır. Məhkəmə hesab edir ki, tərəflər məhkəmə iclasına gəlmədiklərindən iddia ərizəsi Azərbaycan Respublikası MPM-in 259.0.6-cı maddəsinə əsasən baxılmamış saxlanılmalıdır. Şərh olunanlara əsasən və Azərbaycan Respublikası MPM-in 185.4, 259, 259.0.6, 260, 263-264, 266-268-ci maddələrini rəhbər tutaraq, məhkəmə QƏRARA ALDİ: İddiaçı cavabdeh “Team İndustrial Services(UK) Limited” şirkətinin Azərbaycandakı filialına qarşı işə bərpa, məcburi işburaxma dövrü üçün əməkhaqqının verilməsi, mənəvi zərərin ödənilməsi və xüsusi qərardad qəbul edilməsi tələbinə dair iddia ərizəsi baxılmamış saxlanılsın. Qərardaddan, qərardad tərəfə rəsmi qaydada verildikdən sonra 10 (on) gün müddətində Bakı şəhəri Nərimanov Rayon Məhkəməsinə şikayət verilə bilər. Hakim: Kəmalə Əmirxanova