Yevlax Rayon Məhkəməsi Qərardad — İş №2(039)-702/2021

Azərbaycan Respublikası adından QƏRARDAD Yevlax Rayou İş № 2(039)-702/2021 01.03.2021 YEVLAX RAYON MƏHKƏMƏSİ Hakim Cavadova Günay İsmayıl qızı İddiaçı Cavabdeh qarşı “qəyyumluğun təyin olunması” tələbinə dair iddia ərizəsini və ona əlavə edilmiş sənədləri nəzərdən keçirib, MÜƏYYƏN ETDİ: İddiaçı Cavabdeh qarşı “qəyyumluğun təyin olunması” tələbinə dair iddia ərizəsi ilə Yevlax Rayon Məhkəməsinə müraciət etmişdir. İddiaçı tələbini onunla əsaslandırmışdır ki, cavabdeh, onun bacısı Elnarə Yusibovanın faktiki nikah münasibətlərində olduğu əri olmuşdur. Bacısı Elnarə xx xxxxxx 2020-ci il tarixdə vəfat etmişdir. Bacısının cavabdehlə qeyri-rəsmi nikahından xx.xx.2011-ci il təvəllüdlü Əli adlı uşaqları var. Məhkəmə qətnaməsi ilə Əlinin saxlanılması üçün hər ay 100 manat sabit pul məbləğində alimentin cavabdehdən tutulması qət edilsə də, cavabdeh uşağa baxmır, bir ata kimi uşağı saymır, aliment ödəməkdən yayınır və onun qəyyum kimi təyin olunmağına icazə vermir. Məhkəmə hesab edir ki, iddianın yolverilməzliyinə görə ərizənin qəbul edilməsindən imtina edilməli və ərizə ona əlavə edilmiş sənədlərlə birlikdə iddiaçıya geri qaytarılmalıdır. Belə ki, iddiaçı “maraqlı şəxs” qismində Maraqlı şəxs qeyd etsə də, iddia ərizəsi və ona əlavə edilmiş sənədlərlə iddiaçının hazırkı tələblə müvafiq icra hakimiyyəti orqanına müraciət etməsi müəyyən olunmur. Halbuki, Azərbaycan Respublikası Ailə Məcəlləsinin 114.1-ci maddəsinə əsasən valideynlər öldükdə, valideynlik hüquqlarından məhrum olunduqda, valideynin hüquqları məhdudlaşdırıldıqda, valideynlər fəaliyyət qabiliyyəti olmayan hesab edildikdə, valideynlər xəstələndikdə, uzun müddət uşaqlarla birlikdə olmadıqda, valideynlər uşaqların tərbiyəsindən və ya onların hüquq və mənafelərinin müdafiəsindən yayındıqda, o cümlədən sosial xidmət müəssisələrindən öz uşaqlarını götürməkdən imtina etdikdə, eləcə də valideyn himayəsinin olmadığı digər hallarda uşaqların hüquq və mənafelərinin müdafiəsi müvafiq icra hakimiyyəti orqanı tərəfindən həyata keçirilir. Azərbaycan Respublikası Mülki Məcəlləsinin 35.1-ci maddəsinə əsasən qəyyumu və ya himayəçini qəyyumluğa və ya himayəçiliyə ehtiyacı olan şəxsin yaşayış yeri üzrə qəyyumluq və himayəçilik orqanı fiziki şəxs üzərində qəyyumluq və ya himayəçilik qoyulması zərurətinin ona məlum olduğu andan üç ay ərzində təyin edir. Qəyyumluğa və ya himayəçiliyə ehtiyacı olan şəxsə qəyyum və ya himayəçi təyin edilənədək qəyyum və ya himayəçi vəzifələrini qəyyumluq və himayəçilik orqanı icra edir. Qəyyumun və ya himayəçinin təyin edilməsi barədə maraqlı şəxslər məhkəməyə etiraz verə bilərlər. Azərbaycan Respublikası Mülki Prosessual Məcəlləsinin 153.2.1-ci maddəsinə əsasən ərizəyə məhkəmə qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir. İddiaçıya izah olunur ki, hazırkı tələbi ilə bağlı müvafiq icra hakimiyyəti orqanına(yerli icra hakimiyyəti orqanı) müraciət etmək hüququ vardır. Qeyd olunanları nəzərə alaraq və Azərbaycan Respublikası Mülki Prosessual Məcəlləsinin 153, 263, 264 və 268-ci maddələrini rəhbər tutaraq məhkəmə, QƏRARA ALDİ : İddiaçı Cavabdeh qarşı “qəyyumluğun təyin olunması” tələbinə dair iddia ərizəsinin qəbul edilməsindən imtina edilsin və ərizə ona əlavə edilmiş sənədlərlə birlikdə iddiaçıya geri qaytarılsın. İddiaçı izah olunur ki, ərizəsində göstərilən tələblə bağlı yerli icra hakimiyyəti orqanına müraciət etmək hüququ vardır. Qərardaddan rəsmi qaydada verildikdən sonra 10 gün müddətində şikayət verilə bilər. Hakim Günay Cavadova