Gəncə Şəhəri Nizami Rayon Məhkəməsi Qərardad — İş №2(044)-630/2022

Azərbaycan Respublikası adından QƏRARDAD Gəncə şəhəri İş № 2(044)-630/2022 04.02.2022 GƏNCƏ ŞƏHƏRİ NİZAMİ RAYON MƏHKƏMƏSİ Gəncə şəhəri Nizami Rayon Məhkəməsinin hakimi Hüseynov Kənan Zakir oğlu, Ərizəçi Maraqlı şəxs qismində cəlb etdiyi mediasiya prosesində bağlanmış əmlakın maraqlı şəxs tərəfindən birgə nikah dövründə anadan olmuş uşaqlarına bağışlanması barədə ərizəsini və ona əlavə olunmuş sənədləri məhkəmənin inzibati binasında nəzərdən keçirərək, MÜƏYYƏN ETDİM: Ərizəçi ərizə ilə məhkəməyə müraciət edərək Maraqlı şəxs arasında mediasiya prosesində 11 noyabr 2021-ci il tarixli MŞİH 06286 nömrəli bağlanılmış barışıq sazişinin, yəni Maraqlı şəxs mülkiyyətində olan Gəncə şəhəri Ziya Bünyadov küçəsi, 2-ci döngədə yerləşən 24 saylı fərdi yaşayış evini (Reyestr nömrəsi:**********1410301) birgə nikah dövründə anadan olmuş uşaqları 10 noyabr 2010-cu il təvəllüdlü X2 və 12 aprel 2014-cü il təvəllüdlü X1 hədiyyə şəklində bağışlanmasına dair bağlanmış barışıq sazişinin təsdiq edilməsinə dair qərar çıxarılmasını xahiş etmişdir. Ərizəni və ona əlavə olunmuş sənədləri nəzərdən keçirərək hesab edirəm ki, ərizə geri qaytarılmalıdır. Belə ki, ərizəçi tərəfindən ərizə verilərkən Azərbaycan Respublikası Mülki Prosessual Məcəlləsinin 150.1.2-ci maddəsinin tələbləri pozulmuş, qanunvericiliklə nəzərdə tutulmuş qaydada dövlət rüsumunun ödənilməsi haqqında sənəd əlavə olunmamışdır. Ərizəyə ərizəçi tərəfindən 50 manat və 200 manat dövlət rüsumlarının ödənilməsi barədə qəbz əlavə edilmiş, lakin həmin qəbzlər ilkin mediassiya sessiyasında iştirak üçün və mübahisə mediasiya vasitəsilə müsbət həll olunduğu üçün mediatora ödənilən haqq və mükafatdır. Halbuki xüsusi icraat qaydasında baxılan mediasiya prosesi nəticəsində bağlanılmış barışıq sazişinin təsdiq edilməsinə dair ərizə verilərkən 100 manatdan dövlət rüsumu ödənilməlidir. Çünki “Dövlət rüsumu haqqında” Azərbaycan Respublikasının Qanununun 8.2-ci maddəsinə əsasən qiymətləndirilməyən iddia ərizəsinin, məhkəmə əmri haqqında ərizənin, xüsusi icraat qaydasında baxılan iş üzrə ərizənin verilməsinə görə 100 manat dövlət rüsumu tutulur. Azərbaycan Respublikası Mülki Prosessual Məcəlləsinin: - 151.1-ci maddəsinə əsasən iddia ərizəsi həmin Məcəllənin tələblərinə riayət edilməklə verildikdə, onun məhkəmə icraatı mümkündür. - 152.1.5-ci maddəsinə əsasən müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. Beləliklə hesab edirəm ki, ərizəyə dövlət rüsumunun ödənilməsi barədə qəbz əlavə edilmədiyindən ərizəsi geri qaytarılmalıdır. Ərizəçiyə izah edilməlidir ki, ərizənin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 152, 263, 264, 267 və 268-ci maddələrini rəhbər tutaraq QƏRARA ALDİM: Ərizəçi Maraqlı şəxs qismində cəlb etdiyi mediasiya prosesində bağlanmış əmlakın maraqlı şəxs tərəfindən birgə nikah dövründə anadan olmuş uşaqlarına bağışlanması barədə ərizə və ona əlavə edilmiş sənədlər geri qaytarılsın. Ərizəçiyə izah edilsin ki, ərizənin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardad tərəfə rəsmi qaydada verildikdən sonra 10 gün müddətində Gəncə Şəhəri Nizami Rayon Məhkəməsinə şikayət verilə bilər. Hakim Kənan Hüseynov