Masallı Rayon Məhkəməsi Qərardad — İş №2(050)-2839/2025

Azərbaycan Respublikası adından QƏRARDAD Masallı rayonu İş № 2(050)-2839/2025 18.08.2025 MASALLI RAYON MƏHKƏMƏSİ Mən, Masallı rayon Məhkəməsinin hakimi Abdullayev Coşqun Şamil oğlu, Ərizəçi (maraqlı şəxs Masallı Regional “ASAN xidmət” mərkəzində Qeydiyyat şöbəsi qeyd edilmiş) “X1 ürək çatışmazlığı səbəbindən vəfat etməsi faktının” müəyyən edilməsinə dair ərizəsini nəzərdən keçirərək, MÜƏYYƏN ETDİM: Ərizəçi maraqlı şəxs Masallı Regional “ASAN xidmət” mərkəzində Qeydiyyat şöbəsinə qarşı “ölüm faktının müəyyən edilməsi” tələbi barədə ərizə ilə məhkəməyə müraciət edərək qətnamə çıxarılmasını xahiş etmişlər. Ərizəni nəzərdən keçirərək hesab edirəm ki, ərizə və ona əlavə edilmiş sənədlər geri qaytarılmalıdır. Azərbaycan Respublikası Mülki Prosessual Məcəlləsinin 151.1-ci maddəsinə əsasən ərizənin bu Məcəllənin tələblərinə riayət edilməklə verilməsi yoxlanılmalıdır. Həmin məcəllənin 152.1.1. iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə iddia ərizəsi geri qaytarılır. Azərbaycan Respublikası Nazirlər Kabinetinin 2003-ci il 31 oktyabr tarixli, 145 nömrəli Qərarı ilə təsdiq edilmiş “Vətəndaşlıq vəziyyəti aktlarının dövlət qeydiyyatı Qaydası”nın 8.5-ci bəndinə əsasən ölüm faktı tibb müəssisəsinin müvafiq sənədi ilə (ölüm haqqında həkim arayışı, ölüm haqqında feldşer arayışı ilə) təsdiq edilməlidir. Ölüm haqqında həkim şəhadətnaməsi olmadıqda, ölüm faktı məhkəmə tərəfindən müəyyən edilir. Hazırda materiala ərizəçi tərəfindən qeyd edilən həkim arayışının olub-olmaması ilə bağlı tibbi sənəd ərizəyə əlavə edilməmişdir. Eyni zamanda ərizəçi tələbi düzgün irəli sürməmiş, X1 ürək çatışmazlığı səbəbindən vəfat etməsi faktının müəyyən edilməsini xahiş etmişdir. Məhkəmə tərəfindən şəxsin yalnız ölüm faktı müəyyən edilə bilər, lakin konkret olaraq hansı xəstəliklə bağlı vəfat etməsi faktı müəyyən edilə bilməz. Buna görə də ərizəçi gələcəkdə məhkəməyə müraciət edərkən şəxsin sadəcə ölüm faktının müəyyən edilməsini məhkəmədən xahiş edə bilər. Azərbaycan Respublikası Mülki Prosessual Məcəlləsinin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Göstərilənlərə əsasən, Azərbaycan Respublikası MPM-nin 152, 263-264, 266-268 maddələrini rəhbər tutaraq, QƏRARA ALDİM: Ərizəçi iddia ərizəsi və ona əlavə edilmiş sənədlər geri qaytarılsın. İddiaçıya izah olunsun ki, qərardadda göstərilən nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etmək hüququ vardır. Qərardaddan rəsmi qaydada verildikdən sonra 10 gün müddətində (elektron kabinet vasitəsilə) Masallı Rayon Məhkəməsinə şikayət verilə bilər. Hakim: Coşqun Abdullayev