Masallı Rayon Məhkəməsi Qətnamə — İş №2(050)-3591/2023

Azərbaycan Respublikası adından QƏTNAMƏ Masallı rayonu İş № 2(050)-3591/2023 06.10.2023 MASALLI RAYON MƏHKƏMƏSİ Hakim Bəhmənov Habil Xanoğlan oğlunun sədrliyi, Məhkəmə iclasının katibi Kərimli Nəzrin Fikrət qızının katibliyi ilə. Ərizəçi Maraqlı şəxs ilə arasında bağlanmış «barışıq sazişinin təsdiq edilməsi» barədə ərizəsinə açıq məhkəmə iclasında baxaraq, məhkəmə müəyyən etdi: Ərizəçi ərizə ilə məhkəməyə müraciət edərək, Maraqlı şəxs ilə 28 avqust 2023-cü ildə mediasiya prosesində bağlanmış MŞL/MT014/2023/MŞL-02219 saylı barışıq sazişinin təsdiq edilməsi, Maraqlı şəxs 25 iyul 2018-ci il təvəllüdlü X3, 26 sentyabr 2019-cu il təvəllüdlü X1 və X2 yetkinlik yaşına çatana kimi saxlanılması üçün hər ay bir uşağa görə 120 manat, cəmi 360 manat alimentin alınıb ona verilməsi barədə qətnamə qəbul edilməsini xahiş etmişdir. Ərizə onunla əsaslandırılmışdır ki, o, Maraqlı şəxs ilə el adəti ilə toy etməklə qurmuşlar. Birgə nikahlarından 25 iyul 2018-ci il təvəllüdlü Ləman, 26 sentyabr 2019-cu il təvəllüdlü Mirayan və 26 sentyabr 2019-cu il təvəllüdlü Mirbanu adlı uşaqları olmuşdur. Maraqlı şəxs ilə 28 avqust 2023-cü ildə mediasiya prosesində MŞL/MT014/2023-02219 saylı barışıq sazişi imzalanmışdır. Barışıq sazişinə görə Maraqlı şəxs uşaqların saxlanılması üçün hər ay bir uşağa görə 120 manat, cəmi 360 manat alimenti ona ödəyəcəkdir. Odur ki, Maraqlı şəxs ilə 28 avqust 2023-cü ildə mediasiya prosesində bağlanmış MŞL/MT014/2023-02219 saylı barışıq sazişinin təsdiq edilməsi barədə qətnamə çıxarılmasını məhkəmədən xahiş edir. Ərizəçi və Maraqlı şəxs məhkəmə iclasının vaxtı və yeri barədə rəsmi məlumat verilməsinə baxmayaraq, məlum olmayan səbəbdən məhkəmə iclasına gəlməmiş, gəlməməsinin səbəblərini bildirməmişdir. Odur ki, Azərbaycan Respublikası Mülki- Prosessual Məcəlləsinin 355-25.2-ci maddəsinə əsasən məhkəmə işə onların iştirakı olmadan baxılmasını mümkün hesab edir. Həmin maddənin tələbinə görə məhkəmə ərizəyə baxılması barədə işdə maraqlı olan şəxslərə məlumat verir, lakin həmin şəxslərin üzrlü səbəb olmadan məhkəmə iclasına gəlməməsi işə baxılmasına mane olmur. İşdə olan nikah haqqında şəhadətnamədən görünür ki, Maraqlı şəxs Ərizəçi ilə nikahlarını 27 mart 2018-ci il tarixdə Masallı regional “ASAN xidmət” mərkəzinin Qeydiyyat şöbəsində rəsmiləşdirmişlər. İşdə olan doğum haqqında şəhadətnamələrin surətinlərdən görünür ki, 25 iyul 2018ci ildə X5, 26 sentyabr 2019-cu ildə X4 və 26 sentyabr 2019-cu ildə X7 adlı uşaqlar doğulmuş, uşaqların atası Maraqlı şəxs, anası isə Ərizəçi qeyd edilmişdir. MŞL/MT014/2023/MŞL-02219 nömrəli, 28 avqust 2023-cü il tarixli barışıq sazişindən görünür ki, Maraqlı şəxs Ərizəçi ilə mediasiya sessiyasında nikahlarının pozulması, uşaqların ananın himayəsində saxlanılması və hər ay bir uşaq üçün 120 manat, cəmi 360 manat alimentin ödənilməsi barədə razılığa gəlmişlər. Razılığa əsasən alimentin hesablanması 2023-cü ilin sentyabr ayının 01-dən başlamaqla, hər ayın 01-də gün ərzində nağd qaydada köçürmə yolu ilə, poçt və ya bank vasitəsi ilə ödənilməlidir. Məhkəmə iş materiallarını tədqiq edib, iş üzrə toplanmış sübutların məcmusuna hüquqi qiymət verərək, hesab edir ki, ərizə təmin edilməməlidir. Belə ki, MŞL/MT014/2023/MŞL-02219 nömrəli, 28 avqust 2023-cü il tarixli barışıq sazişinin şərtlərinə görə alimentin cavabdeh Maraqlı şəxs tərəfindən hər ayın 01-də ödənilməsi qeyd olunmuş, ödəniş tarixi 01 oktyabr 2023-cü il tarixdə olmasına baxmayaraq, Ərizəçi “barışıq sazişinin təsdiq olunması” barədə ərizə ilə 28 sentyabr 2023cü il tarixdə məhkəməyə müraciət etmişdir. Belə olan halda barışıq sazişinin ödəniş tarixi ilə bağlı şərtinin pozulması halı, yəni alimentin könüllü qaydada icra edilməsindən imtina edilməsi halı müəyyən olunmur. Azərbaycan Respublikası Mülki-Prosessual Məcəlləsinin 355-23.1-ci maddəsində qeyd edilmişdir ki, “Mediasiya haqqında” Azərbaycan Respublikası Qanununda müəyyən edilmiş müddət ərzində mediasiya prosesi nəticəsində əldə edilən barışıq sazişi könüllü qaydada icra edilmədikdə və ya barışıq sazişinin könüllü icrasından imtina olunduqda, ərizəçi barışıq sazişinin məcburi icrası üçün barışıq sazişinin təsdiq edilməsi barədə (barışıq sazişinin bu Məcəllənin 191.2-1-ci maddəsinə uyğun olaraq təsdiq edildiyi hal istisna olmaqla) məhkəməyə müraciət edə bilər. Eyni Məcəllənin 355-24-cü maddəsində qeyd edilmişdir ki, mediasiya prosesi nəticəsində bağlanılmış barışıq sazişinin təsdiq edilməsi ilə bağlı ərizədə barışıq sazişinin könüllü icrası üçün “Mediasiya haqqında” Azərbaycan Respublikası Qanununun 34.1-ci maddəsi ilə müəyyən olunmuş müddətin keçməsi və ərizəçinin xahişi göstərilməlidir. Göstərilənlərə və Azərbaycan Respublikası MPM-nin 216-220, 233, 355-25-ci maddələrinin tələblərinə əsasən, məhkəmə qət etdi : Ərizəçi Maraqlı şəxs ilə 28 avqust 2023-cü ildə mediasiya prosesində bağlanmış MŞL/MT014/2023/MŞL-02219 saylı barışıq sazişinin təsdiq edilməsi barədə ərizəsi təmin edilməsin. Qətnamədən onun rəsmi qaydada verildiyi gündən bir ay müddətində (“Elektron məhkəmə” informasiya sistemində yaradılan elektron kabinetdə yerləşdirilməklə) Şirvan Apellyasiya Məhkəməsinə Masallı Rayon Məhkəməsi vasitəsi ilə apellyasiya şikayəti verilə bilər. Sədrlik edən: Habil Bəhmənov