Azərbaycan Respublikası adından QƏTNAMƏ Masallı rayonu İş № 2(5-145)-6/2026 22.01.2026 MASALLI RAYON MƏHKƏMƏSİ Hakim Abbasova Ellara Həsən qızının sədrliyi, Məhkəmə iclas katibi Musayeva Zəhraxanım Şahin qızının katibliyi, Ərizəçi iştirakı ilə, Ərizəçi Maraqlı şəxs qarşı “barışıq sazişinin təsdiq edilməsi” tələbinə dair ərizəsi üzrə mülki işə açıq məhkəmə iclasında audio və video çəkiliş vasitəsilə baxaraq, məhkəmə müəyyən etdi: Ərizədə qeyd edilmiş işin halları: Maraqlı şəxs ilə birgə nikahdan xx.xx.2007-ci il təvəllüdlü X8 və xx.xx.2009-cu il təvəllüdlü X7 adlı uşaqları anadan olmuşlar. Uşaqlar hazırda onun yanında yaşayırlar. Uşaqlardan biri artıq yetkinlik yaşına çatmışdır. Maraqlı şəxslə aralarında Masallı 1 saylı Mediasiya Təşkilatında xx.xx.2023-cü il tarixli barışıq sazişi bağlanmış və həmin sazişə əsasən uşaqların saxlanması üçün 2023-cü ilin dekabr ayından başlayaraq hər uşaq üçün 70 manat olmaqla, cəmi 140 manat aliment tutulması müəyyən olunmuşdur. Lakin Maraqlı şəxs sazişin şərtlərini icra etməmiş və aliment ödəməmişdir. Barışıq sazişi imzalandığı andan qüvvəyə minir və 10 gün ərzində icra olunmalıdır, hazırda 10 gündən artıq müddət keçməsinə baxmayaraq icra olunmamışdır. Nəticədə barışıq sazişinin şərtləri pozulmuş və onun barışıq sazişini təsdiq etmək hüququ yaranmışdır. Masallı Rayon Məhkəməsinin xx.xx.2025-ci il tarixli, 2(050)-3964/2025 saylı qətnaməsinə əsasən barışıq sazişi X2 üçün aliment hissəsində təsdiq olunmuş, digər hissədə isə ərizə vermədiyi üçün baxılmamışdır. Hazırda 2023-cü ilin dekabr ayından oğlu Ağakişi Cəbiyevin yetkinlik yaşına çatana kimi, yəni xx.xx.2025-ci il tarixə olan dövr üzrə aliment borcunun təsdiq olunması zərurəti yaranmışdır. Odur ki, barışıq sazişinin həmin hissədə təsdiq olunması barədə məhkəməyə müraciət etmişdir. Ərizəçinin tələbi: Masallı 1 saylı Mediasiya Təşkilatı tərəfindən təsdiq edilmiş xx.xx.2023-cü il tarixli, MT036/2023-00288 saylı barışıq sazişinin xx.xx.2007-ci il təvəllüdlü X3 üçün 2023-cü ilin dekabr ayından 2025-ci ilin oktyabr ayının 12-nə kimi olan dövr ərzində ödənilməmiş aliment hissəsində təsdiq edilməsi və həmin dövr üzrə alimentin Maraqlı şəxs tutularaq ona ödənilməsi barədə qətnamə qəbul edilməsini məhkəmədən xahiş etmişdir. Tərəflərin mövqeyi: Ərizəçi məhkəmə iclasında izahat verərək bildirmişdir ki, nikahları pozulmuşdur. Aralarında barışıq sazişi imzalanmışdır. Həmin barışıq sazişinə əsasən Maraqlı şəxs hər ay hər uşağa görə 70 manat olmaqla, ümumilikdə 140 manat uşaq üçün aliment verməyə razılaşmışdır. Lakin hazırda barışıq sazişinin şərtlərinə əməl edilmir. Barışıq sazişi qızı X6 münasibətdə təsdiq edilmişdir. Bu səbəbdən barışıq sazişinin təsdiq edilməsi tələbi ilə məhkəməyə müraciət etmişdir. Maraqlı şəxs məhkəmə iclasının yeri və vaxtı barədə lazımi qaydada xəbərdar edilsə də, məhkəmə iclasına gəlməmiş və gəlməməsinin səbəbi barədə məhkəməyə məlumat verməmişdir. Məhkəmə Mülki-Prosessual Məcəllənin 355-25.2-ci maddəsinə əsasən işə maraqlı şəxsin iştirakı olmadan baxılmasını mümkün hesab etmişdir. İş materiallarına əlavə edilmiş sənədlər: MŞM/MT036/2023-00288 saylı, xx.xx.2023-cü il tarixli barışıq sazişində tərəflər aşağıdakı şərtlər daxilində razılığa gəlmişlər: 1) Tərəflərin birgə uşaqları X8 və X7 anaları Ərizəçi himayəsində saxlanılır. 2) Uşaqların yetkinlik yaşına çatana kimi hər birinə 70 manat olmaqla cəmi 140 manat cari pul məbləğində aliment Maraqlı şəxs tərəfindən Ərizəçi ödəyəcəyinə öhdəlik götürür. Alimentin ödənilməsi 2023-ün dekabr ayından başlayaraq hər ayın 28-nə kimi nağd, poçt və ya bank köçürməsi yolu ilə birinci tərəf Ərizəçi ödəyəcəyinə öhdəlik götürür. Şəxsiyyət vəsiqəsinin surətindən görünür ki, X8 xx.xx.2007-ci il tarixdə anadan olmuşdur. Masallı Rayon Məhkəməsinin xx.xx.2025-ci il tarixli, 2(050)-3964/2025 saylı qətnaməsindən görünür ki, ərizə təmin edilmiş, Ərizəçi və Maraqlı şəxs arasında mediasiya prosesi nəticəsində bağlanılmış 29 noyabr 2023-cü il tarixli, MŞM/MT036/2023- 00288 saylı, xx.xx.2025-ci il tarixli barışıq sazişi aşağıdakı hissədə təsdiq edilmişdir: 2) Uşağın yetkinlik yaşına çatana kimi 70 manat pul məbləğində alimentin Maraqlı şəxs tərəfindən Ərizəçi ödəyəcəyinə öhdəlik götürmüş, alimentin ödənilməsinin 2023-cü ilin dekabr ayından başlayaraq hər ayın 29-na kimi nağd poçt və ya bank köçürməsi yolu ilə birinci tərəf Ərizəçi ödəyəcəyinə öhdəlik götürmüşdür. Tətbiq edilən hüquq: Azərbaycan Respublikası Mülki-Prosessual Məcəlləsinin 355-23.1-ci maddəsində qeyd edilmişdir ki, “Mediasiya haqqında” Azərbaycan Respublikası Qanununda müəyyən edilmiş müddət ərzində mediasiya prosesi nəticəsində əldə edilən barışıq sazişi könüllü qaydada icra edilmədikdə və ya barışıq sazişinin könüllü icrasından imtina olunduqda, ərizəçi barışıq sazişinin məcburi icrası üçün barışıq sazişinin təsdiq edilməsi barədə (barışıq sazişinin bu Məcəllənin 191.2-1-ci maddəsinə uyğun olaraq təsdiq edildiyi hal istisna olmaqla) məhkəməyə müraciət edə bilər. Həmin Məcəllənin 355-24-cü maddəsində qeyd edilmişdir ki, mediasiya prosesi nəticəsində bağlanılmış barışıq sazişinin təsdiq edilməsi ilə bağlı ərizədə barışıq sazişinin könüllü icrası üçün “Mediasiya haqqında” Azərbaycan Respublikası Qanununun 34.1-ci maddəsi ilə müəyyən olunmuş müddətin keçməsi və ərizəçinin xahişi göstərilməlidir. "Mediasiya haqqında” Azərbaycan Respublikasının Qanununun: 34.1. Barışıq sazişi, əgər sazişdə ayrı şərt nəzərdə tutulmayıbsa, imzalandığı gündən tərəflər üçün məcburi xarakter daşıyır. Barışıq sazişində tərəflər arasında ayrı müddət müəyyən edilməyibsə barışıq sazişi imzalandığı gündən 10 gün müddətində könüllü şəkildə icra olunmalıdır. 34.2. Barışıq sazişinin könüllü icrasından boyun qaçırma Azərbaycan Respublikasının Mülki Məcəlləsinə uyğun olaraq barışıq sazişində müəyyən olunan məsuliyyətə səbəb olur. 34.3. Əgər barışıq sazişinin könüllü icrasından imtina olunsa, tərəf (o cümlədən məhkəmə baxışında olan işlər üzrə tərəf) barışıq sazişinin məcburi icrası üçün məhkəməyə müraciət edə bilər. 34.4. Barışıq sazişi məcburi icra edilməsi üçün məhkəmə tərəfindən müvafiq qaydada təsdiq olunur (bu Qanunun 34.5-ci maddəsinin tələbləri nəzərə alınmaqla). 34.5. Barışıq sazişi bu Qanunun 33.3-cü maddəsinə zidd olduqda, onun təsdiq edilməsindən imtina olunur. Azərbaycan Respublikası Ali Məhkəməsinin Mülki və Kommmersiya kollegiyalarının xx.xx.2024-cü il tarixli, 01/2024 №-li Məhkəmə qərarı ilə təsdiq edilmiş barışıq sazişinin etibarsızlığı barədə iddianın mümkünlüyünə dair qanunvericiliyin tətbiqi məsələləri üzrə qərardadının:
39. Mediasiya prosesi nəticəsində əldə edilən barışıq sazişinin məhkəmə tərəfindən xüsusi icraatda təsdiqlənməsi isə yalnız razılaşmanın məcburi icrasını təmin etmək məqsədi daşıyır (“Mediasiya haqqında” Qanun, maddə 34.4; MPM, maddə 355-23.1).
47. Mediasiya prosesi nəticəsində bağlanmış barışıq sazişinə məhkəmənin məhz xüsusi icraatda və on gün müddətində baxması (MPM, fəsil 40-7) proseduru da onu göstərir ki, belə təsdiqləmə (yaxud imtina) prosessual mahiyyət daşımaqla, mübahisəli maddi hüquqi məsələlərin araşdırılmasını ehtiva etmir.
İşə baxan məhkəmənin mövqeyi:
Məhkəmə qeyd edir ki, ərizəçi tərəfindən təsdiq olunması xahiş edilmiş barışıq sazişi tam qanuni şəkildə bağlanmış, həmçinin saziş hər hansı digər şəxslərin hüquqlarına toxunmur. Bundan başqa məhkəmə barışıq sazişini nəzərdən keçirərkən müəyyən etdi ki, sazişin ikinci tərəfi hər ay yetkinlik yaşına çatmayan xx.xx.2007-ci il təvəllüdlü X1 üçün 70 aliment məbləğini sazişin birinci tərəfinə ödəməli olduğu halda buna əməl etməmiş, bu səbəbdən sazişin birinci tərəfi xx.xx.2026-cı il tarixdə haqlı olaraq barışıq sazişinin təsdiq edilməsi barədə məhkəməyə müraciət etmişdir. Bundan əlavə məhkəmə aliment məbləğinin artırılması və ya azaldılması ilə bağlı gələcəkdə tərəflərə ayrıca iddia ərizəsi ilə məhkəməyə müraciət etmək hüquqlarını izah edir. Göstərilənlərə və Azərbaycan Respublikası MPM-nin 216-220, 233, 355-25-ci maddələrinin tələblərinə əsasən, məhkəmə
qət etdi:
Ərizə təmin edilsin. Ərizəçi ilə Maraqlı şəxs arasında bağlanmış MŞM/MT036/2023-00288 saylı, xx.xx.2023-cü il tarixli barışıq sazişi aşağıdakı hissədə təsdiq edilsin. 2) xx.xx.2007-ci il təvəllüdlü X5 yetkinlik yaşına çatana kimi 70 manat pul məbləğində alimenti Maraqlı şəxs Ərizəçi ödəyəcəyinə öhdəlik götürür. Alimentin ödənilməsi 2023-cü ilin dekabr ayından başlayaraq hər ayın 29-na kimi nağd poçt və ya bank köçürməsi yolu ilə birinci tərəf Ərizəçi ödəyəcəyinə öhdəlik götürür. Qətnamə dərhal icra olunsun. Qətnamə təqdim olunan (alınan) gündən 1 (bir) ay müddətində, ondan Masallı Rayon Məhkəməsi vasitəsilə və “Elektron məhkəmə” informasiya sistemində yaradılan elektron kabinetində yerləşdirməklə, Şirvan Apellyasiya Məhkəməsinə apellyasiya şikayəti verilə bilər. Qətnamədən apellyasiya qaydasında şikayət verilmədikdə qətnamə həmin müddət başa çatdığı vaxtdan sonrakı gün qanuni qüvvəyə minir. Hakim: Ellara Abbasova